Through The Strait Gates//过门 [Completed]

အခန်း ၄၆ ။ အဆုံးစွန် ပျော်ရွှင်မှု၊ အဆုံးစွန် ဝမ်းနည်းမှု

"Burmese Translation of "GUOMEN" By Priest"

အခန်း ၄၆ ။ အဆုံးစွန် ပျော်ရွှင်မှု၊ အဆုံးစွန် ဝမ်းနည်းမှု

အချိန်အတော်ကြာသည်အထိ သော်ရွှင်းသည် စကားမဆိုတော့ပေ။ ရွှီရှီးလင်က သူ့ကိုမှီနေသည်။ သော်ရွှင်းကိုယ်က နွေးထွေးလွန်းပြီး သိပ်မကြာခင်ပင် သူ့မျက်ခွံများက ပွင့်နေစေရန် တိုက်ပွဲဝင်နေရသည်။
သော်ရွှင်း ခေါင်းငုံ့ပြီး နှုတ်ခမ်းများကို နမ်းလိုက်သည်။ ပူရှိန်းသွားတိုက်ဆေးနံ့သာရနေကာ အယ်လ်ကိုဟောနံ့မရှိသလောက်ပင်။
"မင်း အများကြီးမသောက်ထားဘဲ ဘာလို့အရမ်းအိပ်ချင်နေတာလဲ"

"မနေ့ညက ကျောင်းမှာ တစ်ညလုံးမိုးလင်းပေါက်နေမိတာ၊ ပြီးတော့ ဒီညကျ လောင်ရယ့်နဲ့သွားတွေ့တာ..." ရွှီရှီးလင် အသံက အဆုံးတွင် မကြားနိုင်တော့လောက်သည်အထိ တိုးသွားသည်။

သူ့ကိုယ်နံ့သည် သော်ရွှင်းအတွက် သိပ်မူမမှန်ပေ။ ရွှီရှီးလင်တစ်ယောက် အိမ်သာထဲရှိဘေးဘက်တွင် ချန်ထားခဲ့သည့် အခမဲ့ တစ်ကိုယ်ရေသုံးပစ္စည်းများကို မြင်သွားတာဖြစ်နိုင်သည်။ သော်ရွှင်း အနည်းငယ်ကျင့်သားမရဖြစ်နေသည်။ သူ ရွှီရှီးလင်ကို ဖက်ရင်း ပွတ်သီးပွတ်သပ်လုပ်ကာ ထိုထူးဆန်းသည့် ကိုယ်သင်းနံ့ပျောက်သွားအောင် ကြိုးစားနေသည်။

တစ်အောင့်ပွတ်သပ်နေပြီးနောက် သော်ရွှင်းက သူ့လည်ပင်းထဲ ငါးအရိုးတစ်ချောင်းလိုဆူးနေသည့် အသည်းပုံလေးကို သတိရသွားသည်။ အဆက်အစပ်မရှိ သူ ရုတ်တရက် ရွှီရှီးလင်ကို မေးလေ၏။
"... ယောက္ခမ မရှိတာက ဘာလို့ကောင်းတဲ့အရာလဲ"

အတော်လေးအားထုတ်လိုက်ရပြီး ရွှီရှီးလင်မှာ အရမ်းအိပ်ချင်လွန်း၍ သုံးထပ်မြင်နေရသည့် မျက်ဝန်းများကို ဖွင့်လိုက်သည်။
"ဘာကိုလဲ"

"ယွီယိရန် မင်းကိုပို့တဲ့ စာကိုမြင်တယ်၊ သူက မင်း အနာဂတ်ကျရင် သေချာပေါက် နာမည်ကြီးလာမှာတဲ့၊ မင်းနဲ့ဆို 'အိမ်လည်းပိုင်မယ်၊ ကားတစ်စီးလည်းပိုင်မယ်၊ ယောက္ခမလည်းမရှိဘူး' မို့ဆို"

ရွှီရှီးလင်မှာ သူ့ကို စိတ်ရှုပ်ထွေးနေသည့်ဟန် ခဏတာစိုက်ကြည့်နေသည်။ ထို့နောက်တွင်တော့ သူ့ဦးနှောက်က နိုးသွားပြီး သော်ရွှင်း၏ ဗိုက်ပေါ် မျက်နှာအပ်ကာ မထိန်းနိုင် ရယ်လေတော့သည်။