After the Sorrow 2 ✓

Kabanata 24

Gail's Point of View

PABAGSAK akong umupo sa sofa.

Attending seminars 6 days in a row were somehow tiring.

Galing ako sa seminar tungkol sa family planning, responsible parenthood at premarital counseling. Hinatid lang ako ni Jetty pauwi rito sa bahay at umalis siya kaagad dahil susunduin niya pa si Mommy Crystal.

“Mommy?!” pasigaw kong tawag.

Umalingawngaw ang boses ko rito sa sala.

“Mom!”

Nakita ko siya na tumatakbong lumabas galing sa kusina. May hawak siyang sandok at naka-apron pa.

Humawak siya sa kaniyang dibdib. “Nandito ka na pala. Bakit? Anong problema? Ba't ka sumigaw? May nangyari ba?” sunod-sunod niyang tanong.

“Wala po, ‘mmy. Gusto kong manghiram ng cellphone mo.”

“Akala ko kung ano na. Makasigaw ka riyan. Kunin mo sa kuwarto namin ng Dad mo. Naroon sa mesa malapit sa kama.” Lumakad siya papunta sa Tv. “Siya nga pala. Kumusta ang seminar niyo? Panghuli niyo ng seminar ngayon, 'di ba?” May tinanggal siyang plug.

“Ayos lang po. Nakakapagod siya sa totoo lang po. Seminar dito. Seminar doon.”

“Ganiyan talaga.” Humarap siya sa akin. “Kumain ka na ba?”

Tumayo ako. “Hindi pa po. Nauuhaw ako at gusto kong kumain at uminom ng malamig. Deserve kong umorder ng maraming milkshake, ice cream, mga gano'n.”

“Walang load ang phone."

“Weeh? Hindi nga? Kailan ka pa naubusan ng load?”

Lumakad siya papunta sa pintuan ng kusina. “Hindi na ako nagpapa-load simula nang nandito na ang Daddy mo.”

Pasalampak akong umupo muli. “Itapon mo na iyang phone, Mom. No use naman iyan eh.” Humiga ako. “Nasaan nga pala si Daddy?”

“Playing golf with Ricardo.” sagot niya at pumasok sa kusina.

Ipinatong ko ang aking mga paa sa armrest. Half day lang ang seminar ngayon. Ngayon ko naisip na ang hirap magpakasal. Sa totoo lang, kung hindi dahil sa tulong ng mga magulang namin ay siguro hindi ko kayanin na asikasuhin ang kasalang ito na kami lang dalawa ni Jetty.

Bumangon ako nang marinig kong biglang bumukas ang pinto. Kaagad nagsalubong ang aking kilay dahil sa pagtataka nang makitang si Jetty ang pumasok.

“Akala ko umuwi ka na? Ba't nandito ka?” tanong ko.

“Bigla akong tinawagan ni Mommy. Ang sabi ay may prenup photoshoot daw tayo.” Umupo siya sa pang-isahang upuan.

“Ngayon na? Katatapos lang natin sa seminar ah.” Humiga akong muli. “Puwede bukas na lang?”

“Ngayon daw ang schedule natin. Marami pa raw clients ang photographer at makeup artist. Kaya hindi puwede bukas. Ngayon na.”

“Mamaya na. Ayos lang ba? Hindi pa ako kumain ng tanghalian.”

Kinuha niya ang kaniyang cellphone sa bulsa ng suot niyang pantalon. “12:23 pm. Kapag ala-una na ay aalis tayo.” aniya habang nakatingin sa kaniyang phone. “Anyway, humingi ako ng phone number ng kaibigan mo sa pinsan niya siguro iyon. Iyong lalaking pumunta sa shop natin noon.”

“Kailan ka humingi, Jetty? Binigyan ka ba? Kailan kayo nagkikita ni Rickey?”

“Nakaraang araw. Nagkikita kami sa gasoline station. Tarantado iyon, Gaily. Ang dami pang pilitan na nangyari bago ibinigay ang phone number. Akala mo naman gold.”