ဗီလိန်ဖြစ်ရန် ကြမ္မာဖန် [Book 2]

(၂၁၅) ပြစ်ဒဏ်ကို မျှဝေခံစား

Burmese Translation of "Doomed to be Cannon Fodder".

Translator - NC

(၂၁၅) ပြစ်ဒဏ်ကို မျှဝေခံစား

သိုင်းလောကနဲ့ နန်းတွင်း ရုံးတော်ဆိုတာက ဘယ်တုန်းကမှ သင့်သင့်မြတ်မြတ် မရှိခဲ့ဘူး။ အဖွဲ့အစည်းနှစ်ခုက အမြဲ ပွတ်တိုက်နေကြတာ၊ ဒါကြောင့်မို့ ဝူလင်မဟာမိတ်ခေါင်းဆောင်က ရုံးတော်အစိုးရဘက်ကို လာကူညီတယ်ဆိုတဲ့ ကိစ္စက အထူးဖြစ်ရပ်ကြီးလိုပဲ။ လုံဟန့်က တကယ်ကို အစွမ်းအစရှိသူပေါ့။ မင်းသားရုန် ခေါင်းညိတ်နေမိလိုက်တယ်။ ဒီယောက်ျားသုံးယောက်က ကြိမ်ဒဏ်တစ်ရာကို မျှခံမယ်ဆိုရင်တော့ အတော်လေး သက်သာသွားမှာပဲ။

"မလိုတော့ဘူး၊ ဒီကိစ္စက မင်းတို့နှစ်ယောက်နဲ့လဲ ဆိုင်နေတာမှ မဟုတ်တာ" လုံဟန့်က သူတို့ရဲ့ အကူအညီကို မလိုလားဘူး။ အဓိကက သူတို့နှစ်ယောက်ဟာ သူ့မိန်းမကို တပ်မက်နေတဲ့ ယောက်ျားတွေ ဖြစ်နေလို့ပဲ။

"ကျွန်တော့်မှာလဲ အပြစ်ရှိပါတယ်၊ ရှို့သခင်မကို ဒီနေရာအထိ လိုက်ပို့ပေးခဲ့တာ ကျွန်တော်ပါ... ကျွန်တော့်မှာ အပြစ်ရှိပါတယ်" ပြစ်ဒဏ်စီရင်နေတုန်း ကြားထဲ တစ်ချိန်ချိန်မှာ အားချွမ် ရောက်လာခဲ့ပုံပဲ။ အခုတော့ သူ ရှေ့ထွက်လာပြီး ဒူးတုပ်ထိုင်နေတယ်။ သူ့ရဲဘော်ရဲဘက်တွေကလဲ သူတို့ပါ ရှိကြောင်း ပြသတဲ့အနေနဲ့ ဒူးထောက်ချလိုက်ကြတယ်။ သူတို့က အတူတိုက်ပွဲဝင်ပြီး အခက်အခဲတွေ အတူ ကျော်ဖြတ်လာတဲ့ ခင်မင်မှုတွေနဲ့ နှောင်ကြိုးဖွဲ့ထားတာ။ ပိုင်ရှန်းရှို့က သူတို့ခေါင်းဆောင်ကတော်ကို ကယ်ခဲ့ဖူးတယ်။ သူတို့အိုးအိမ်တည်ရှိရာ ရှုခရိုင်ကို ကူညီ ကာကွယ်ပေးခဲ့တယ်။ ဒီတော့ တဒုန်းဒုန်းနဲ့ သွေးပူနေကြတဲ့ ယောက်ျားရင့်မာကြီးတွေဟာ ပြိုင်တူ ဒူးထောက်ချလိုက်ကြလေရဲ့။

". . ." ဒီလူတွေ ဘာတွေ ဖြစ်နေကြတာလဲ။ ဘာလို့ တန်းစီ အရိုက်ခံချင်နေကြတာလဲ။ ပိုင်ရှန်းရှို့ စိတ်ထဲ အတွေးပေါင်းစုံနဲ့ ပြည့်နှက်နေပေမဲ့ အပြင်ပန်းမှာတော့ အပြုံးမပျက်ဆက်နေလိုက်တယ်။ သူမလဲပဲ သူတို့အတိုင်း လိုက်ပြီး ဒူးထောက်နေလိုက်တယ်။ သူမက ဒူးထောက်ရတာတွေ၊ တခြားအရိုအသေအကြီးငယ်ပေးရတဲ့ ဓလေ့တွေကို အမြဲတမ်း မနှစ်မြို့ခဲ့ပေမဲ့ ဒီနေ့ကတော့ မတူဘူး။ ဒီနေ့ အတူတူ ဒူးထောက်ရတဲ့ကိစ္စမှာတော့ မြင့်မြတ်တဲ့ သဘော၊ ကျက်သရေရှိတဲ့ သဘောပါဝင်နေတယ်။ သူမ လုံဟန့်ကို တစ်ချက်လှမ်းကြည့်လိုက်တော့ သူ့နှုတ်ခမ်းထောင့်မှာ အပြုံးယဲ့ယဲ့ကလေးတောင် ရှိနေလိုက်သေး။