Through The Strait Gates//过门 [Completed]

အခန်း ၁၈ ။ ခွဲခြားခြင်း

"Burmese Translation of "GUOMEN" By Priest"

အခန်း ၁၈ ။ ခွဲခြားခြင်း

ရွှီကျင်းစာကြည့်ခန်းက အင်မတန်သပ်ရပ်သည်။ သူမ၏ ပုံမှန် အားမာန်ပါပြီး တက်ကြွသည့်ဗီဇနှင့် အနည်းငယ်တော့မအပ်စပ်ပေ။ သူမအရင်က အသုံးပြုခဲ့ဖူးသည့် စာရွက်စာတမ်းများ စာချုပ်များကို အမျိုးအစားအလိုက် စီစဉ်ပေးထားသည်။ စာအုပ်များ၊ ဥပဒေမှတ်တမ်းများကို သပ်ရပ်လွန်းစွာ စီစဉ်ထားပုံက စွဲလမ်းမှုပမာ ဖြစ်လုနီးပါးပင်။

ရွှီကျင်းက သူမစားပွဲနောက်ထိုင်နေပြီး သော်ရွှင်းနှင့် သူမကြားတွင် သစ်သားစားပွဲရှည်ကြီးရှိနေသည်။ သူမက အမှုသည်တစ်ယောက် လက်ခံတွေ့နေသည့်အတိုင်းပင်။

"ထိုင်"
ရွှီကျင်းက သူမ မျက်မှန်ကို ကောက်တပ်ကာ ဒီလူငယ်လေးကို မှန်ဘီလူးပါးများမှ တစ်ဆင့် လေ့လာနေမိ၏။ ထိုကျူးရှောင်ချန့်နှင့် သော်ကျွင်းလျန်ဆီက မျိုးစိတ်နှစ်ခုတွေ့ဆုံတုန်းက ဘယ်လိုမျိုး မတော်တဆမှုဖြစ်သွား၍ ဒီလိုကလေးမျိုးကို မွေးဖွားခဲ့လဲ သူမခန့်မှန်းနိုင်ပေ။
"မနေ့က မင်းဆရာမနဲ့အမေဆီကနေ ဘာတွေဖြစ်သွားလဲ ငါကြားလာတယ်"

သူမ သူ့ကို သူ ရင်းနှီးနေကျ ဆုံးမစကားနောက်တစ်ခေါက် ထပ်ပြောတော့မည်ဆိုတာ အာရုံရနေမိသည်။ သူ ခေါင်းငုံ့လိုက်၏။မျက်နှာက သုန်မှုန်နေကာ အမူအရာကင်းမဲ့နေသည်။ သူ့တစ်ကိုယ်လုံးက မကြားချင်ယောင်ဆောင်ပြီး 'ကျွန်တော်ဆုံးဖြတ်ချက်ချပြီးပြီ' ဟုပြောနေသလိုပင်။

ထိုအစား ရွှီကျင်းက  အမှုမထားဘဲ ပြောလာခဲ့သည်။
"တက္ကသိုလ်ဝင်ခွင့်စာမေးပွဲကို နောက်ဆုတ်တာက သူတို့ပြောနေသလောက်တော့ ရေးကြီးခွင်ကျယ်မဟုတ်ဘူး၊ အခုအခြေအနေကို အကြမ်းဖျဉ်းတော့ ငါနားလည်တယ်၊ မင်း အမှတ်ပိုတွေ မရနိုင်တော့ကတော့ ဝမ်းနည်းစရာပဲ၊ ဒါပေမဲ့ တက္ကသိုလ်ဝင်ခွင့်စာမေးပွဲမှာ ၁၀မှတ်ပိုရရင် ဘဝကြီး ပြောင်းလဲသွားမယ်ထင်နေတဲ့ သူတွေကတော့ သူတို့ဘဝမှာ ဒီထက်ပိုတိုးတက်လာစရာ အကြောင်းမရှိတော့ဖို့ များတယ်"

ထုံးစံမဟုတ်သည့် ဤမှတ်ချက်ကို ကြားလိုက်ရတော့ သော်ရွှင်း ဖြတ်ခနဲကြည့်လိုက်မိသော်ငြား သတိတော့မလျှော့သေးပေ။ သူတို့အမြင်ကို ဖော်ပြရန် နူးညံ့သည့် နိဒါန်းသုံးခြင်းမှာ ဆရာမများ၊ မိဘများမကြာခဏလုပ်နေသည့် အရာပင်။
"ဆရာမကျန်းပြောတဲ့ ဝေဖန်ချက်တွေကိုလည်း နားထောင်ပြီးပြီ၊ မင်းမှာ စာမေးပွဲမဖြေရတဲ့အကြောင်းရင်း ခိုင်ခိုင်မာမာလည်းမရှိဘူး၊ တစ်ကိုယ်ကောင်းဆန်မှုသက်သက် နေမှာ"
ရွှီကျင်းက တည်ငြိမ်ကာ စီကာပတ်ကုံးပြောနေသည်။
"ဒါပေမဲ့ လူတိုင်းမှာ သူတို့စိတ်ထဲ အယူအဆကိုယ်စီရှိတယ်လို့ ထင်တယ်၊ အထူးသဖြင့် မင်းတို့လိုအရွယ်တွေပေါ့၊ မင်း အများကြီးတွေးထားပေမဲ့ ဘာတွေတွေးနေလဲဆိုတာ ငါတို့ကိုမပြောပြချင်ဘူးမလား"