ဗီလိန်ဖြစ်ရန် ကြမ္မာဖန် [Book 2]

(၂၀၃) နေရာတကာမှာ ရှိနေနိုင်တဲ့ ဇာတ်လိုက်

Burmese Translation of "Doomed to be Cannon Fodder".

Translator - NC

(၂၀၃) နေရာတကာမှာ ရှိနေနိုင်တဲ့ ဇာတ်လိုက်မ

'ကောင်းရောပဲ၊ နောက်ဆုံးတော့ ငါ့ခေတ်ကို ပြန်လို့ရတော့မှာလား...! လုံဟန့်၊ ကျွန်မတို့သားလေးကို ကောင်းကောင်းစောင့်ရှောက်ပေးရမယ်နော်၊ အပူသည်ကြီးဖြစ်ပြီး စိတ်လေမသွားနဲ့... အဲ့သလိုဆို ကျွန်မ ရှင့်ကို ခွင့်မလွှတ်တော့ဘူး' သူမ အတွေးထဲမှာ နောက်ဆုံးနှုတ်ဆက်စကားမျိုး ရေရွတ်တွေးတောပြီးတဲ့နောက်မှာ မျက်လုံးတွေသာ မှိတ်ထားလိုက်ချင်တော့တယ်။ ဒါပေမဲ့ ဘာကြောင့်မှန်း မသိ၊ အဲ့ဒီမျက်ခွက်ကြီးရှေ့မှာ အရှုံးပေးလိုက်တဲ့ ပုံစံမျိုး မပြချင်ဘူး။ ဒါကြောင့်မို့ မျက်တောင်တောင် မခတ်တော့ဘဲ သူ့ကို ပြူးကြည့်နေလိုက်တော့တယ်။ သူမရဲ့ နှုတ်ခမ်းစွန်းတွေကလဲ လှောင်ပြုံးအဖြစ် တဖြည်းဖြည်းချင်း ကော့တက်လာလေတယ်။

"မင်း... မကြောက်ဘူးလား"

"ကြောက်တာပေါ့၊ ဘာလို့ မကြောက်ဘဲ နေရမှာလဲ"

ကိုယ် ကြောက်တဲ့အကြောင်း​ ဝန်ခံပြောတာတောင် အကြောက်တရားမရှိပုံ ပေါက်တဲ့လူမျိုးကို အမိန့်ပေး စစ်သူကြီး တစ်ခါမှ မတွေ့ဖူးဘူး။ သူ သိပ်ပြီး အံ့သြသွားမိတော့တယ်။ သူ ရယ်လေတယ်။ "မင်း တကယ်ကြောက်တာရော ဟုတ်ရဲ့လား၊ ကျုပ်တော့ မင်းကို ကြောက်အောင် လုပ်နိုင်တယ် မထင်ဘူး၊ ကြောက်စရာကောင်းတယ်ဆိုတာ... ဘယ်လိုမျိုးလဲ မင်း သိရအောင်လို့ ပြကြည့်မယ်လေ ဘယ်လိုလဲ"

"မလိုပါဘူး၊ ဘာလို့ အချိန်ဖြုန်းနေမလဲ၊ ရှင် သိချင်လောက်တဲ့ လျို့ဝှက်ချက်မျိုး ကျွန်မလဲ ဘာမှ သိထားတာမဟုတ်ဘူး၊ ရှင်တို့ စစ်ရေးအကြံပေးအတွက် ကျွန်မကို ကလဲ့စားချေတဲ့အနေနဲ့ သတ်ရင် သတ်ပစ်လိုက်တော့လေ"

"ကျုပ်က ဘာလို့ သူ့အတွက် လက်တုံ့ပြန်ပေးရမှာလဲ၊ မင်းက သိပ်လှနေတာကို... အလှလေးဆိုတာက သေသွားတဲ့လူထက် ပိုအသုံးဝင်တယ် မဟုတ်လား၊ မြူဆွယ်ပြီး လှည့်ဖျားပေးတဲ့ လူအနေနဲ့ သုံးလို့ကောင်းမှာပဲ" သူ ပိုင်ရှန်းရှို့ မေးဖျားကနေ ဆွဲမော့လိုက်တယ်။ သူမ ပုံစံက ဖရိုဖရဲဖြစ်နေပေမဲ့ သူမ အလှက ရင်သပ်ရှုမောဖွယ်ဖြစ်နေတုန်းပဲ။ ပုထုဇဉ်သာဖြစ်နေတဲ့ ဘယ်ယောက်ျားမဆို သူမဆီက အကြည့်တောင် လွှဲနိုင်မှာ မဟုတ်ဘူး။ ဒီလောက်လှတဲ့ မိန်းကလေးမျိုးကို ဘယ်သူက ဒီလောက် အန္တရာယ်များတဲ့ အလှဗန်းပြ သူလျိုလုပ်ခိုင်းရက်မှာလဲ။