ဗီလိန်ဖြစ်ရန် ကြမ္မာဖန် [Book 2]

(၁၉၆) မြင်းတွဲဗျူဟာ

Burmese Translation of "Doomed to be Cannon Fodder".

Translator - ဂွေ့

(၁၉၆) မြင်းတွဲဗျူဟာ

လုံး၀ကိုစိတ်ပိုင်းဖြတ်ထားတဲ့ပုံစံနဲ့ပိုင်ရှန်းရှို့ကို စုန့်ကျောင်းယွဲ့အထင်ကြီးသွားမိတယ်။ ဒါပေမယ့်လည်း သူမကို သတိပေးလိုက်မိတာပါပဲ။
"နင်ကျင်းမြို့ထဲကို မင်း၀င်လို့မရမှာ ကိုယ်စိုးမိတယ်။ အကယ်၍ ရခဲ့ရင်တောင် လုံဟန့်နဲ့ဆက်သွယ်ဖို့က ခက်လိမ့်မယ်။ အဲ့ဒီတော့....."

"ကျွန်မဒီမှာပဲ ငုတ်တုပ်ထိုင်ပြီးတော့ စောင့်မနေနိုင်ဘူး။ ဘာတွေဖြစ်နေလဲဆိုတာ ကျွန်မမျက်စိနဲ့ တပ်အပ်မြင်ရမှကိုဖြစ်မယ်။ ဘယ်လိုပဲဖြစ်ဖြစ်" ပိုင်ရှန်းရှို့က လုံး၀ကိုစိတ်ပိုင်းဖြတ်ထားတဲ့ပုံနဲ့ လုံဟန့်ကို ပြန်ကြည့်လိုက်တယ်။

စုန့်ကျောင်းယွဲ့အံကိုကြိတ်ထားမိတာပဲ။ ပိုင်ရှန်းရှို့ကို နားချလို့မရဘူးလေ။ ရွေးချယ်စရာမရှိတော့တဲ့အဆုံး သူမကိုသွားခွင့်ပြုဖို့ပဲကျန်တော့တာ။
"ဒါဆိုလည်းမင်း နင်ကျင်းကိုသွားလို့ရတယ်။ ဒါပေမယ့် ကိုယ်ကတော့လိုက်ခဲ့ရမှာပဲ။ ပြီးတော့နောက်ထပ်မိန်းကလေးတစ်ယောက်ကိုလည်းခေါ်သွားရမယ်"

သူဒီလောက်စဥ္းစားတတ်လိမ့်မယ်လို့ ပိုင်ရှန်းရှို့တွေးမထားမိဘူး။ သူမချက်ချင်းပဲခေါင်းကိုငြိမ့်ပြပြီးပြောလိုက်တယ်။
"ရတယ်"

"သွားဖို့ကအရမ်းလည်းအလျင်မလိုသေးဘူး။ မနက်ဖြန်မနက်ကျမှ အရင်နည်းအတိုင်းပဲသုံးပြီး အိမ်တော်အပြင်ကိုထွက်ခဲ့ပေါ့။ အပြင်ကစောင့်နေလိုက်မယ်"
စုန့်ကျောင်းယွဲ့ပြောပြောဆိုဆိုပဲ လုံလင်း လေးကိုလှမ်းကြည့်လိုက်မိတယ်။ ကလေးလေးက ပိုင်ရှန်းရှို့နဲ့သိပ်ကိုတူတာ။ သူ့မျက်လုံးတောင်မခွာမိဘူး။

သူဘာကိုပြောချင်လဲဆိုတာ ပိုင်ရှန်းရှို့နားလည်တယ်။ သူက သူမရဲ့သားလုပ်သူနဲ့ အချိန်ပိုပြီးဖြုန်းလို့ရအောင်လုပ်ပေးတာ။ သူမသားလေးမျက်နှာကိုကြည့်လိုက်တော့ စိတ်ထဲငြိမ်းချမ်းသွားရတယ်။ အဲဒါကြောင့်ခေါင်းငြိမ့်ပြလိုက်တာပေါ့။
"ဒါဆိုလည်း မနက်ဖြန်မနက်မှထွက်ကြတာပေါ့။ ယွီခွမ်း ရှင်လည်းအဆင်ပြေတယ်မလား?"