#شرف قيد التنفيذ (أثال)

البارت التاسع والعشرين

#بقلم
#ايزابيل
#البارت التاسع والعشرين
#شـرف قـيـد التـنـفـيذ (أثال)
...
أثال

كلت بأستغراب
_شنو هاي

عمار :- فيزه

عقدت حواجبي
_مال شنو وشنسوي بيهه؟؟

ابتسم وكال
_فيزه سفره لتركيا

كمزت بفرح
_صدك

عمار
_اي وداعتج اني اخذت عطله اسبوعين وراح نروح وها بالمناسبه اليوم رحت شفت نتيجتج وناجحه مبروك

الفرحه صارت فرحتين صدمني بخبر نجاحي
حضنته واضحك بصوت عالي ربت على ضهري
وكال :- مبروك حبيبتي هسه اريدج تشدين حيلج للثالث

تنهدت بفرح
_نشاءلله

ثاني يوم بديت احضر للسفره عمار كال الهم عندي شغل هناك وراح اخذ أثال وياي بيومهه غسق كلبت وجهه عليه حتى دخلت عليهه للغرفه شفتهه كاعده تبجي

كلت معقوله علمود السفر دخلت عليهه
مسحت دموعهه ووكفت على حيلهه

بلعت ريكي ووجهت الهه سؤال
_غسق تبجين علمود الروحه

صاحت بوجهي
_وانتِ شدخلج

_لا بس داسأل اني راح اكول العمار ترحين وي..

نترت بوجهي
_بابا انتِ شبيج منو كال ابجي على السفره لتدخلين رجاءً

نزلت راسي وكلت الهه
_غسق ترا مو اني السبب ببعد عمار عنج و..

رجعت صاحت
_أثال اطلعي وسدي الباب

زفرت نفس عفتهه وطلعت تبجي وتشهك
رغم اني مو هلكد اهضمهه لان دائماً ترزلني وتصيح بوجهي بس نكسر كلبي عليهه بهالموقف

من طلعت دخلت عليهه امهه بدون قصد مني سمعت كلامهن

_ البارحه من نومت شمس وقمر جنت مقرره اروح احاجي عمار حتى يجي ينام هنا بس اخذتني الغفه ومارحت وبالحلم اجاني عصام يمه خنكني بأدي ويصيح بوجهي بس صوته مايطلع وجهه يخوف بحيث فزيت ابجي واصرخ

_لاتخافين ماكو شيء كابوس

_لالا هو اكيد ضايج مني لان تزوجت عمار وهو جان يحبني كلش بحيث يباوع لحلكي ولو طلبت لبن العصفور يجيبه  بس هو من مات وعافني بقيت وحيده وصغيره وعندي توم شسوي يعني وين اروح بروحي...

من سمعت رسول يصيحني طفرت من مكاني اله
ضل بالي مشغول بكلامهه
..
ثاني يوم طلعنه للمطار اني وعمار ورسول وحمزه اخذتهم وياي

اول مره اشوف طياره واسافر حبيت السما بشكل لا يوصف لازمه ايد عمار واباوع من الجامه
لحد ماغفيت على كتفه من التعب ماكعدت
غير لمن كال وصلنه

اول ماحطيت رجليه بأسطنبول رتاحيت
اجاني احساس الحريه تحررت من احزاني وذكرياتي الي بالعراق بس شيفيد اذا هو احساس
مؤقت بأي لحضه اصحه من هالحلم وارجع للواقع
..
جسار