بخطواتي تعثرت

الرابع عشرررر

البارت الرابع عشر
#رواية_بخطواتي_تعثرت 🌟⭐⭐⭐
بقلم دينا ال سلمان ⭐⭐

ماذا لو عادت أمي
ينتهي جميع الحزن ويتصلح جميع هذا الخراب
وتصمت كل هذه الضجة وتتحول الدنيا من الاسود إلى الأبيض
وينجبر إنكسار قلبي ويستقيم ظهري

وزيره::ماتتت ماتتت ماتتت سيف راح اخر كلمه جانت من طلع ديري بالج ع نجود عرفته رايح بدون رجعه

نجود:: مامستوعبه التحجي صاحت حسنه

حسنه:: كله من وراها وجه الفكر اجت وجابت فكر ابوها وياها مو ابوها اخذ عمر حريمه الثنتين

نجود:: ام سيف تخربطت وكبن عليها ماي اني لحد الان مستوعبه كعدت بالكاع اريد دموعي تنزل ابد منزلن عبالك تتحداني اجت وزيره تحجي وياي واني اشوفها بس مااسمع
اخر شي ضربتني كف وحضنتني
وزيره:: نجووود ابجي صيحي شبيج نجوود لتخوفيني عليج
نجود:: حضنتها حيل وابجي والله ماتمنيت يموت اني احبه بس هو كسرني
وزيره:كافي نجود كافي
نجود:: جانت رقيه اشيل بروحها وتركع وتضرب بروحها وتلطم واشلع بشعرها وشاكه ثوبها تخبلت مبينه شكد تحبه وزيره تبجي بصوت واني لامه رجليه لصدري وابجي

