#شرف قيد التنفيذ (أثال)

البارت التاسع والثلاثين

#بقلم
#ايزابيل
#البارت التاسع والثلاثين
#شـرف قـيـد التـنـفـيذ (أثال)
..
أثال

ورث..؟؟ هذا ياورث الديقسمونه ويحجون عنه

كملو بـ
:- زين همه شوكت ينطون حصه أثال..؟

ابو أثال
:- خلدون كال لو باجر لو عكبه اجيب الفلوس الأثال بس احتمال غسق تاخذ الحصه الأكبر لان هي زوجته الأولى

:- انت لا تكول الأثال عود ناخذ من الفلوس وبعدين نكللهه

بلعت ريكي وغمضت عيوني بتعب اوف ياربي
ماصارله سنه من مات وبدو يوزعون ويقسمون بورث رجعت للغرفه وحسره بداخلي مبكوته..

اتمنى ابجي واصرخ
ليش هيج يا عمار ليش فلوسك تعبك وجهدك والأيام الي سهرتهن حتى تحصل الجنت علي تاليتهن يتقاسموهن المايخافون الله..

سحبت موبايلي وخابرت خلدون
:- الوو شلونك خلدون

:- هلا خويه الحمد الله بخير وانتِ

:- اني على الله بس عندي سؤال
:- أي جواب

:- انت مخابر ابوي وكايله راح اجيب حصه أثال من فلوس عمار الك

:- اي هو خابرني كال أثال تسأل على حصتهه وكتله نشاءالله اشوف حبوبتي وندز الهه..

تنهدت بنفاذ صبر طلعني بالصوره الحقيره كدامهم في سبيل ياخذ فلوس الـ اخ منك يالساني

:- اسمعني خلدون اريدك تاخذ الفلوس وتخليهن الي بالبنك وتسويلي وكاله بحيث بس اني اكدر اتصرف بيهن تمام

:- خوش بس اكو إجراءات لازم نسويهه

:- حاضره لكلشي

:- ماشي انه بعدين اخابرج ونتفق

هزيت راسي وكتله تمام سديت الخط وتمددت
على الجربايه راح الي جنت ماحسب حساب باجر بوجوده بالرغم كاعده ببيت اهلي بس حاسه نفسي بغابه ولازم احارب حتى اعيش..

غفيت بحلم وردي لعده سنين وبضربه قويه صحيت على واقعي العشت بي من يوم ولادتي

روتيني معتاد وأملي بالحياه يتكرر يوم ورا الثاني..
وجعي الي تعايش وياي بفقدانه تعودت علي..

ورا اسبوع من مخابرتي لخلدون اجه وويا اوراق يكلي وقعي عليهن علمود الوكاله تصير بأسمج

بابا تخبل وطرد حتى الولد بس وكفت بوجهه وماسمحته يستغلني :- لهنا وبس مو عبالك صرت ارمله يعني ماعندي احد وتتحكم بيه وتفرض الشين عليه مثل قبل لا خلي يكون بعلمك مادامني عايشه ماخلي حقي يضيع..

جريت الاوراق من ايد خلدون خليتهم على الطاوله الكبالي ودنكت عليهن وقعت وكتله
:- اذا اكو ورقه بعد تحتاج توقيع كلي

رنا :- والله صلفه وماينكدر الج جان خليتي ابوج بعين الاعتبار وانطيتي الفلوس على الاقل حق تربيتج وكعدتج يمه