بخطواتي تعثرت

الثالث والثلاثون ⭐⭐

#بارت_الثالث_والثلاثون ⭐
#من_رواية_بخطواتي_تعثرت ⭐⭐
#بقلم_دينا_ال_سلمان ⭐⭐

.ٍسلامآ على قلوبٍ كسرتها الحياة فتمنت. فدعت. فصبرت. ففاجأها آلله بالجبر و الاستجابة

نجود ': بعدني مارديت اجه صوت من وراي
ام ميعاد:: والله حلوه ماضلت عليه غير ناخذ مطلقه لا ابني الوحيد والله عرفتهن حيايه وراح يبثن سمهن علينه نجود لمي ملابسكم وانكلعو منا الضاهر انتو ميجي بعينكم الطيب
ميلاد:: شبيج يمه ليش هيج تحجين هما شعليهم لخاطر الله شبيج
نجود:: مع الاسف خاله ابد متوقعتج هيج جنت حاسبتج امي الثانيه والي ربي عوضني بيها بس حقكم اني باجر اخذ اهلي واطلع
ام ميعاد:: لا امج ولا خالتج سمعتي اني موحامل مشاكلكم الي متخلص اني هم حقي اخاف على بنتي وابني هم الي طلعت منهم من هالدنيا شنو ذنبي ابني يوميه راح وياج لناس متخاف الله وحتى بنتي اترجاج ابتعدي عنها
نجود:: ليش خاله شنو شفتي من عندي حتى هيج تحجين شفتيني سويت ها خاله !!
ميلاد:: معليج نجود باامي امي كامت تخربط امشي دخلي لبيتكم وباجر اني احلها وممنوع يانجود تتحركين من هنا
ام ميعاد:: وحق الله يا ميلاد اذا بقت هنا اني اطلع اخذ بنتي وهج منا اروح لخوالك وبعد تحلم ارجع اني فنيت عمري لجلكم ترملت واني بعز شبابي شفت انواع الظلم والعذاب وتحملت حتى تبقون يمي واخر شي. تفضل بنات مااعرف شنو اصلهم فصلهم وتكول على امك تخربط!!
هذا الي ماترجيته منك ياابن بطني ياتعبي وجع السنين
نجود:: خاله ابوس ايدج اهدئي ليسمع بابا وتنتكس حالته والله اني باجر أخذهم واروح
ميلاد :: يمه هيج اصغريني كدام ناس طالبه حمايتنه ليش ياامي ليش
نجود:: عفتهم ودخلت اركض مااريد تكبر المشكله أكثر
دخلت جوا الكل نايم البيت هدوء
الشهكه بصدري لاتطلع ولاتروح مخنوكه إلى درجه اريد اصيح بعلو صوتي امسح بوجي وبصدري اروح منا وارجع منا وين اروح ياربي ويين شلون بيه اسمع سوالفهم ميلاد وأمه بحديقتهم وكلبي يدك عالسريع لميت روحي الضايعه  ونمت كعدت الصبح
لكيت أسماء كاعده تسوي ريوك كعدتهم كلهم
ورحت اساعدها
نجود:: اسماء لمي اغراضنه را نرجع لبيتنه واني راح اروح اشوف المستأجرين حتى يطلعون العصر
اسماء:: شعجب !
نجود:: احسن ممخاذين راحتنه والبيت كلش صغير خطيه الولد مماخذين راحتهم
اسماء:: احسن حل واكو سالفه هم اريد احجيها الج من نروح لبيتنه
نجود:: تمام لمي بس ملابسنه هاي الثلاجه والطباخ والكاونتر الهم بس الاغراض الباقيه مالتنه
اسماء:: تمام ساعتين وكلشي يخلص
نجود:: اني رايحه حتى يلحكون يطلعون من البيت
اسماء::  سود ريوك اكعدي تريكي وروحي
نجود: لا عوافي مااريد بس وكلي بابا
اسماء:: تمام عمري
نجود:: رحت بدلت و اخذت المفتاح وطلعت
شغلت سيارتي وطلعت وصلت للبيت وروحي راحت امي صوت اخوي صوت نور كلهم راحو دكيت الباب وهاي اول مره اجي هنا حتى الايجار يجيبه ميلاد محد يرد رجعت دكيت لحد ما تعبت محد اكو!!
