بخطواتي تعثرت

الثاني والثلاثون ⭐

بارت الثاني والثلاثون ⭐
#بخطواتي_تعثرت⭐
#بقلم_دينا_ال_سلمان،⭐

‏لدي الكثير ممُا أود قوله لكن روحي واهنة ، واهنة لدرجة أنها لا تحمل وزن الكلمات

نجود:::نزلت بلا وعي اركض تاركتهم وراي حجيت شكو عمو شصاير
جاوبني واحد اكو رجال هنا جبير يمكن مات اخذو للمستشفى...
كعدت اريد استوعب شكال جسمي كله رجف
نزلو يركضون احمد وميلاد
ميلاد::خير نجود شصاير
نجود:: ساكته مااكدر ارد مر شريط حياتي كدام عيوني كاعدين الجو بارد وتمطر وكهرباء ماكو ومشغلين شمعه وبابا كاعد يصلح اوراق مال طلابه وامي كاعده توزع جاي وكيك واسماء تقرأ قصص وعبود مسوي روحه رجال ويضرب بااحمد وصالح واني ادلل ع بابا وهو يبوس بيه
نجود:: انت مو بابا ومو ابوهم
علي:: هم هم ولدي بس انتي الغاليه
نجود::يعني تحبهم أكثر لو اني
علي: انتي الوتين وهم الدم وامج القلب
نجود:: زين اني أكثر لو ماما
علي:: ها لا امج
نجود:: والله بعد مااحبك وزاعلتك
يشمر الاوراق ويحضني ويضحك وامي تضحك على ضحكنه
فزيت على صوت احمد يهز بيه غمضت وفتحت بتعب
بابا راح موو مات
احمد:: كومي نجود لتضعفين اني راح اروح اشوف شكو اخذ ميلاد واروح وانتي دخلي اسماء والجهال
نجود:: كمت بسرعه حجيت ادخل انت هذاك بيتنه اشرتله اخذ اخوتك وادخل واني اروح اشوف شكو اشوف بابا واجيبه واجي
رحت للسياره نزلت اسماء دخلتها جوا هي والجهال شبه فاقده مابيها شي صاحي
عفتهم بالبيت وطلعت اركض صعدت بسياره ورحنه الطريق كله ابجي وادعي كون يومي قبل يومه ماصدكت لميتهم يروح ويعوفني وصلنه ودخلت اركض عفته لميلاد وراي سألت الاستعلامات رحت اركض الغرفه الي هو ليها لكيت ميعاد وامها كاعدات بالكاع وهو مخليله مغذي  تقربت بدون كلام سحبت كرسي وكعدت قريبه عليه
حجيت بصوت مطبك وتعبان
علي كووم بابا جبتلك اخوتي واعزاز كلبك اذا رحت وعفتني ثق هالمره مااسامحك ابد كوم يله فتح عيونك ترا اني مااكدر بعد احمل فراك احد هواي فاركت اعزاز وكلبي ملجوم بداعت امي كوم حتى لو بس نفس راضيه بس لتعوفني والله بدونك مااسوا كلشي تقبل بنتك تنهان عشت بدونك وانهنت اليسوى والمايسوى هاني واستهان بيه يعيروني بيك جانو يعروني بهلي لأن عافوني يوم الكيتك عشت بكرامه فتحنه بيت وانت وياي وتدعمني يأبه كووم  دموعي تجري وعيوني مغوشات مااشوف كلشي لازمه ايده واحجي وياه
تقربت عليه ميعاد وحضنتني
ميعاد:: مابيه شي والله الدكتور كال بس ضغطه صاعد ومن يخلص المغذي يكدر يطلع
نجود:: ميعاد والله تعبت وين اروح فهميني اني شلون راح اخلص حياتي شوكت ارتاح والله حتى من البجي راحت عيوني مااكدر اتحمل بعد والله هواي تحملت الي بعمري هساع طالبات ومرتاحات اله اني همي  يكسر الضهر ابني الي راح يجي وابوه ميعرف عنه شي وراح يزوج واختي الي مكسرها رجلها العار لو عمامي الي ينهشون بلحمنه لو رفل ومحمد يتيمين واذا راح بابا راح صدك يتيتمون ميعاد شوفيلي حل
