ဗီလိန်ဖြစ်ရန် ကြမ္မာဖန် [Book 2]

(၂၁၉) ယမ်းမှုန့် ဖန်တီးထုတ်လုပ်

Burmese Translation of "Doomed to be Cannon Fodder".

Translator - NC

(၂၁၉) ယမ်းမှုန့် ဖန်တီးထုတ်လုပ်

လုံဟန့် ကိုယ်လက်သန့်စင်ပြီးနောက်တော့ သူမနဲ့ ပွတ်သီးပွတ်သပ်နေချင်လာတယ်။ အခုတလောမှာ လင်ချန်းဇီကို ရွံနေရတာနဲ့ ဘာစိတ်ညာစိတ်တောင် မဖြစ်၊ ဘာမှ မဘာဖြစ်တာ ကြာပြီလေ။ ဒါပေမဲ့ အခုတော့ ပိုင်ရှန်းရှို့က သူ့အပေါ် အေးစက်နေတယ်။ သူမရဲ့ လက်ပွေ့အိတ်ကလေးကို ဖက်ရင်း အိပ်ပျော်ဖို့ ကြိုးစားနေတာ။ ဒါကို တွေ့တော့ လုံဟန့်လဲ သူမကို မနှောင့်ယှက်တော့ဘူး။ အိပ်ရာပေါ်လှဲချလိုက်ပြီး သူလဲပဲ အိပ်ပျော်နိုင်ဖို့ ကြိုးစားတော့တယ်။ အခုချိန်မှာ စစ်တိုက်တာ နိုင်ဖို့ကို ပိုဦးစားပေးရမယ်လေ။ အမှန်ဆို၊ သူ သံချပ်ကာတောင် ချွတ်မအိပ်သင့်ဘူး။ ဒါပေမဲ့ မနက်ဖြန်ကစပြီး စစ်စခန်းထဲ သွားအိပ်ရတော့မှာဆိုတော့ ဒီညတော့ သူမနဲ့ နီးနီးကပ်ကပ် ရှိနေချင်လို့ ချွတ်အိပ်လိုက်တော့တယ်။ သို့ပေမဲ့ တစ်ဖက်လူက သူ့အပေါ် အလိုက်မသိရှာဘူး။

ဟိုလိုအတွေးတွေ သူ့ခေါင်းထဲ ဝင်နေမှတော့ သူ ဘယ်လိုလုပ် အိပ်ပျော်နိုင်တော့မလဲ။ ပိုင်ရှန်းရှို့လဲ အိပ်မပျော်သေးတော့ သူမကို ချက်ချင်း ပက်လက်လှန်လိုက်ပြီး အပေါ်ကနေ အနမ်းမိုးတွေ ရွာချလိုက်တာပဲ။ ပိုင်ရှန်းရှို့ ကြောင်တောင်တောင်ဖြစ်နေလျက်ကပဲ အစားခံလိုက်ရရှာတာပေါ့။ ဒီလူ ဘာထဖောက်တာလဲ သူမ နားမလည်နိုင်ဘူး။ ကံဆိုးချင်တော့ အပြင်းအထန်တွေ လုပ်မိရင် အိပ်ရာထဲ သုံးရက်လောက် လဲသွားရတယ်ဆိုတဲ့ စည်းကမ်းချက်ကြီးကို ထည့်ထားလေတယ်။ လုံဟန့်ကလဲ သက်လုံကောင်းပြီး အားပါတော့ ပိုင်ရှန်းရှို့ သိပ်အကြာကြီး မခံဘူး၊ ​သတိပါလစ်ရော။ ပြောရရင်၊ သူမကလဲ နုနယ်အားနွဲ့တဲ့ အရံအမျိုးသမီးဇာတ်ကောင်ရဲ့ ကိုယ်မှာ လာဖြစ်နေတာကိုး။ ကံကောင်းတာက၊ သူမ မေ့မြောသွားပြီး အိပ်မက်ထဲမှာ ဟော်အာနဲ့ စကားပြောလို့ ရသွားတာပဲ။ ဟော်အာက လေထဲ လွင့်မြောနေတဲ့ အစိမ်းရောင်အခိုးအငွေ့လေးနဲ့ တူနေတယ်။

သူ့အသံကလဲ ရင့်ကျက်လာတာ။ လူပျိုပေါက်လေးအသံနဲ့ တူလာတယ်။ "သခင်မ...! သခင်မ...! ဟော်အာ သခင်မကို အရမ်း သတိရတာပဲ" ဟော်အာ ဝမ်းသာအားရ အော်လေတယ်။