طلع ابو ياسر اعرفه جيرانه
أبو ياسر:: شبيج عمو ماكو احد هنا صار تقريباً سنه ماكو احد
نجود:: شلونك عمو اني نجود بنت ابو عبدالله
أبو ياسر:: هلا بيج عمو متدرين ابوج شالو لبغداد
نجود:: لا عمو اعرف بس مو جانو اكو مستأجرين بيه
أبو ياسر: لا عمو من رحتو لليوم  محد دخل بيه لا مستأجر ولاغيره
بس باعو عمج ورجع واحد اسمه حاتم اشتراه
نجود:: اي عمو حاتم زوجي واشترا الي
خلص عمو مشكور
طلعت تليفوني والرجال راح خابرت ميلاد
رد مبين صوته مال نايم
ميلاد:: ها نجود
نجود: وين انت
ميلاد:: بالبيت ليش
نجود:: اني باب بيتنه القديم وين المفتاح
ميلاد:: هااا شوداج لخاطر الله
نجود:: اريد المفتاح
ميلاد:: اصبري جايج
نجود ':شسوي بيك !
اريد المفتاح
ميلاد:: المفتاح يمي هسا اجيبه واجي
نجود:: واكفه صافنه على الباب اخ يا كلبي شلون جنت اجي اركض من الجامعه حتى اشوف امي شنو طابخه دموعي نزلن مسحتهن خايفه ادخل دمها راح بسببي ربع ساعة واجه ميلاد
ميلاد:: انتي مجنونه شجابج يا نجود
نجود:: حالتي جانت حيل صعبه مااكدر اوكف مو اتناقش وياه اخذت المفتاح فتحت الباب ودخلت كل زاويه بهلبيت الي بيه وجع صح ماعشت بيه هواي بس اصعب ايام عشت بيه فتحت باب الداخلي ودخلت رحت بمكان امي الي بيه ماتت كعدت بالكاع عبالك البارحه ماتت عطت بصوت عالي واضرب روحي جنت محاسه بلي اسوي جنت حيل كلبي مهموم كل هم وجع طلعته جان ميلاد واكف يباوعلي بصدمه بس ابد محاول يمعني جان يريدني افرغ الطاقه السلبيه لحد نص ساعه واني على عيطه وحده لحد ماجرحت حنجرتي
ميلاد:: كاافي نجود كولي الله حرام عليج اني ليش مااريدج ترجعين كومي خلي نروح
نجود:: ماجيت حتى اروح جيت حتى ابقى بيتي معززه مكرمه
بس شي واحد اريد اعرف وينهم المستأجرين وينهمممم
ميلاد:: اكو ولد جان مأجره مخلي اغراض بيه والبارحه باليل خابرته أخذهم
نجود:: كمت اباوع علبيت اعرف جذاب واحتمال وطن الي يبعث فلوس كل شهر بس ماردت الح عليه مشكلتهم  بعده كلشي بيه مرايح كلشي حتى الاثاث باقي مغطا بقماش
بس مليان تراب كمت طلعت تليفوني وخابرت اسماء
نجود:: اسماء جيبي الولد وتعالي لبيتنه خلي نضفه بس صالح خليه يم ابوي
اسماء::ليش مو جانو بيه ناس
نجود:: لا بس مخلين بيه اغراض واخذوهم
اسماء ؛: يله هسه نجي
نجود::تمام سديت الخط وباوعت على ميلاد حجيت تكدر تروح اجيبهم واخر طاب هذا
ميلاد:: ماتنجبين رايح اجيبهم واجيب ميعاد وياهم
نجود::هويت راسي هو طلع واني ذبيت روحي بالبيت لحد ماجو مخليت شي منضفته اجو الولد وميعاد واسماء كوه احجي وياهم اشتغل ودموعي يجرن لحد ماجرتني ميعاد
ميعاد::شبيج ها شبيج ليش هيج وياي ليش احجي وياج متردين
نجود ؛: امج متقبل نحجي وياج لو ما ميلاد مااخليج تجين بس ماردت افشله
ميعاد:: ولج انتي اختي والله مااكدر بدونج لو ماانتي جان مجلوطه وامي هي هيج بعد شوي ترجع تتندم والله كلبها ابيض بس تخاف علينه حتى الليل كله تبجي ادكول قسيت على نجود
وميلاد ميحجي وياها
نجود:: خلص ماصار شي المهم احنه نبتعد
ميعاد:: ليش هيج نجود والله امي تحبج
نجود:: كافي الله يخليج والله مابيه حيل حتى احجي خلي نكمل صار العصر هسه باابا ضال بدون اكل
كمنله كلشي ورحت جبت بابا وصالح واجيت والاغراض بس ملابسه وصلنه وبابا بجع بقهر
نجود:: كافي بابا الراح راح احنه ولد اليوم مالازم انكضي عمرنه بالقهر والبجي والنوح هو شباقي بالعمر
