Through The Strait Gates//过门 [Completed]

အခန်း ၃၃ ။ ရွေးချယ်မှု

"Burmese Translation of "GUOMEN" By Priest"

အခန်း ၃၃ ။ ရွေးချယ်မှု

လီပေါ်ကျီသည် ဦးနှောက်ထက် ကာယကိုအသုံးပြုသူဖြစ်သည်။ ဒါကြောင့် သူက နက်မှောင်ယုတ်မာသည့် အကြံစည်များတော့ မစဉ်းစားနိုင်ပေ။ အရင်တစ်ခေါက် လခြမ်းတွင်  စုန့်လျန်ယွမ်ကြောင့် သူ့အပျော်လေးပျက်သွားတာကို မကျေမနပ်ဖြစ်နေရုံပင်။ ထိုအချိန်က သူက ဒေါသပေါက်ကွဲချင်ရုံသာဖြစ်သည်။ သူ ကျရှုံးသွားကာ ရက်အတော်ကြာ ထိုကိစ္စကိုတွေးမှိုင်ပြီးနောက် သူစိတ်ငြိမ်ငြိမ် မထားနိုင်တော့ဘဲ ဒီကိစ္စကို အလွှတ်မပေးနိုင်ဟု ဆုံးဖြတ်လိုက်သည်။

သူတို့အောင်လက်မှတ်များကို ဖြန့်ဝေပြီးသားဖြစ်သည်။ သူက ဒီနေရာကနေထွက်သွားတော့မည်ဖြစ်ကာ ကျယ်ပြန့်လှသည့် ဖွင့်ထားသော လမ်းများရှိနေသော်လည်း တစ်ခုကမှ သူ့အတွက် မဟုတ်ခဲ့ပေ။

လီပေါ်ကျီ ဒီအချက်ကို လက်ခံထားပြီးသားပင်။ ဒီလိုဆိုမှတော့ သူထွက်မသွားခင် အမှားတွေအကုန်လုံးကို ပြန်မှန်အောင်လုပ်ပြီး မည်သည့်အတွက်ကြောင့် လက်စားမချေရမှာလဲ။ သူ မျက်စိထေဲ မကျေနပ်သည့် လူမှန်သမျှကို ရှင်းပစ်သည် ။ အကြောင်းရင်းတိတိကျကျတော့မရှိ သူ့ကိုယ်သူပျော်ရွှင်စေရန်ဖြစ်သည်။

လူတွေက ပျော်ရွှင်အောင် နေကြတာပင် မဟုတ်ချေလော။

သော်ရွှင်း မကြာခဏ နံပါတ်၆ကျောင်းကို လာတတ်သည်ကို သူသိသည် ။ ချိုက်ကျင်းကို သူ့အားနောက်ယောင်ခံစေချင်ကာ တခြားသူများနှင့်ဝေးသွားအောင် အကြောင်းရင်းတစ်ခုဖန်တီးခိုင်းစေချင်တာပင်။ သစ္စာဖောက်ဝူထောင်မှစကာ သူ့ကိုလူသိရှင်ကြား တစ်ခါအရှက်ခွဲဖူးသည့် ရွှီရှီးလင်၊ သူနှင့် မရှင်းရသေးသော ရန်ငြိုးရှိသည့် သော်ရွှင်းနှင့် သူ အမြင်မကြည်သောလူများအားလုံး— သူ သူတို့အားလုံးကို ရှင်းပစ်မည်။ မည်သို့ပင်ဖြစ်ဖြစ် တခြားသူများတွင် အနာဂတ်မျှော်လင့်ချက်များရှိကာ သူ့တွင်တော့မရှိပေ။ တခြားသူများ တက္ကသိုလ်ဝင်ခွင့် စာမေးပွဲဖြေဂန်လိုအပ်ချိန် သူကတော့ ထိုနေရာတွင် နံပါတ်များလျှောက်ရေးရန်သာ ရှိနေမည်ဖြစ်သည်။ သူသွားခြင်းမသွားခြင်းက ကွာခြားမည်မဟုတ်။