အချစ်ဦး (Completed)

အပိုင်း (၁၉)

သူသည် အပေါ်မှထပ်၍ဝတ်ရမည်ဖြစ်သော ကုတ်ကိုမဝတ်ဖြစ်သေးပဲ လက်ထဲတွင်ကိုင်ဆောင်လျက်ရှိသည့် အတိုင်း အစည်းအဝေးခန်းထဲသို့ဝင်လာလိုက်သည်။

လူပေါင်း ၂၀လောက်ထိုင်နေသော ထိုစားပွဲ၏ထိပ်တွင် အေးဆေးစွာဖြင့်နေရာယူထားသူက ဘေးတွင်ရှိနေသော ကိုမှိုင်းဘက်ကို စောင်းငဲ့ရင်း စကားပြောကာ အလုပ်ရှုပ်နေပုံရသည်။ သို့သော်လည်း ထိုသို့အလုပ်များနေသည့်ပုံစံကိုက သမီးငယ်နှင့်လိုက်ဖက်လွန်းနေသည်။

"ရှယ်ယာရှင်တွေလည်းစုံပြီဆိုတော့ ငယ်တို့အစည်းအဝေးကို စလိုက်ရအောင်ပါ။"

သူ့အတွက်ဟု သတ်မှတ်ထားသော သမီးငယ်နှင့် မလှမ်းမကမ်း အစွန်းထိပ်ဆုံးရှိခုံတွင် သူဝင်ထိုင်လိုက်သည့်အချိန်တွင် စားပွဲထိပ်၌အေးသက်စွာဖြင့်ထိုင်နေသော သမီးငယ်က မတ်တပ်ထ,ရပ်ကာ ပရိုဂျက်တာရှိရာသို့လျှောက်သွားလေသည်။

ခြေတစ်လှမ်းကဋေတစ်သန်းဆိုတာမျိုးထက် ခြေလှမ်းအကျဲများက သမီးငယ်၏ယုံကြည်ချက်တို့ခြေချနေသည့်အတိုင်းပင် ရဲရင့်ထက်မြက်သည့်အမျိုးသမီးတစ်ဦး၏ ခြေချသံများသည် သူ့ရင်ကို တုန်ခါသွားစေသည်။

"ပထမဆုံးအနေနဲ့ ငယ်ပြောချင်တာက ငယ်တို့ကုမ္ပဏီမှာ ရှယ်ယာပိုင်ဆိုင်မှုအရ....."

သမီးငယ်၏အပြောကြောင့် power pointထောက်ပြနေသော ရှယ်ယာပိုင်ဆိုင်မှုစာရင်းဆီသူအကြည့်ရောက်သွားပြီး ချက်ချင်းမှာပဲ သူ့မျက်စိရှေ့တွင်ရှိနေမည့်သူထံကို စူးရဲရဲတစ်ချက်ကြည့်မိတော့သည်။

အမြင်ကတ်ဖို့ကောင်းလှတဲ့ ထိုသူသည် ဘယ်အချိန်မှာတည်းက သူရှိရာသို့စောင့်ကြည့်နေသည်မပြောတတ်ပဲ ချက်ချင်းပဲမျက်နှာတစ်ခုလုံးကိုမုန်းစရာကောင်းအောင်ပြုံးဖြီးသွားပြီး လက်တစ်ဖက်ကိုလည်း မသိမသာနဲ့ထောင်ပြကာ နှုတ်ဆက်နေသေးသည်။

"ဦးထက်ဝေဟင်ရဲ့ ပိုင်ဆိုင်မှုအရတော့ တတိယရှယ်ယာအများဆုံးဖြစ်တဲ့အတွက် ဒီတစ်လစာခွဲဝေမှုကို တတိယမြောက်အများဆုံးရမှာဖြစ်ပါတယ်။ ဒီနေရာမှာ ငယ်ပြောချင်တာတစ်ခုက bankingစနစ်ကိုပဲ အသုံးပြုပြီး လစဥ်30ရက်နေ့မှာ ရှယ်ယာအမြတ်ငွေကို ရပါမယ်။ အဲ့ဒီအမြတ်ငွေထဲမှာ အာမခံငွေကြေးနဲ့ အခွန်ကိုတော့ ကုမ္ပဏီဘက်ကတစ်ခါတည်း ယူထားမှာဖြစ်ပါတယ်။"