مرت الايام واحته وضعنه يسوء الفلوس الي بالبنك راح يخلصن وبابا عمامي مصفرينه واسماء حتى ذهبها عافته احمد يشتغل بمحل غذائية بس مصرف للبيت وبابا علاجه يكسر الضهر واني مبقالي غير شي وادخل بشهر السابع والدوام راح يبلش لا اكدر احجي ولا اكدر اسكت تعبت حيل حتى اكل اكل شي قليل حتى هم يشبعون جانت عين بابا عليه أحسه يعرف بيه وحاس بس مابيده شي واسماء ابد محركت ساكن ولا حاولت تشتغل ذابه حملها كله عليه وهواي تطلب وحتى رفل عمرها ثلاث سنوات بس متعبه اريد ملابس اريد اكل تريد اريد بس صالح ومحمد وأحمد بكلشي راضين عكس البنات
كاعده لازمه كتاب و اقرا
اجت اسماء
اسماء: نجود اريد فلوس اروح للسوك ويه بنت ابو ياسر اريد اشتري مسواك وملابس لرفل
نجود:: قبل سبوع اشترت رفل ملابس ومسواك البارحه جاب احمد شنو ناقصج
كولي واخابر احمد يجيب وياه من المحل
اسماء:: ها مو شسمه اريد مخضر مخلصين
نجود:: اكو فلوس بجنطتي أخذي الي تريدينه بس اسماء عليج الله عالكيفج والله راح يخلصن وين نروح
اسماء:: راح ادور شغل وارجع اشتغل
نجود:: اي والله تسوين فضل بالكت تلكين
اسماء:: انشاء الله يله اني رايحه تريدين شي
نجود:: لا بس لتتخأرين
اسماء:: أنشأء الله
نجود:: راحت والولد كلهم بره رفل نايمه رحت على بابا
علي :: هلت بنيتي
نجود:: هلا بيك حبيبي شلونك اليوم نطلع نكعد بالحديقة واسوياك احلا فنجان قهوه
علي :: لا بنتي كلشي مااريد تعالي احجيلج كلمه
نجود:: اي بابا احجي اسمعك
علي:: بابا انتي كلشي ماشفتي من حياتج وهسا انتي حامل وابنج هم آله حق عليج فلوسج بعد لتصرفين منهن خلي ابالج وراج عمليه وجايبه منو بديتحمل المصاريف
نجود:: يا بابا الفلوس فدوا الكم بس كون انتو مرتاحين
علي:: شوفي بنتي انتي بعدج صغيره والعمر كدامج وراج جامعه اذا تريدين تعيشين روحي لوطن وكليله هذا ابنك خلي هو يدزلج مصرف اله لأن هيج راح تتعبين منين تجيبين حليب ومنين تودينه الدكتور  اذا تمرض لاسامح الله وانتي طالبه ورايدلج كومه مصرف
نجود:: شلون اروح اكله وإذا عرف متأكده راح يأخذه من عندي اني ماانحمل طفلي يروح بعيد عني واني منتظره اشوفه واخليه بين أحضاني
صعبه يابابا
علي : بابا منو يأخذه منج كل عقلج القانون وياج الحضانه الج وهو الي طلقج واكيد يخصصلج مصرف
نجود:: انت اشوف أخبره يعني
علي:: لا مو مال مخابره خابري خلي يجي هنا واحجي وياه وحاتم خوش ولد يابنتي
نجود:: بس ماارجعله لو يموت
علي:: واني مااخليج ترجعين اله لو يموت
نجود:: تمام أخبره وأشوف
علي:: بارك الله بيج بنيتي
نجود ؛ كمت من يمه واني كلي امل يتحسن حالي وطن يحن عليه ويخصصلنه مصرف
كعدت رفل تبجي رحت غسلتلها وكلتها صار المغرب واجه احمد والولد احمد جايب مسواك كالعاده بس اسماء ماكو
طلعت تليفوني أخابرها مترد
نص ساعه واجت جايبه كومه علاليك
نجود:: شنو هاي اسماء
اسماء:: ملابس موكتلج راح اشتغل وعايزني كم لبسه
نجود:: بربج اسماء الجنه الفلس حسره علينه وانتي رايحه مشتريه السوك كله منيلج فلوس
اسماء:: ها مو كتيلي  أخذي فلوس أخذتهم كلهم وارجعهن الج من اشتغل
نجود:: ولج هاي فلوس جايبتي منين اجيب واني ماضل شي لجيابتي
اسماء:: يمعوده بعد ثلث اشهر واني ارجعهن الج
نجود:: عفتها ورحت سويت عشا ماضل شي وادخل بشهر السابع واحتمال اجيب بيه لأن الدكتوره كالت نازل ولازم مااتحرك واني بالمصرف ماضل شي غير فتافيت
هزيت راسي بقلة حيلة وكملت العشا
اجو اكلو واني اخذت عشا بابا ورحت اوكله خلصت ولميت المواعين واسماء بغرفتها تبدل وتقيس بملابسها الجدد
كملت كلشي ورحت مددت فكرت بكلام بابا
صح لازم أخبر وطن شنو ذنبي اني اتحمل كل هذا
طلعت رقمه ودزيت رساله
اني نجود اذا تذكرني عندي موضوع وياك ولازم احجي وياك وجه لوجه
نص ساعه ودزلي رساله
تمام بأجر ب ٩ الصبح تعالي ل....
