ဗီလိန်ဖြစ်ရန် ကြမ္မာဖန် [Book 2]

(၂၀၇) လင်မယား နောက်ဆုံးတော့ ပြန်တွေ့ပြီ

Burmese Translation of "Doomed to be Cannon Fodder".

Translator - NC

(၂၀၇) လင်မယား နောက်ဆုံးတော့ ပြန်တွေ့ပြီ

သူတို့တွေအားလုံးက လုံဟန့်ရဲ့ သစ္စာခံနောက်လိုက်ငယ်သားတွေ။ တစ်ယောက်ချင်းစီတိုင်းက ထက်မြက် အစွမ်းရှိသူတွေချည်းပဲ။ လုံဟန့် လှိုဏ်ခေါင်းထဲကနေ ဘယ်သူ့ကို ပွေ့ချီလာတယ်ဆိုတာ မမြင်လိုက်ရပေမဲ့ ချက်ချင်း တစ်ကိုယ်လုံးလုံအောင် ဖုံးလိုက်ပုံအရ အမျိုးသမီးတစ်ယောက်ဖြစ်မယ်ဆိုတာတော့ သိလိုက်ကြတယ်။ ပြီးတော့ မင်းသား လွတ်ကျန်ခဲ့တဲ့ တစ်နေရာရှိတယ်လေ။ ပိုင်ရှန်းရှို့ရဲ့ ဖဝါးနုနုလေးက ဝတ်ရုံခြုံလွှာအောက်ကနေ ထွက်နေတာ။

သူတို့ မျက်နှာထား တစ်ခုခု လွဲမှားနေတာကို လုံဟန့်သတိထားမိလိုက်တာနဲ့ ချက်ချင်း ငုံ့ကြည့်လိုက်မိတယ်။ သူ ခဏရပ်လိုက်ပြီး သူမကို လုံအောင် ပြန်ထုပ်လိုက်လေတယ်။ ပြီးတော့မှ ဘာစကားတစ်ခွန်းမှ ပြောမနေတော့ဘဲ သူ့အိပ်ဆောင်ကိုသာ ပြေးသွားလိုက်တယ်။ တံခါးဝမှာ ရှုအာနဲ့ သူ့အနီးကပ်ကိုယ်ရံတော်က ခရီးဦးကြိုပြုပြီး သူ့အထုပ်ကို ကူသယ်ပေးဖို့ လုပ်သေး။ ဒါပေမဲ့ လုံဟန့်က အသယ်မခံဘူး။ "ငါ့ကို ရေနွေးတစ်စည်ပိုင်းနဲ့ ဒဏ်ရာအတွက် ဆေးတွေ သွားယူလာပေး"

သူက နောက်လိုက်ကိုယ်ရံတော်ဘက်ကို လှည့်ပြီး ပြောလိုက်တယ်။ "မင်းကတော့ သွားတော့၊ ရှုအာ မင်း မဝတ်ရသေးတဲ့ ဝတ်စုံအပိုအသစ်ရှိရင် ယူလာပေး" သူ့အဝတ်အစားတွေက ပိုင်ရှန်းရှို့အတွက် အရမ်းကြီး ကြီးနေတော့၊ လျှောကျ ချောင်ကျတာတွေ ဖြစ်နေမှာ။ ရှုအာရဲ့ အဝတ်အစားလောက်ဆို ပိုတော်လောက်မယ်။

ရှုအာလဲ သူ့သခင်ရဲ့ ခိုင်းစေချက်ကို ထူးဆန်းတယ်ထင်တာပေါ့၊ ဒါပေမဲ့ အမိန့်ကို မသွေမတိမ်းနားထောင်လိုက်တယ်။ ဒါပေမဲ့လဲ သူ ပြန်လာတဲ့အခါမှာ သခင်က သူ့ကို အပြင်မှာပဲ နေခိုင်းတယ်လေ။ အဲ့ဒီ့လူကို မင်းသားကိုယ်တိုင် ရေချိုးသန့်စင်ပေးပြီး အဝတ်အစားလဲပေးမှာလား။ ဒါက မင်းသားတစ်ပါးအတွက် မနိမ့်ကျလွန်းဘူးလား။ လုံဟန့်ရဲ့ အကြည့်စူးစူးကို တွေ့ပြီးတဲ့အခါမှာ သူ ဘာမှ ဆက်မမေးရဲတော့ဘူး။ သူ့ဘေးနားမှာ တုံဏိဘာဝေလာရပ်နေတဲ့ ယွီခွမ်းဆီကလဲ ဘာမှ မသိရဘူးလေ။ ရှုအာ စိတ်ထဲ အဲ့ဒီလူ ဘယ်သူလဲ ခန့်မှန်းမိတာ ရှိပေမဲ့ ချက်ချင်း အဲ့အတွေးကို ပယ်ချလိုက်မိတယ်။ ဒါက ဖြစ်နိုင်ချေ သိပ်ဝေးလွန်းတယ်လေ။