ဗီလိန်ဖြစ်ရန် ကြမ္မာဖန် [Book 2]

(၂၀၅) ဆန်ကုန်မြေလေး၊ ဘယ်နေရာမှ အသုံးမကျ

Burmese Translation of "Doomed to be Cannon Fodder".

Translator - NC

(၂၀၅) ဆန်ကုန်မြေလေး၊ ဘယ်နေရာမှ အသုံးမကျ

လင်ချန်းဇီ ဘဝတစ်သက်တာလုံးမှာ ဒီလို ပြစ်ပြစ်နှစ်နှစ် ခါးတူး စပ်ပြဲနေအောင် အပြောခံရတာမျိုး မရှိခဲ့ဘူး။ ဒီလို ခေါင်းပေါ်ကနေ ရေခဲရေလောင်းချခံလိုက်ရတာမျိုး ကြုံရတဲ့အခါမှာ သူမ အဲ့နေရာမှာ အဲ့အတိုင်းကြီး ကြောင်ရပ်နိုင်ပြီး သူမဦးနှောက်လေးနဲ့ တတ်နိုင်သမျှ နားလည်နိုင်ဖို့ ကြိုးစားရှာတော့တယ်။ ဒါပေမဲ့ ပိုင်ရှန်းရှို့ကတော့ စိတ်ထဲ မျိုသိပ်ထားသမျှကို ပွင့်အန်ထုတ်ပစ်လိုက်ပြီ။ လက်ထဲပိုက်ထားတဲ့ ကလေးကို ရှေ့ထုတ်လိုက်ပြီး ပြောလိုက်တယ်။ "ရော့ နင့်ကလေး"

"မဟုတ်ဘူး၊ ဒါ ငါ့ကလေးမဟုတ်ဘူး၊ ငါ့ကလေးက လိမ္မာပြီး သိတတ်တယ်၊ ငါ့ကလေးလေးက တစ်ခါတစ်ခါ ငိုတယ်၊ တစ်ချက်တစ်ချက် တခစ်ခစ် တဂူးဂူးရယ်တယ်... ဒါ သူ မဟုတ်ဘူး၊ ငါ့ကလေး မဟုတ်ဘူး" သူ လက်ကို ဆန့်ထုတ်ပြီး ပိုင်ရှန်းရှို့လက်ကို အားကြီးနဲ့ တွန်းထုတ်လိုက်တာ၊ သူ့အားက ပြင်းလွန်းလို့ ပိုင်ရှန်းရှို့လဲ မှန်းမထားလိုက်နိုင်ဘူး၊ ကလေးလေးက လက်ထဲကနေ ပြုတ်ကျသွားတော့တယ်။ တော်သေးတာက၊ ပိုင်ရှန်းရှို့ ထပ်ဖမ်းမိလိုက်လို့ပဲ။ မဟုတ်ရင် ကလေးက မြေကြီးပေါ်မှာ ဖုန်တွေ ပေးကုန်ပြန်ဦးမှာ။

လုစစ်သူကြီးရဲ့ စိတ်ရှည်သည်းခံမှုတွေလဲ ကုန်ခမ်းသွားပြီ။ "သူတို့ နှစ်ယောက်လုံး ဖမ်းထားလိုက်တော့...!" ပြီးတာနဲ့ သူ ပိုင်ရှန်းရှို့ ပွေ့ထားတဲ့ ကလေးအလောင်းကို ကြည့်လိုက်ရင်းဆိုတယ်။ "သူ့ကို သေချာမြုပ်နှံပေးလိုက်"

ရဲမက်တစ်ယောက်က ပိုင်ရှန်းရှို့လက်ထဲက ကလေးရုပ်ကြွင်းကို လာယူသွားတယ်။ သူမလဲ သက်ပြင်းရှည်တစ်ချက်ချပြီး စိတ်မပါ့တပါ လက်လွှဲပေးလိုက်ရတာပေါ့။ ပြီးတဲ့နောက် သူမ လုစစ်သူကြီးကိုလဲ မကြည့်ဘူး။ ထွက်ပြေးလို့ရမဲ့ အခွင့်အရေးလဲ ဆုံးရှုံးသွားရပြီ၊ ကလေးကိုလဲ မကယ်နိုင်ခဲ့ဘူး။ တစ်လောကလုံးမှာ အပိန်းဆုံးလူသားလို ခံစားနေမိပြီလေ။ အဆိုးဆုံးက၊ ဇာတ်လိုက်မနဲ့ အတူတူ တစ်ခန်းတည်းမှာ ထည့်ချုပ်ထားခံရတာပဲ။ ဇာတ်လိုက်မ အဆက်မပြတ် ပါးစပ်နဲ့ လေပေး နှိပ်စက်နေလို့ သူမမှာ အိပ်လို့တောင် မပျော်တော့ဘူး။