#شرف قيد التنفيذ (أثال)

البارت الثالث

#بـــقــلم
#ايـــزابــيــل
#البــــارت الثــالـــث
#شــرف قـــيـد التنفيـــذ (أثال)
..
شتسـولف بعـد وي خـاطري المكسـور؟
جام إتكسّــر بيا سالفــه تجبّــره..
..
أثال

سناء :- جوارينه اجت خطبت مني أثال الأبنهه معتز

من سمعت كلام امي نزلت راسي خجلت من كلامهه بوجود ابوي ..

فزيت على أثر صوت بابا وهو يشمر الكلاص ..
ويصيح :- اييي وانتي شكلتيلهه ؟!

بلعت ريك وجاوبت :- كلت الهه ناخذ رئيي ابوهه

كال بعصبيه وهو يشد على ملامحه
:- كليلهه ماعدنه مره للزواج ..

لاحضت على امي تحجي كوه ومتردده من كل كلمه تكولهه اخاف تحجي كلام مايعجبه ويكوم يضربهه :- أأأ ليش تكطع بقسمه البنيه

شمر صينيه الجاي هي والقوري وصاح
:- مالج دددددخل لاتدخلين بقراراتي استلكوا اهلج على هالخلفه الجايفه ..

من شمر الصينيه طفر الجاي الي بالقوري على رجليه صرخت ولميت نفسي لحضن امي ..
بجيت من الوجع الي حسيت بي بذيج الحضه ..

امي من فزعتهه رفعت دشداشه وطلعت رجليه ونست اكو عيون حيوانات تترصد الفريسه ..

اني ابجي واصيح :- اخ ولج يمه حتركت يمه لحكيلي ..

ولازمتهه من ايدهه واصرخ وهي حارت شتسوين ابوي كام من مكانه وجاب دولكه مي
كعد كبالي ويذب على رجليه ..

صاحت امي ودفعته :- لك مو هيج مو هيج تطككك رجليهه ..

شالني ابوي وخلاني على القنفه
كال بدوخه :- ااا اني راح اصيح المضمده الي بصفنه

طلع يركض وامي كاعده بصفي لازمه ايدي وتبجي كلت الهه :- يمه راح اموت الحكولي فدوه ماريد اموت ..

مسحت وجهه وكالت :- اشش يمه اسم الله يمه شتموتين حرك بسيط هسه ابوج يصيح المضمده وتطيب جروحج ..

تطيب جروحي ؟! هيهات ماضن ..

شويه واجه ابوي ويا المضمده كعدت يمي على القنفه ورفعت ثوبي تأفأفت وكالت
:- هاي شصاير بيج ..لازم تاخذوهه للمستشفى ..

بجيت وكلت :- راح اموت

كامت وكالت :- اني رايحه اصيح رجلي ياخذكم بسيارته للمستشفى خطيه البنيه تلاحكوهه لا تتشوهه رجليهه  ..

راحت وامي كومتني حطت على راسي عبايه وسندتني طول الوقت تبجي وتهمس
:- صخام بوجهي يايمه يابعد روحي اني سبب دماركم اني سبب المأساه العايشينهه اني الي سكتت وقبلت بالذل ..

رسول وحمزه يبجون ابوي شالهم ووداهم الجوارينه ..

ماكدرت امشي على رجليه لذلك ابوي شالني وخلاني بالسياره منا لمن وصلنه للمستشفى حسيت الدنيا طلعت من عيني ..