دخلن عماته وكامن يلطمن ويبووو ومايبوو لحد ماوكعت ام سيف خطيه صحنه وكامت تصيح اريد ابني يمه منو الي بعدك لييش عفتني ورحت كم مره كتلك عوف هذا الشغل الاكشر
صاحت حسنه
حسنه::سدي حلجج لاتجيبين سيرة الشغل
ام سيف::خنست بس  تبجي 
صار المغرب وهن ع عيطه
صاح سلام يمه وينج جبتلج سيف بتابوووت
جده جبتلج حفيدج
جابو التابوت اخوانه خلوه بنص الصاله راحن يركضن يتوسلن بيهم يفتحون التابوت بس مقبلو الجده كامت تركع براسها بالحايط اله سلام فتحه تقربت ام سيف وكامت تبوس براسه اني خفت اتقرب خفت حيل لزمت الدرج وارجف جان المنضر يخوف يصارخن ويعيطن والدنيا مغرب ويملخن بشعرهن ام سيف والجده تكابلن وكامن يلطمن ورقيه تبوس براسه وبيده وجهالها يصارخون ع بجيها
لحد ما اجو الولد اخذو ودفنو ودفنو كل مخاوفي منه
مرت الايام واليوم الثالث للفاتحه
عرفت سبب الوفاة من سلام
انو رايح لبغداد وبالطريق طالعيله سلابه وقاتليه وشامرينه بالشارع وماخذين السياره وجان شايل فلوس هم ماخذيهن بس الموبايل شامررينه والناس لاكينه وخابرو عليهم
جنت كاعدا بالمطبخ يم البنات يسون حلاوه تمر واني ماخذه زاويه من المطبخ وكاعده
كملن وزعن تعشو العالم وكلمن راح لبيته
اجو اسماء وبيبي اول يوم  وتعذرت اسماء وراحت لأن الجهال وحدهم بس بيبي بقت لليوم يمنه اخذت جاي ورحت يم  بيبي نمت ع رجلها بغرفه حسنه
حجت بيبي
فضيله::لمي اغراضج ابوج كالي بأجر أمر عليجن
نجود::بعدني ما رديت حجت حسنه
حسنه:: نجود متروح لمكان خلي يطلع الاربعين واحد من الويلاد يعقد عليها
فضيله ':ع بختج حجيه اول شي لازم تلزم عده والعده اربع أشهر وعشرة أيام
حسنه::انه ماكلت ياخذها كلت يعقد عليها ومن تخلص العده يجوزون
فضيله:: استغفر الله العظيم حجيه انتي تعرفين شكاعد تحجين
نجود::كافي بيبي اني ماازوج لاحماي ولاغيره مستحيل ازوج بعد
حسنه::ترريدين تأخذين الورث لابوج
نجود::اتنازل عن كلشي بس عووفوني رجلي مصارع اربع ايام مات وانتي تريدين ازوجيني اعتقيني لخاطر الله
بيبي اني رايحه اجمع ملابسي واطلع كلشي مااريد
فضيله::كلشي جبناه الج تاخذيه والغرفه ابوج وسلام يتفقون شوكت يبيعوها ويحولولج الفلوس
نجود::جانت بيبي تحجي هي مو ميته ع الغراض أو الفلوس بس متعمده حتى تحرك كلبهن
كمت اريد اصعد لغرفتي اجت وراي وزيره
صعدت وهي وياي دخلت للغرفة نزلت الجنط
وزيره::جيبي اني اسفط الهدوم(الملابس) وانتي اجمعي اغراضج
نجود::انتي تبقين هنا
وزيره :شعندي باقيه هينا انه لا بزر عندي ولاحد يريدني مره عاجر ومنبوذه
نجود::احسلج شبيج ترجعين لبيت اهلج
وزيره::احسلي لو اهلي كفو هو شيحمل المر غير الأمر منه!!
اهلي ابوي وامي زينين بس كلشي بيد الجناين واخواني اذا يكللهم موتو يموتون
نجود:: لعد شلون
وزيره::اروحن والله كريم
نجود::اباوع عليها شلون اسفط بتنضيم حيل نضيفه وزيره
لميت ذهبي وكلشي مهم اخذته
كامت وزيره وفتحت الكنتور الي بالوسط جانت اكو خزينه بيه حجت
وزيره:: تعرفين الرمز
نجود::لا
وزيره::مواليدج شكد!
نجود::١٩٨٨
دخلته وانفتحت
وزيره:: كال الفلوس تقسمنهن بتساوي الج والي ورقيه
نجود:: اني ما اريد
وزيره::تعالي مو بكيفج
هو حلفني واني حلفت اله
نجود::طلعتهن جان كله دولارات
اربع سفطات
حسبتهن كالت كل حزمه ١٠٠وركه
نجود::ها اني مااريد خاف فلوس حرام
وزيره::حراميش ترا سيف جان يشتغل بالدوله
نجود::وشنو شغله
وزيره::مااعرف بس الجده تعرف
هاج اخذي هاي ومن هاي الحزمه ٣٣ روكه كل وحده
نجود:: بس رقيه عدها اطفال
ووزيره::كافي نجووود كافي هو حلفني أخذيهن احركيهن بس خلصيني من الحمل
نجود::أخذتهم خليتهم بالجنطه ولميت باقي اغراضي ونمت كعدت ع صوت وزيره تريدني اكوم
كعدت افرك بعيوني كمت نزلت رحت غسلت لكيت بيبي كاعده سوت وزيره الريوك اكلنه وخابري بابا طلعت لبست عبايه وغطيت وجهي بنقاب ونزلت الجنط جانن اربع جنط كبار طلعو اخوان سيف الصغار اخذوهن واني سلمت ع ام سيف والجده كوه ردن السلام
وزيره حضنتها وحلفتها متعوف سراب واسلملي عليها
طلعت بابا خله الاغراض بسياره وصعدت وانطلقنه
علي::,البقيه بحياتج بابا
نجود::حياتك الباقيه بابا
مرت الدقايق كأنها سنين اريد اوصل للبيت اشوف اسماء واحضنها
وأشوف رفوله وصالح وحمودي وصلنه للبيت
نزلت لكيت أسماء والجهال كاعدين بالحديقه حضنتهم وابوس بيهم لحد ماتعبو دخلت للبيت
ممصدكه رجعت محرره من سيف ومخاوفي
صاح بابا تعال دخلن الاغراض وياي
كمنه دخلناهن اني واسماء ورجعت رتبتهن بالكنتور مالي طلعت الفلوس كلت بأجر اروح لو لدز اسماء تخليهم بحسابي الي خليت مهري بيه
ضميتهن وطلعت رحت غسلت وجهي ورحت ع اسماء لكيتها اسوي غدا ورفل مجلبه برجلها شلتها وابوس بيها وهي تكركر من الضحك
اجه محمد حجه
محمد::نثود (,نجود) راح تبقين يمنه
نجود::اي ابقى تقبل مو
محمد::اي بث تنطيني ففونج(,تليفونج)
نجود:: اشتريلك جديد شكلت
محمد ؛:كولي والله
نجود:: والله
محمد::ياهوو احبث احبث(احبج)
تقربت عليه بسته من خدوده وهو راح يحجي لصالح
