#شرف قيد التنفيذ (أثال)

البارت الخامس

#بــقــلم
#ايـــزابــيــل
#البــارت الخــامس
#شـرف قـيـد التنفـيـذ (أثال)
..
فما رأيت أعز منك في قلبي
و ما رغبت في أحدٍ سواك
..
أثال

من حسيت الباب ندك مره ثانيه عدلت كعدتي
وايدي صارت على شعري حسيت بي متهوس
تمنيت مرايه كدامي جان شفت شكلي شلون صاير ؟

رجع دخل نفس الرجال الي اسمه عمار ..
ابتسم وجهلي سؤال :- شلون صرتي ؟

نزلت راسي وكلت :- احسن ،،

جر كرسي وكعد كال :- وصيتلج على اكل شويه ويجيبوه ..

ماجاوبته ونظراتي تثبتت على اديه واضافري الي ملتهيه افرك بيهن ..

نتبهت علي يهز برجله ويحجي
:- كلتيلي اسمج أثال

هزيت راسي ب اي

:- وعمرج بعد كم يوم يصير 18 مو

ماعرف شنو الفايده من كلامه وليش يحجي هيج رجع كال :- تدرين اول ماشفتج  عبالي عمرج اكبر 20 هيج المهم أثال بس تكملين اكل عندي كم كلمه وياج ..

شويه وندك الباب كام هو فتحه جان جندي جايب ويا اكل وجاي رجع عليه خله الاكل على الجربايه وفتح العلاكه دجاج ويا تمن وخبزه ..

كال :- يله سمي بسم الله

هزيت راسي ب لا وكلت :- ماشتهي

:- جا شلون ندخل بالمفيد اذا انتِ مابيج حيل تحجين كلمه اكلي حتى يرجع الدم بجسمج .

أثال :- نفسي تلعب ماكدر اكل اي شيء سيدي شتريد تعرف ؟!

خلى رجل على رجل وكال :- بنتي مشوارنه بالتحقيقات طويل لايخلص بيوم ولا يومين لان قضيتج معقده وللعلم انتي المعقدتهه ومو راضيه تحجين شيء عنوانج شلون طلعتي ؟! واني تقريبا عرفت ابوج تعامله شلون جان وياج بس ماسمعت منج بوضوح ..

نزلت دموعي شهكت وكلت :- سيدي اني ماريد شيء والله بس خليني اطلع منا ماريد اشتكي على احد ومحد اله ايد بضربي اني ضربت نفسي بس عوفوني خلي اروح ..

ضحك وكال :- وين ترحين ؟!

بلعت ريكي وكلت :- البيتنه ؟

عمار :- هاهيه تدللين من باجر نطلع اني وياج اوصلج لبيتكم وبرسم الخدمه ..

أثال :- لا ماكو داعي اني اروح ،

انتبهتله مثل الي مشكك بكلامي وحتى نظراته مال واحد مستهزء بكلامي يسايرني يمكن ؟!!

عمار :- جا اني شبيه ابزز ماتخليني اوصلج ؟

ضحكت على كلامه
ابتسم وكال :- ترا هاي اهانه مال تضحكين عليه افرض عليج عقوبات شنو قرد كدامج ..

ابتسمت وكلت :- لا سيدي حشاك بس ذكرتني بصديقتي اتذكرهه من جنت بالمدرسه تحجي ب الجا وبوكتهه حيل حبيت كلامهه وصادقتهه