نساء من عالمي

الحلقه الخامسه

كمت اسوي نفسي نايمه وكت مايجي لحد مابيوم نصدمت صدمة عمري
-( عصام يتكلم بالموبايل) اني احبج. ورايدج من صدك بس تدرين ضروفي

- لا هي محاسه بشي من تخابريني اطلع بره بس انتي هم اعرفي اوقات تواجدي بالبيت هم ماريدها تحس

لالا حتى من ارجع بالليل  هي نايمه

ماشي حروح هسه خاف تنتبه تره طولت 

اني متحملت اسكت كعدت
هاي ويا منو جنت تحجي عصام

شكعدج انتي

- ويامن تحجي عصام

- صديقي

- لا انت جنت تحجي وي بنيه منو هاي

- انتي تجسسين عليه

- مداتجسس مااجاني نوم بقيت كاعده وانت حضرتك ماخذ راحتك  تخابر

- انتي كذابه بقيتي كاعده متقصده تجسسين

- هسه عوفك من هاي كلي منو هذي الي جنت تخابرها

- وانتي شعليج

- شنو شعليه اني مرتك

- وشنو تتحكمين بيه لمنو اخابر مااخابر

- ليش تسميها اتحكم انت زوجي ومن حقي اخاف عليك ومااقبل

- انتي رجال عمي هنا صايرتلي انتي ملاحضه ع نفسج شكد صايره تتحكمين

- مدااتحكم انت تصرفاتك صايره متنقبل

- شلون بله فهميني

- سهرات لتالي الليل ومخابرات ونسران وشرب وتريدني مااحجي

- والله هذا العندي ميعجبج شوفي كم حايط يمج بلي يعجبج طخي راسج بي لااخاف منج ولا من عشيرتج تفتهمين لو لا

- هذا الكلام الي عصام

-( بصياح) ايييييييييي الج

- عصام شبيك ليش هيج متغير

- انتي لي شبيج ليل نهار لوك لوك لوك تقارنين نفسج بالنسوان حاسبه روحج مره انتي
هم مقتنعه بروحج مره حالج حال النسوان

-( من كلي هيج نشفت الدمعه بعيني نصدمت واحس جسمي ثلج)  هذا شدايحجي اريد تطلع مني الكلمه ماكو

-( اشرت ع روحي)  اني مو مره عصام

- ااااايي مو مره حاسبيج عليه مره وتحاسبيني

- ليش مو مره لان مو مثل الك ***** الي تخابرهم بنصاص اللياليييييييي

- سدي حلكج اشرف منج ومن امج

- لتجيب طاري امي ع لسانك امي تشرف راس شكو وحده تعرفها

- رد عليه بكف وراها كف ثاني وضربني وعاط بيه برررررررره اطلعييييييييي ماريد اشوف وجهج

-  طلعت بره كوه امشي جسمي يوجعني كعدت ع قنفه وابجي وجسمي شعله مال نار اثر ضرب والقهر بقيت الليل كله ابجي واعد الدقايق الي يطلع الفجريه واروح مو ليله عبالك سنه