صبيت الغدا ويه اسماء جان بابا كاعد يم بيبي ورفل بحضنه
ومحمد وصالح يلعبون بتليفون بابا
صحتلهم كعدو يأكلون حجه بابا
مدام رجعتي بابا ماضل شي للامتحانات شنو رأيج اروح اشوف واسطه وتمتحنين
نجود':لا بابا اني انجبرت ع هذا الاختصاص خليني اشوف اذا يقبلون الاهلي معدلي طب اروح وإذا مقبلو اعيد السنه
علي::اي امتحني اذا نجحتي خير على خير وإذا رسبتي انتي بكل الحالات قدمي اهلي يابنتي
نجود ؛::صفنت جان يحجي وياي مثل قبل بحنيه
حجيت بابا شوكت ترجع اخواني
علي::ماضل شي ويخلصون ضل شهر وراها اجيبهم
نجود::خير انشاء الله
كمت غسلت ونمت
مرن الايام والأشهر واني البيت مطالعته لأن لازمه عده الجهال تعلقو بيه حيل حتى باليل ينامون يمي بابا يطلع ميرجع غير الليل ومرات حتى الليل ميجي وبيبي راحت لبيت عمي ابو شاهين واسماء اجلو العرس لحد مايطلع سيف السنه لأن عيب من العالم واليوم اول يوم مدرسه
لمحمد جان خايف حيل اني قدمت ع الاهلي
طب
وانقبلت
سيارتي بدلتها واخذت محمد ورحت كان اول يوم الي خفت من كلشي بس لازم ارجع نجود القويه الي متخاف من شي
وصلت محمد ودخلت وياه المدرسه والطلاب من شافهم كام يبجي ومجلب بيه
نجود:: زاعلتك حمادي
انت مودكول اني رجال وسبع واطلع الاول ليش هسه تيجي
محمد:: اخاف ترحين وتعوفيني هنا
نجود:: ليش ماعندك ثقه بااختك
محمد:: لا عندي وانتي مواختي انتي امي موو
نجود::اي يله امسح دموعك واني ب١٢احي اخذك يله حمادي السبع
مسح وجه وعيونه رموشه الي يخبلن بسته ونطيته مصرف اخذته وديته لصفه ورحت للجامعه جنت مرتبكه بس من دخلت وشفت الطلاب والطالبات اكو شي ارتاح بيه
دورت على قسمي ودخلت اول يوم جان تعارف لحد ل١٢طلعت رحت جبت محمد رجعت فرحانه حيل
اول مره افرح بعد السنه المرت
فتحت الباب ونزلت اني ومحمد نركض ياهو قبل يوصل للمطبخ وضحكنه واصل للشارع
فتحت الباب لكيت بابا واسماء وبيت أهل سيف أم سيف و وزيره والجده
نجود::فتحت عيوني بصدمه وحجيت السلام عليكم
الكل:: وعليكم السلام
نجود::من رخصتك ابدل واجي
دخلت للغرفه جنت لابسه بنطلون اسود وقميص أبيض وشعري مفلول بدلت وطلعت
كامت وزيره حضنتني وتبجي واني هم بادلتها الحضن
وزيره ؛:مشتاقتلج ليش متسألين ع اختج
نجود::حقج والله ملتهيا بالبيت والجهال وهسه الدوام
تقربت ع ام سيف بوستها والجده هم
أم سيف::بنتي احنه جايين نطلب ايدج لابنه سلام
نجود:: خاله اني مااريد ازوج بعد الله يخليج لتفتحين هالموضوع بعد
حسنه:: ليش يمه شبيه سلام شو زلمه معدل لو مخليه واحد جوا باطج !!؟
نجود:: بيبي شهل حجي الله يخليج كتلج ممفكره بالزواج اني اريد اكمل جامعتي كافي وليرحم اهلج
حسنه:: موصوجج صوجو لسلام الاغبر كتلو ختولي شلك بسلايب ودوختو لراسك بس هو جبرني اجي
نجود::  بابا متحجي شي شبيك بابا
علي:: بنتي انتي اعرف بحياتج الي تريدينه اني وياج بيه
نجود:: واني مااريد ازوج بابا ارحمني
حسنه:: كومن يله تتعزز ام إلزلم
نجود:: راحن واني تخبلت كمت اشيل بروحي واركع اخذت المفتاح وطلعت اركض بتراكي البنفسجي هههه من اذكر مرات تصرفاتي اغم روحي
شغلت سيارتي واسماء خطيه تركض وراي حافيه والجهال يصرخون فتحت شباك السياره وصحت شتريدين اسمااااء ابوي كاعد محجه كلشي المفروض يطردهم
اسماء:: وين.  تريدين ها انتي وهذا تراكج انزلي تنفاهم بابا مو كالج اني وياج باأي قرار تتخذينه شبيج خما يطرد نسوان بيته لتخبليني نجود خبلطتي الجهال انزلي
نجود ؛: طفيت السياره ونزلت ابجي جان بابا مبدأ يريد يطلع
اسماء::متتغدا
علي ؛:لا بابا مستعجل بس اسماء عقليها لنجود خما اطرد نسوان من بيتي اني موخليتها تحجي ومقاطعتها مو ايدت قرارها اذا ماتريدني بحياتكم وكارهتني اطلع واخصصلجن مصرف واجيب امي تكعد وياجن
نجود::يحجي واني واكفه مباوعلي يحجي ويه اسماء عافنه وراح
كعدت بالكاع ابجي تقربت رفل تمسح بيدها الصغيره بدموعي
حضنتها وبجيت
اسماء::كافي تبجين كومي محمد وصالح ماتو جوع كومي ناكل
نجود:: مسحت دموعي وكمت غسلت وكعدنه ناكل حجيت اريد انقل احمد وعبدالله هنا خطيه وحدهم شدراني شلون عايشين شبعانيبن جوعانين
اسماء:,لا بالعكس خوالي مخليهم مدارس اهليه وبيبي يمهم خابرتهم البارحه من جنتي نايمه بيبي ادكلي اذا تحبين امج عوفيهم اشم ريحتها بيهم
نجود::خاف ممرتاحين
اسماء::حجيت وياهم يكولون كلش مرتاحين كملنه غدا اني اغسل المواعين واسماء تسوي جاي كالت
اسماء::العصر نروح للسوك اريد اكمل جهازي ماضل شي لزواجي واني كلشي محضرت والملابس الي اشتريتهم صايرات ضيقات عليه
نجود::اني هم اريد اروح اشتري كم لبسه للجامعه
اسماء::موشتريتي قبل سبوع
نجود::بعد اريد
اسماء::اي نروح العصر
نجود:والجهال
اسماء:ناخذهم ويانه
نجود::اهووو يضلون يبجون ورفل لازم اشيلها
اسماء::ناخذ عربانتها
نجود::لا خطيه اني اكودها
نمت شوي وكعتني اسماء بدلت وبدلت الجهال واخذناهم ورحنه
نزلت ولزمت ايد رفل دخلنه للاسواق
خلصنه مشتريات طلعت اضحك على رفل
رفل:: بعد مااحبث ومااغيدج (مااحبج وماريدج)

