نساء من عالمي

الحلقه الثالثه والاربعون

غار ان يغرم احد بعينيك ولايعلم انها لي
ـــــــــــــــــــــــــــــــــــــــــــــــــــــــــــــــ
مروه:- كعدت من النوم جفن عيني ثكيل كوه فتحت عيوني باوعت لروحي بالمرايه مورمات جفوني وردي لونهن طلعت لكيت لبوه على المغذي ونايمه ونغم يمها

- شكو شبيها لبوه

- ماعرف اشو سمعتها كالت هاهيه وياك وسدته للتليفون عبالك صاير بينهم شي

- يجوز

- شبيها عيونج ليش هيج مورمات

- ماعرف شسويلها هسه

- طلعي ثلج وخلي على عيونج سوي كمادات بارده

- رحت طلعت ثلج وكعدت اسوي حسيت شويه احسن
جريت نفس واني على كعدتي راجيه راسي على القنفه وجهي على السكف همست
- تدرين احنه شنو مشكلتنه

- شنو

- حبينه
ومن كل گلبنه ومامتوقعين ننصدم نشيل الصدمات من بالنه لحد مانوكع هالوكعه

- الزلم ميستاهلون الحب

- مو الزلم نغم الذكور الرجال صدك يستاهل تخلي بعيونج

- ماعتقد ضلوو

- ايييييييي تعرفين شكد حبيته لمسلم
اااااخ ياكلبي شكثر حبه

- مااتصل بيج ابد

- لا عافني هاهيه بعد

- هذا مجان يحبج

- عرفت بس بعديش بعد ماخسرت كلشي

- خو ماصار بينكم شي

- (عدلت كعدتي وكعدت) ليش برأيج الوحده الا تخسر عذريتها يله تنقهر وتعتبر خسرت

- بس يعني كسرة عين هاي

- نغم اني احترام لنفسي مابقيت اني مااكدر اكعد واحجي بكل ثقه وانتقد ضاهره مو حلوه لان اني هم غلط وبسببه سويت هواي اغلاط
بسببه كذبت على امي
بسببه طلعت وتجردت من تربيتي واخلاقي
سلمتله نفسي كم مره ولما راد ياخذني خلص جنت اكول بس حدك لهنا برأيج بقيت احترام لنفسي بقيت انسانه نظيفه الي حيتزوجني باجر عكبه حيفرح من يشوفني بنيه بس هو هالشي صحيح؟

- لا

- لعد خلص
تعرفين اني بشنو حاسه نغم

- بشنو

- اني بكلبي مضروبه لان اني وسخه ومياه الدنيا كلها ماتنضفني ولاتطهرني

- لهيج تحجين على نفسج

- لا احجي احجي واكول هم لان هذه الحقيقه اني المشيت وره عواطفي وصدكته حلف يتزوجني وصدكته اني استاهل كل الي صارلي

- خلص بعد الي صار صار

- مداكدر اسامح نفسي ابد

- حقج.