Through The Strait Gates//过门 [Completed]

အခန်း ၂၀ ။ တတိယနှစ်

"Burmese Translation of "GUOMEN" By Priest"

အခန်း ၂၀ ။ တတိယနှစ်

ရွှီရှီးလင်အတွက်တော့ သူ့ဘဝတွင် အကြီးမားဆုံးပြောင်းလဲမှုက မနက်ပိုင်းတွင် ကျောင်းအတူသွားဖို့ သူ့ကိုစောင့်နေမည့်သူ ရုတ်တရက် မရှိတော့တာပင်။

နှစ်ယောက်သားက တကယ်တော့လည်း မနက်ပိုင်းအသွားအပြန်တွင် စကားအများကြီးပြောဖြစ်သည်မဟုတ်ပေ။ သော်ရွှင်းမှာ လူသားမျိုးနွယ်အဆုံးသတ်မှုကို သယ်ဆောင်လာမည့် မနက်ပိုင်းစောစောထသော လူမျိုးစုဝင်ဖြစ်သည့်ကျေးဇူးကြောင့် ရွှီရှီးလင်မှာ ကျောင်းသွားသည့်လမ်းတစ်လျှောက် နိုးတစ်ဝက်မနိုးတစ်ဝက်အနေအထားဖြင့် သူ့နောက်ကနေ ဒရွတ်တိုက်လိုက်သွားရသည်။

ဒါပေမဲ့ ထိုနေရာတွင် သူရှိနေခြင်းနှင့် မရှိနေခြင်းက အင်မတန်ကို ကွာခြားလွန်းခဲ့သည်။

ကျောင်းပြန်တက်သည့် ပထမဆုံးနေ့တွင် ရွှီရှီးလင်မှာ ဖိနပ်ကြိုးခြင်းရင်း မိန်းမောနေကာ အိမ်အပြင်ဘက်တွင် မျက်လုံးကြီးစင်းပြီး ငါးမိနစ်အပြည့် စောင့်နေမိခဲ့သည်။ သော်သော်တစ်ကောင် ရွှီရှီးလင် သူမကို လမ်းလျှောက်ထွက်ပေးမည်ဟု ထင်ပြီး ပျော်ရွှင်စွာ ဖြင့် သူ့ခြေထောက်များကို ပွတ်သပ်တော့မှ နိုးလာလေသည်။ သူ မျက်လုံးများဖွင့်ကာ ငေးငိုင်လိုက် သမ်းဝေပြီး တစ်ယောက်တည်းထွက်လာခဲ့ရသည်။

သူတို့ တစ်နှစ်လုံးက တတိယနှစ်အတန်းများအတွက်ဖြစ်သည့် 'မျိုးသုဉ်းမည့်အလားအလာရှိ မျိုးစိတ်များအားကာကွယ်ခြင်း' အထပ်သို့ ပြောင်းလိုက်ရသည်။ အတန်းများကို အားလပ်ရက်တုန်းက ပြန်လည်မွမ်းမံထားသည်မှာ သူတို့၏အရင်ပတ်ဝန်းကျင်မှ ခြေလှမ်းတစ်လှမ်းတိုးတက်မှုဖြစ်သည်။

အတန်းပိုင်မှာ နောက်တံခါးဘက်မှ ပြတင်းပေါက်ကနေ ချောင်းကြည့်တိုင်း အရှေ့က ဂြိုလ်ကောင်လေးများကို ခပ်တိုးတိုး ချောင်းဟန့်ပြီး သတိပေးမည့် တစ်စုံတစ်ယောက်မရှိတော့ပေ။ ကျင့်သားမရဖြစ်နေ၍ ရွှီရှီးလင်မှာ သတိလက်လွတ်ဖြစ်ကာ တစ်နေ့တွင် အတန်းပိုင်မှာ သူ စာရွက်အပိုင်းကမ်းပေးနေတာနှင့် ဖုန်းဆော့နေတာကို ၂ကြိမ်တိတိမိသွားခဲ့သည်။ သူ့ခမျာ ဖုန်းသိမ်းခံရလုနီးပါးဖြစ်သွားသည်။