نحود:: هههههه ليش رورو
رفل:: لأن متشيليني
شلتها بستها واضحك واسماء تضحك ع ضحكنه
رفعت راسي لكيته واكف ومجتف ايدينه ويباوعلي بعصبية جفلت جنت سائله رفل بيد وعلاليكي بيدي الثانيه
وكعت بالكاع انصدمت معقوله بعد هالمده كلها  اجه اسماء تباوعلي بستغراب
إسماء:::شبيج يمعودا
نجود:: مابيه خليت رفل بالكاع وشلت الاغراض وامشي سريع
وصلت للسياره شبه اركض عاطت بيه اسماء اسماء::ع كيفج شجاج
نجود::تعبت اريد ارجع مابيه شي
اسماء::اصعدو يله
نجود::اباوع عليه بعده واكف بمكانه ويشرب جكاير
صعد الجهال واسماء شغلت رجعنه للبيت
اسماء::متكليلي شجاج خبلتيني
نجود:: غيرت الموضوع اكلج اسماء هذا البيت مسكون يمكن ترا اني هواي كاعد اثير أمور غريبه وياي أحد يخطف من كدامي لو اسمع خطوات لو احس أحد يخنكني
اسماء::ها شبيج يمعودا صدك تحجين هاي كلها تهيئات وتخيلات
اسماء حجيت بداخلي واني ميته رعب صح اني هم اهواي اشوف هيج شي واسكت بس من يجي بابا اكله نريد ننتقل حتى لونأجر هذا البيت وانأجر بغير مكان
نجود::دخلت خليت الملابس الي اشتريتهم
بالكنتور وصفنت اني شفته بس مااريد ارجع وازوج كارهه شي اسمه زواج وعرس ورجال هزيت راسي وضربت كصتي هو منو يكول رايد يزوج دخلت اسماء وكالت متكومين نسوي عشا
نجود::كمت وياها سوينه عشا واجو الجهال اكلو وقريناهم ونامو واني هم نمت حيل تعبت اليوم
صار الصبح وكالعادة بدلت واخذت محمد ورحت نزل واني رحت طبكت السياره ونزلت
صاح من وراي من رخصتج شوي نجوود
التفت جان يمشي يتجاهي كلبي رجف وخفت من كلشي خفت ارجع اعيش الحياة العشتها...
سرعت خطواتي ومشيت بهروله صاح
قسمآ بالله اذا ماوكفتي ميصير خير ..
خففت خطواتي والتفتت...
يتبع..