نجود ؛:: تمام
لفيت نفسي بالفرشه ونمت كعدت على صوت اسماء تبدل وتكعدني
نجود:: ها وين
اسماء::. راح اروح لشغلي
نجود: وين شغلج موكتي راح ادور
اسماء: البارحه من رحت للسوك دخلت ع كم صيدليه ولكيت يردون احد يشتغل وياهم واني كتلهم على شهادتي وعلى شغلي بصيدليات وافقو ادعيلي يثبتوني لأن اليوم راح يجربوني
نجود:: إنشاء الله يبقوج وتشتغلين
كمت لميت الفراش وهي راحت سويت جاي وريوك وكعدتهم احمد رايح خطيه يكعد من ال٥يروح بدون ريوك لازم يروح قبل ابو المحل ينضفه ويرتب الاغراض برا
كملت الريوك الجو حلو نهاية التاسع فرشت بالحديقة وطلعت بابا نتريك وهو يحجيلي شلون جان يحب امي وشلون اخذها غصباً على خوالي
علي: اربع سنوات احبها بالجامعه جانت روحي معلكه بيها اذا غابت عن الجامعه رجليه ياخذني كبال بيتها جانو عايشين بغداد
خلصنه جامعه ورحت اطلبها اني واهلي ورفضونه
نجود:: وليش بابا
علي :: لان هم غير مذهب
بس جان قبل ماكو فرق  بس الشياب جانو يريدون يشيلون للنجف وميريدون يعوفون بنتهم بغداد  ورجعت طلبتها اني واهلي وكم خير وهم كان رفض لحد مشالو للنجف ورا مخلصت جامعه
اني هنا أيقنت انو محد راح ينطيها الي بوكتها بجيت بجي مصاير أتوسل باابوها
لحد ماراحو اخذت اهلي وعمامي وخوالي وشيوخ العشائر يجي خمسين رجال كوسترين اله كفت هههههه
نجود::صدك عود
علي::اي والله أجرت كوسترين من بغداد لحد النجف وماكو مجال مابقى للزلم وهم رفضوا وعاد الشيوخ وكهو عليهم وطلعت ام امج كالت خلوها تروح بفالها البت راح تمون وكفت كدام إلزلم وهلت ابوها أمام الأمر الواقع عاد اني رحت اركض جبت شيخ يعقدلنه وصدك عقدت وره شهر اخذتها وجانت الكاع ماشايلتني ولحد ما قبل لتموت ب٥سنوات ازوجت مجبور بس وحق الله مافد يوم كرهتها أو حبيت احد بكدها
نجود ،: الله يرحمها يأبه راحت لدار حقها
علي::كومي دخليني جوا صارت حاره
نجود::راد يهرب مني حتى يبجي براحته
كمت وياه دخلته للصاله شغلتله التلفزيون وكعد يباوع على الاخبار لميت البيت وكعدت الجهال ريكتهم بدلت وطلعت اسماء ماخذه سيارتي طلعت اتمشا وصلت للشارع أشرت لتكسب نطيتها العنوان واني اباوع على الساعة ب٩ وربع وصلت لكيته كاعد بالكوفي
اكو شي بيه فز لشوفته اني ماانكر حبي اله بس هو خلاني تدوس هالحب تقرت سلمت
وطن: وعليكم السلام
نجود:: كعدت وحجيت شلونك
وطن: بخير وانتي ولو محاجه اعرف مبين بنص الخير
نجود: الحمدلله
وطن: خير شنو الموضوع
نجود:: متوتره حيل وهو هادي حيل عكسي
حجيت اني صار أكثر من خمس اشهر بعيده عنك ومن حقي اعرف شنو تاليتي وياك !!
وطن,؛؛ شنو يعني موطلكتج وانتي حاليا حامل بعد شعلي بيج
نجود::. اني من طلعت من بيتكم جنت حامل وطلاكك باطل!
لأن هذا الي بطني ابنك من حجيت هيج كام وكف وباوعلي مصدوم
وطن: انتي شتحجين بله جايه تريدين اذبين بلاج عليه
نجود:: هذا ابنك تعرف شنو ابنك
وطن: هش حسج منا الناس
وهيج ابن مااريدوو
نجود "وكأنني أخبرتك بِما يؤلمُني، وعاقبتني به."
يتبع...
لاتنسون التصويت احبكم 🤗🤍