Through The Strait Gates//过门 [Completed]

အခန်း ၃၉ ။ လမ်းဆုံလမ်းခွ

"Burmese Translation of "GUOMEN" By Priest"

အခန်း ၃၉ ။ လမ်းဆုံလမ်းခွ

သော်ရွှင်း၏ ရုတ်တရက် တစ်မူထူးသော အပြုအမူများနှင့်ရင်ဆိုင်ရချိန် ရွှီရှီးလင် ကျိုးကြောင်းရှင်းမပြတတ်စွာ ထူးဆန်းသည့်ပုံပြင်အချို့ကို သတိရသွားခဲ့သည်။ အတိတ်တုန်းက ကျောင်းနေဖက်တစ်ယောက်တွင် ကြောင်တစ်ကောင်ရှိခဲ့ဖူးသည်။ ထိုကြောင်က စဉ်းလဲသည့်အသွင်ရှိကာ မနက်တိုင်း သူမရင်ဘတ်ပေါ် တက်နင်းပြီး သူမ သေနေမသေနေ အနားကပ်ပြီး ကြည့်တတ်သည်ဟု ဆိုသည်။

ဘတ်စကတ်ဘောအသင်းမှ သရဲပုံပြင်ပြောရတာ သဘောကျသည့်လူတစ်ယောက်ကလည်း စပါးကြီးမြွေတစ်ကောင်ကို မွေးထားသည့် လူတစ်ယောက် အကြောင်းပြောပြဖူးသည်။ အချိန်တစ်ခုအထိ ပိုင်ရှင်က လှဲအိပ်တိုင်း မြွေက တွန့်လိမ်ကောက်ကွေးတက်လာပြီး ပိုင်ရှင်ဘေးလှဲနေတတ်သည်။အစတုန်းကတော့ ပိုင်ရှင်က ထိုအရာက အတော်လေးကောင်းမွန်သည့် အမူအရာဟု ထင်ခဲ့သည်။ တဖြည်းဖြည်းသူသိလာရသည်မှာ မြွေက နေ့တိုင်း သူ့ဘေးနားလာလှဲခြင်းက သူ့ခေါင်းကိုတိုင်းပြီး မျိုနိုင်မမျိုနိုင်သိချင်၍ ဆိုတာ သိသွားခဲ့သည်။

ရွှီရှီးလင် စိတ်တထင့်ထင့်ဖြင့် ဘာဖြစ်လာမလဲ ရိပ်မိနေသည်။
"မင်းဘာလုပ်နေတာလဲ"

သော်ရွှင်းက ခေါင်းငုံ့ပြီး ရွှီရှီးလင်လည်တိုင်ကို ပွတ်သီးပွတ်သပ်လုပ်လေသည်။ဒီလို နှစ်ဦးသား ခေါင်းချင်းအတူတူပွတ်သတ်ပြီး နီးကပ်နေသည့်အထိအတွေ့က ဟော်မုန်းများဖလှယ်ခြင်းကို အားပေးရန်ဖြစ်နိုင်သည်။ ရွှီရှီးလင် ရုတ်တရက် ကြောက်ရွံ့သွားသည်။ သော်ရွှင်းက သူ့ကို ရန်စဖို့ နည်းလမ်း အသစ်တစ်မျိုးရှာတွေ့လာပြီဟု တွေးမိပြီး ချက်ချင်းပင် တံတောင်ဆစ်မြှောက်ကာ ကျော်တက်ပြီး သူ့ကိုတိုက်ခိုက်ရန် ထဖို့ ရည်ရွယ်လိုက်သည်။

သော်ရွှင်း : "..."

ဒီဖြစ်ရပ်အစီအစဉ်များသည် လွဲချော်နေသည်!

သူက ခဏတာရပ်သွားပြီး ခေါင်းထဲရှိ ရှုပ်ပွပြီး များပြားလှသော မှတ်စုများကို အမြန်ပြန်စဉ်းစားရင်း သူဘယ်နေရာတွင် လွဲသွားလဲ ရှာဖွေကာ မျက်မှောင်ကြုတ်နေသည်။ ထို့နောက်တွင်တော့ သူအမှတ်ရသွားသည်— သူ မီးပိတ်ဖို့ လိုသေးသည်။ အလင်းရောင်က လူတစ်ယောက်ကို သတိကပ်ကာ စိတ်လှုပ်ရှားစေသည်။