ရည်းစား​လေးထားချင်မိတဲ့ကျွန်​တော် (ဘာသာပြန်)

Cha-55

[Unicode]

မားမားဟော်၏နားထဲတွင် တဝီဝီမြည်သံများ ဗြုန်းဆိုင်းဝင်ရောက်လာသကဲ့သို့ စိတ်တွေရုတ်ချည်းလွတ်ထွက်သွားရသလို ခံစားလိုက်ရသည်။ ပါးပါးဟော်ကသာ အချိန်မီထိန်းမကူထားလိုက်နိုင်ပါက သူမ၏ ယိုင်ယိုင်နဲ့နဲ့၊ယိမ်းထိုးနေတဲ့ခန္ဓာကိုယ်ဟာ နေရာမှာတင် မြေကြီးပေါ်သို့လဲပြိုကျသွားပေလိမ့်မည်။

သူမဟာ ဖြူဖပ်ဖြူရော်ဖြစ်နေတဲ့မျက်နှာကိုပင့်မော့ထားပြီး ဟော်ချွီအား မယုံနိုင်သဖွယ် စိုက်ကြည့်နေကာ စကားလုံးများနှင့်အတူ တုန်တုန်ရီရီဖြစ်နေရှာ၏။

"သား! မင်းဘာဖြစ်ချင်နေတာလဲ? ဘာတွေများဖြစ်ချင်နေတာလဲ?"

သာမာန်ကလေးများနှင့်မတူ ကွဲပြားခြားနားသောစရိုက်လက္ခဏာများဖြင့် မွေးဖွားလာခဲ့သည့် ဟော်ချွီမှာ သူ၏ညီအစ်ကိုများကြားတွင် သဘာဝကျကျ မားမားဟော်ထံမှ မျက်နှာသာပေးခြင်းအခံရဆုံးကိုရရှိခဲ့သည်။ငယ်ငယ်လေးကတည်းက ရှက်ဖွယ်လုလုရိုက်နှက်ခံရခြင်းမျိုးကိုမဆိုထားနှင့် ဆူပူကြိမ်းမောင်းတာမျိုးကိုတောင် တစ်ခါမှမခံယူရဖူးခဲ့ပေ။

သို့ပေမယ့် ဒီနေ့မှာတော့ သူ့အမေဖြစ်သူဟာ သူမရဲ့နဂိုမူလ နူးညံ့သိမ်မွေတဲ့အသွင်အပြင်ကို လွှတ်ချလိုက်ပြီး ဟော်ချွီအား ကြမ်းတမ်းခက်ထန်တဲ့ မျက်ဝန်းတစ်စုံဖြင့် စူးစိုက်ကြည့်နေသည်။

"မင်းငါ့ကို ရှင်းရှင်းလင်းလင်းပြောပြတာပိုကောင်းလိမ့်မယ်!"

ဟော်ချွီသည် သူ့အမေ၏ ရုတ်တရက်ထွက်ပေါ်လာသည့် အမျက်ဒေါသကိုသတိမမူမိပေ။ သူက မားမားဟော်ကို ခံစားချက်ကင်းမဲ့စွာကြည့်နေရင်း ထပ်ပြောလိုက်၏။

"ကျွန်တော် ချင့်ဟွမ်ကို သဘောကျတယ် သူနဲ့အမြဲအတူနေသွားချင်တယ်"

ယွီချင့်ဟွမ်အကြောင်းအား တွေးတောမိလိုက်သည်နှင့် ဟော်ချွီ၏နှလုံးအိမ်မှာ ချိုမြမြပျားရည်အိုးထဲတွင် နှစ်ခံထားရသည့်အလားပင်။ ရှက်ရွံ့နေတဲ့မျက်နှာမှာ ဘယ်ဘက်ပါးပြင်ရှိပါးချိုင့်ဝိုင်းဝိုင်းလေးကိုထွက်ပေါ်လာစေပြီး သူကတီးတိုးလေးပြောလာ၏။