ဗီလိန်ဖြစ်ရန် ကြမ္မာဖန် [Book 2]

(၁၉၃) မင်းသားလေး မွေးလာ

Burmese Translation of "Doomed to be Cannon Fodder".

Translator - NC

(၁၉၃) မင်းသားလေး မွေးလာ

ပိုင်ရှန်းရှို့ ဗိုက်က အတော်လေး ဖောင်းကားလာတာမို့ နေ့စဉ် လှုပ်ရှား သွားလာဖို့ကိုတောင် အဆင်မပြေတော့ဘူး။ လောင်ဖူးရန်ကတော့ ပျော်လွန်းလို့ နေ့တိုင်း ရယ်ရယ်ပြုံးပြုံးဖြစ်နေတာ၊ နဖူးအရေတွန့်နေတာတွေတောင် ပျောက်ကုန်ပြီ။ မကြာခဏဆိုသလို သူမ ပိုင်ရှန်းရှို့ဆီ သွားရတာအမော၊ သူမရဲ့ မမွေးလာသေးတဲ့ မြေဦးလေးကို သွားတွေ့တာတဲ့လေ။ ခဏခဏ လာလွန်းလို့ ပိုင်ရှန်းရှို့တောင် စိတ်ပူနေမိပြီ။

ဒီလိုအခြေအနေမျိုးမှာ အိမ်တော်ကြီးတစ်ခုရဲ့ လောင်ဖူးရန်တစ်ယောက်အနေနဲ့ သားရဲ့ ကိုယ်လုပ်တော်ဆီကို ကိုယ်တိုင်ကြွပြီး လာတွေ့တယ်ဆိုတာ မသင့်တော်ဘူးလေ။ ဒါပေမဲ့ လောင်ဖူးရန်က မြေးရူးရူးနေတာ၊ ဘာမှ မမြင်နိုင်ရှာဘူး။ ပိုင်ရှန်းရှို့ကလဲ သူမကို မလာပါနဲ့တော့လို့ ပြောလို့မှ မရတာ။ ပြီးတော့ လောင်ဖူးရန်လဲ အသက်ရလာပြီ၊ သူမ ဘဝမှာ လိုလားတောင့်တပြီး ဆန္ဒရှိတဲ့အရာ၊ မျှော်လင့်တဲ့အရာလဲ မရှိသလောက်ဖြစ်နေပြီလေ။ 

'အင်း၊ သူ လာလည်ချင်လဲ လာပါစေတော့၊ ငါလဲ ပုန်းရှောင်နေစရာ အကြောင်းမှ မရှိတာ' လောင်ဖူးရန် ပြန်တာကို နှုတ်ဆက်ပြီးတော့ ပိုင်ရှန်းရှို့တစ်ယောက် ဗိုက်ကို သာသာလေး ပွတ်ရင်း ကျန်နေခဲ့တယ်။ 'ကလေးက အခုတလော အရမ်းရွစိထိုးနေတာ၊ ခဏခဏကို သူ ကန်နေတာ၊ တိုးနေတာတွေ ငါ ခံစားမိတယ်'

လုံဟန့်ကတော့ ကလေးက စစ်သူကြီးဇာတာပါတာတဲ့။ ကလေးကို သိုင်းပညာတွေ သင်ပေးမယ်တဲ့လေ။

'ဒင်းက ငါ့သားကို မမွေးလာခင်ကတည်းက နှိပ်စက်ဖို့ အစီအစဉ်တွေ ဆွဲနေတာ' ပိုင်ရှန်းရှို့ သက်ပြင်းတွေ ချမိတော့တယ်။ တစ်နေ့တစ်နေ့ သူမမှာ ပူပင်နောက်ဆံတင်းစရာ အသစ်သစ်တွေ ပေါ်နေတာ၊ ဘယ်လိုလုပ်ပြီး ဒါတွေကို ထားခဲ့နိုင်မှာလဲ။ သူမ ရင်သွေးလေးအတွက် ပူပင်ရတယ်။ သားလေးလား၊ သမီးလေးလား မသိရဘူးဆိုပေမဲ့ သူမ ကလေးကို သနားပိုမိနေတော့တာပဲ။ သူမကလေးက မွေးကင်းစနဲ့ကို အမိမဲ့ကလေးဖြစ်တော့မှာ၊ အနိုင်ကျင့်ခံနေရမလား မသိ။ မိထွေးက တွက်ချက်ဉာဏ်များတဲ့ စိတ်ပုတ်မဖြစ်နေရင် ဘယ်လိုလုပ်မလဲ။ ငယ်ငယ်လေးကတည်းက ဒုက္ခိတဖြစ်သွားအောင်လို့ ကလေးကို အဆိပ်ကျွေးထားရင်ရော၊ ဒါမှ မဟုတ် ကလေး ကြီးပြင်းနေတဲ့ အချိန်အတောအတွင်း သတ်ပစ်လိုက်ရင်ရော ဘယ်လိုလုပ်မလဲ။ ပြဿနာတွေ အများကြီး ရှိလာနိုင်တယ်လေ။