Through The Strait Gates//过门 [Completed]

အခန်း ၄၅ ။ ဖုံးကွယ်ထားသော စိုးရိမ်မှုများ

"Burmese Translation of "GUOMEN" By Priest"

အခန်း ၄၅ ။ ဖုံးကွယ်ထားသော စိုးရိမ်မှုများ

ရွှီရှီးလင်နှင့် အခြားသူများ လောင်ချန့်အိမ်ပြန်ရောက်သည်ကို ကြိုဆိုရန် သွားကြလေသည်။ လောင်ချန့်၏ ကျောင်းတွင် ကျောင်းဝင်းနှစ်ခုရှိသည် ။ အတန်းအများစုကို တိုင်းပြည်၏ တခြားအစိတ်အပိုင်းတွင် သင်ရသည်။ ကျန်သည့် အတန်းအချို့ကသာ မြို့ထဲရှိ ကျောင်းဝင်းတွင်သင်ရခြင်းဖြစ်သည်။ သူတို့ကို တစ်ကျောင်းတည်းက ပိုင်တာဆိုပေမဲ့ မတူညီသည့်ဒေသများဖြစ်၍ မတူညီသည့်ပရိုဂရမ်များတွင် ကျောင်းလျှောက်နည်းအမျိုးမျိုးရှိပြီး ကွာခြားချက်ကလည်း အတော်လေးသိသာသည်။ လောင်ချန့်က တက္ကသိုလ်ဝင်ခွင့်စာမေးပွဲတွင် ချွတ်ချော်ခဲ့ကာ နိုင်ငံ၏ အခြားတစ်နေရာတွင် ကျောင်းသွားတက်ဖို့ကလွဲ မရှိတော့ပေ ။ သူ နောက်ဆုံးတော့ လူတစ်ယောက်ဆီမှ နောက်တစ်ယောက်ဆီစူးစမ်းရင်း သင်ကြားသည့်နယ်ပယ် ပြောင်းလာနိုင်ခဲ့တာ မကြာသေးပေ။ သူ အောင်အောင်မြင်မြင် အိမ်ဆီပြန်လည်ခြေချနိုင်ခဲ့သည်။ အနာဂတ်တွင် သူ ရွှီရှီးလင်၊ အခြားသူများနှင့် ပြန်ပြီး လည်ပတ်နိုင်ပြီ။

ရွှီရှီးလင်က မေ့လဲလောက်သည်အထိ အလုပ်များနေတာတောင် သူ အချိန်ညှစ်ထုတ်ကာ အဖော်သွားပြုပေးခဲ့သည်။

လောင်ချန့်က ရွှီရှီးလင်ကို အကြောင်းမရှိဘဲ ရည်းစားရှိမရှိမေးတာမဟုတ်ပေ။

ရွှီရှီးလင်က မျက်နှာတွင် အရိုးပဲကျန်တော့တဲ့အထိ ပိန်ကျနေတာတောင် မျက်တွင်းကျနေတာမျိုး မရှိပေ။ အခြားသူများသည် သူတို့ စာများ၊ အလုပ်များနှင့် ဖိအားများနေရင် ကြွက်သတ်ဆေးကို မျိုချထားသလို ရုပ်များဖြစ်တတ်ကြသည်။

ဒီကောင်ကသာ တစ်ခုခုလှုံ့ဆော်နေသကဲ့သို့ ပုံစံပင်။ တစ်ခုခုက သူ့ကို ကြိုးစားချင်စိတ်ဖြစ်တည်စေနေတာ သိသာ၏။

တခြားအကြောင်းရင်းက သူ့ကျောင်းလွယ်အိတ်၏ ဘေးအိပ်ကတ်တွင် Ferrero Rocher(ချောကလက်) သုံးလုံးပါသော အထုတ်ရှိနေသည်ကို မြင်သွား၍ပင်။

သူမြင်ခဲ့သည့် အထုတ်ပေါ်တွင် လက်သည်းနီနှင့်ခြယ်ထားသော ပန်းရောင်အသည်းပုံလေးပုံဖြင့် အချစ်လက္ခဏာကြောင့် သူ့မျက်လုံးတစ်စုံကန်းလုနီးပါးဖြစ်သွားတာ ကျိန်ရဲသည်။