نساء من عالمي

الحلقه الثاني والثلاثون

ثم ان لك في قلبي موطنا مباح لك الاحتلال في اي وقت
ـــــــــــــــــــــــــــــــــــــــــــــــــــــــــــــــ
لبوه:_ مديت ايدي على يدة الباب ارجف واردد البسمله
فتحتها بصعوبه وبطئ اباوع للخارج وبهذه للحظات الف فكره اجت براسي شلون اضربه وشلون اخلص نفسي اصرخ لو لا
باوعت ماكو شي
مديت راسي اكثر التفتت جانت بزونه ( قطه) هي كمزت لان جانت محصوره تريد تطلع واني صرخت وسديت الباب وخفت كلش بس حمدت الله مو احد
زين هاي شلون فاتت البزونه منين عزه خاف مو بزونه
يكولون البزون حيوان منسوخ من الممكن يتشبه بيه الجن
ياربي شلون وين اروح شسوي عزه نوبه نحصرت بالغرفه
صرت ارجف ونوب طفت الكهرباء لاخرطت من الخوف
عليمن اخابر شسوي شلون
كلبت بالجهاز كلبت داتصل على فراس بطلت
واتصلت على عبد الرحمن
خطيه ردلي بصوت ناعس غافي جان

- اممممم منو

- اني لبوه عبود

- استعدل شويه صوته كال لبوه
شبيج خو مابيج شي

- عبود اعتذر خابرتك هيج وقت بس والله خايفه

- جاوب مذعور:-ليش انتي وين بيش الساعه

- على كيفك على كيفك
اني بالبيت بس وحدي وخايفه وتفززت من بزونه والله خرطت من خوفي

- نغم وين راحت

- نغم بيت اهلها
عبود بزونه محصوره بالصاله شلون اطلعها اني حتى دااخاف اطلع بره

- لج هي بزونه شكو تخافين

- يكولون البزون حيوان منسوخ خاف جني

- هههههههههههههههههههههه ضحك بصوت عالي
اي وراح يطلعلج ويخوفج

- عفيه لتخوفني اكثر

- بله لو جني شداينتظر مثلا ياخذ اذن منج ويدخل للغرفه

- شمدريني هسه شسوي

- لتسوين شي نامي

- مداكدر خايفه

- تهي بهي عود اسمها لبوه

- بلا تصنيفات شسوي هسه

- لبوه نامي وخلي الخط مفتوح علمود اذا يطلعلج شي اعرف

- ها
اخلي مفتوح

- اي شبيج تفاجأتي

- اوك ماشي
مددت وتغطيت وخليت الخط مفتوح لفيت روحي باللحاف واخاف اكلع رجلي خاف يسحبني الجني من رجلي وراسي مااطلعه خاف يجرني من شعري
ومتت حر عركت بس اخاف اطلع وجهي
احاجي لعبود بصوت ناصي

وهو هم صار يهمس بصوت ناصي
لبوه حتختنكين ولج

- اششششش عبود اسكت

- سكت

- سكتنه يجي خمس دقايق رجعت حجيت
عبود خاف اغفى ويطبلي