Through The Strait Gates//过门 [Completed]

အခန်း ၂၉ ။ ခွဲခွာခြင်း

"Burmese Translation of "GUOMEN" By Priest"

အခန်း ၂၉ ။ ခွဲခွာခြင်း

ရွှီရှီးလင် ဒေါသတကြီးရေရွတ်လိုက်သည်။
"သော်ရွှင်း၊ မင်းခေါင်းထဲ တစ်ခုခုလွဲနေတာလား!"

သော်ရွှင်း၏ ကျိုးကြောင်းတွေးခေါ်တတ်သည့် စိတ်မှာ သူအရင်က မကြုံဖူးသည့် မနာလိုမှုကြောင့် လောင်ကျွမ်းလုနီးပါးဖြစ်သွားသည်။ ထိုးကြိတ်ပစ်ချင်သည်။ ပြီးတော့ တစ်စုံတစ်ရာလည်း လုပ်ပစ်ချင်သည်။
သူ့နှလုံးသားထဲတွင် မတရားခံလိုက်ရသလို ခံစားရ၍ ပေါက်ကွဲချင်လာသည်။

ဘာလို့ ဆုံးဖြတ်ချက်ချတဲ့သူက မင်းဖြစ်နေရတာလဲ၊ မင်းသဲလွန်စပေးတာနဲ့ ငါက ဘာလို့ ထွက်သွားရမှာလဲ။

မီးရောင်ခပ်ဖျော့ဖျော့လင်းနေသည့် ဝင်ပေါက်စင်္ကြတွင် သော်ရွှင်း၏ မျက်ဝန်းများကို  ရွှီရှီးလင် ရှင်းလင်းစွာမြင်နေရသည်။ ကြီးမားလွန်းသော စိတ်ပျက်မှုများ ၊  ခါးသီးသောခံစားချက်များက သူ့ကိုထိတ်လန့်သွားစေသည်။ သူပြောတာကိုတောင် မစောင့်တော့ဘဲ သော်ရွှင်းက သူ့ကိုတွန်းထုတ်ပြီး အပေါ်ထပ်တက်သွားသည်။

စူပါမားကတ်အိတ်ထဲမှ ပစ္စည်းများမှာ ကြမ်းပြင်တွင် ပြန့်ကျဲနေသည်။ ရွှီရှီးလင် တိတ်ဆိတ်စွာ ဆဲရေးလိုက်သည်။ တိုက်မိသွားရာကနေ နာကျင်သွားသည့် နောက်ကျောနေရာကို ခက်ခက်ခဲခဲဖြင့် လက်ကိုလိမ်ပြီး နှိပ်နေရသည်။ ထို့နောက် သူက အသက်ပြင်းပြင်းတစ်ချက်ရှူကာ ဒေါသကိုထိန်းပြီး သော်ရွှင်း ခုလေးတင် ဘေးကို ပစ်ထားသည့် ကျောင်းလွယ်အိတ်ကိုရှင်းလိုက်သည်။

လက်တစ်ဖက်တွင် မုန့်ထုတ်များ၊ တစ်ဖက်တွင် ကျောင်းအိတ်ကိုကိုင်ရင်း ပြဿနာကိုရှင်းရန် အပေါ်ထပ်တက်လာခဲ့သည်။ ဒါက ဒီနှစ်တွေအတွင်း ရွှီကျင်းသူ့ကို သင်ပေးခဲ့သည့် အရာဖြစ်သည်။ ပြဿနာလေးများကို ကြီးမသွားအောင် ချက်ချင်းရှင်းသင့်သည်။ပြဿနာကြီးများကိုလည်း ချက်ချင်းရှင်းသင့်သည်။ ဒါမှ အကောင်းဆုံး အချိန်မှန်ကို မလွတ်ရန်ဖြစ်သည်။

ရွှီရှီးလင်က အပေါ်ထပ်တက်လာကာ သော်ရွှင်း၏ ခပ်ဟဟတံခါးကို ခေါက်လိုက်သည်။