Through The Strait Gates//过门 [Completed]

အခန်း ၃၆ ။ မိသားစုကိစ္စများ

"Burmese Translation of "GUOMEN" By Priest"

အခန်း ၃၆ ။ မိသားစုကိစ္စများ

အဆုံးတွင်တော့ သော်ရွှင်းမှာ သူ့နှလုံးသားဆန္ဒကို ရရှိပြီးနောက် မည်သို့ခံစားခဲ့ရလဲကို   ဝေမျှခွင့်မရခဲ့ပေ။ တွေဝေငေးမောစွာဖြင့် သူသည် ရွှီရှီးလင်ကို မီးဖိုချောင်ထဲ ထားခဲ့ပြီး သူတစ်ယောက်တည်း ထွက်သွားလေသည်။

သူ လှေကားပေါ်တွင် ချော်ကျသွားသေး၏။

အစတွင် သော်ရွှင်းတစ်ယောက်  အတော်လေးရယ်ဖို့ကောင်းသည်ဟု ရွှီရှီးလင်တွေးမိသည်။ ထို့နောက် သူတဖြည်းဖြည်း စိတ်ထဲတွင် တန်ဖိုးရှိလှသည့်အထိအတွေ့ တစ်မျိုး ခံစားရလေသည်။ သူကအမြဲ မြက်ပင်တစ်ပင်ပမာ ပေါ့ပျက်ပြီး အရေးမပါဟု ခံစားနေခဲ့ရသည်။ သော်ရွှင်းနှင့်အတူရှိနေသည့်အချိန်မှသာ သူ့တွင်လည်းလေးလံပြီး ခိုင်မာသည့် အလေးချိန်ရှိသည်ဟု ခံစားရခဲ့သည်။

စာမေးပွဲပြီးကာစ လူအနေနှင့် နောက်နေ့များတွင် ကိုယ်တွင်းနှိုးစက်အတိုင်း ကျင့်သားရနေတုန်းပင်။ စာမေးပွဲပြီး ဒုတိယမြောက်နေ့တွင် နေမထွက်ခင် ရွှီရှီးလင်မှာ အဲယားကွန်းသံ ခပ်တိုးတိုးကြောင့် နိုးလာလေသည်။သူက မှီပြီးထလာပြီးမှ နွေရာသီပိတ်ရက်ဖြစ်ကြောင်း ပြန်လည်သတိရသွားပြီး ခြေကားရားလက်ကားရား ပြန်လှဲသွားလေသည်။ ဤအခြင်းအရာသည် အနည်းငယ် လက်တွေ့မဆန်သလိုခံစားနေရသည်။ တံခါးလော့များမှာ လုံခြုံစိတ်ချရကြောင်း စွဲလမ်းတကြီးစစ်ဆေးနေသည့်သူကဲ့သို့ သူတကယ်အစောကြီး ထစရာမလိုတာ သေချာအောင် သုံးကြိမ်တိုင်တိုင် အတည်ပြုပြီးမှ သတိကြီးကြီးမျက်လုံးမှိတ်သွားလေသည်။

ဘေးအခန်းတွင်တော့ သော်ရွှင်းမှာ ပိုပြီးတောင် စိတ်ကူးယဉ်ဆန်ဆန်ခံစားချက်ရနေသည်။ မနေ့ညကတစ်ညလုံး သူ အိပ်နေရင်းယောင်ပြီးလမ်းလျှောက်မိနေသည့် ခံစားချက်မျိုး ရခဲ့သည်။သူ ဘယ်ချိန် အိပ်ပျော်သွားခဲ့လဲမသိသော်လည်း စိတ်လှုံ့ဆော်ဆေးများ သောက်ထားသလို နိုးကြားနေသည်။

တက္ကသိုလ်ဝင်ခွင့်စာမေးပွဲပြီးသွားသော်ငြား သော်ရွှင်းက အားလပ်ရက်မရသေးပေ။ ပိတ်ရက်တွင် အချိန်လာဖြုန်းပြီးလျှင် တနင်္လာနေ့မနက်တွင် ကျောင်းကို အမြန်ပြန်ရန်လိုအပ်သည်။