كامت ام ميعاد
ام ميعاد:: كولي ياالله يمه اعرفج انتي قويه واخوانج بحاجتج وابوج مابيه شي والماضي انسي وافتحي صفحه جديده واخلصي  عيشي حياتج لابنج ولاخوانج امسحي دموعج يمه
نجود::مسحت ادموعي وره نص ساعه اجه الدكتور شال المغذي وخلاله واحد ثاني صارت نص الليل اجه ميلاد جايب اكل حجيت بتعب
ميلاد ،اخذ خاله تعبت خطيه
ام ميعاد:: لا هاي مامرجيه منج اعوفج وانتي بحاجتي كون اتكسر ولا اتحرك من هينا
ميلاد:: اكلن
نجود:: اسماء متكدر اسوي اكل هسه الجهال ماتو جوع سوده عليه
ميلاد:: افا وانه اخوج وديتلهم عشا من زمان
نجود:: والله مااعرف شلون اجازيكم والله فضلكم مراح انسا طول العمر
ام ميعاد::انجبي وتكلطي دناكل
نجود:: اكلو الف عافيه والله مجوعانه
ميعاد:: امم عجل اني هم مااريد
ام ميعاد:: انه هم مااريدو اخذو ردو
نجود::نزلت يمهم فتحن الاكل اكلنه وسمعت بابا يصيح بتعب
كمزت وباوعت عليه فاتح عيونه راح ميلاد صاح دكتور اجه
جيك وضعه
الدكتور:: وضعه تمام بس ابد لتضوجونه ولا اسمعونه شي يضوجه تكدرون الصبح تطلعون ومابيه غير العافيه إنشاءالله
نجود:: الحمدلله والشكر ربي رحت لزمت ايده وبستها ورجعت بسته من رأسه لزم ايدي واخذ باطنها كالعادة وباسها بس كوه
حجه بتعب ومامفهوم
علي:: اسماء اخوانج
نجود::ارتاح حبيبي اخواني بالبيت جبتهم واسماء وياهم فدوه رحتلك لتعب حالك
هز رأسه وغمض عيونه صار الصبح واحنه منايمين بس ام ميعاد فرشت عبايتها ونامت اجه الدكتور هم رجع جيك وضعه الصحي وكال مابيه شي بس ديرو بالكم عليه سوينه ورقة الخروج وطلعنه اني منا وميلاد منا ساندينه  مر وطن وحده شايفتها بس ما اذكر وين فتح عيونه وكف يباوعلي بصدمه اني دموعي هنا خانني لازم أيدها مبينين جاين ياخذون تحليل حتى يعقدون روحي بهتت محجيت شي عفته واكف مصدوم واني مشيت مدنكه وميلاد غلس محجه شي صعدنا بسياره كوه مسيطره وكاعده ام ميعاد يم ميلاد واني وميعاد يم بابا ميعاد تباوعلي ترييد تحجي ومتكدر لحد ما وصلنه روحي طلعت نزلت بابا وميلاد وميعاد وياي دخلانه الغرفه مالته الساعه ب١١ اجت اسماء تسحل بروحها سحل سلمت عليه اشرتلها لتبجين ورفل هم من شافت بابا اجت تركض حضنته ومحمد وصالح وأحمد ياهو الي يدخل اشره ليبجي هو مدد بفراشه واحنه ملتمين فوك راسه الي لازم ايده ويبوس بيها والي يفرك برجله والي يمسح بشعره والي يباوعله غمض عيونه وحجه علي::الحمد لله ياربي  عندي بنيه براس الف رجال
نجود:: ربي يخليك النه
اسماء: بابا سامحني وآلله جانو يجبروني والله مااهتم بيك
نجود:: موكت هالحجي سومه كومي هاي نسوي غدا
اسماء:: اي اني سويت غدا خطيه ميلاد مسوكنه البارحه ممخلي شي مجايبه واني سويت كلشي حتى خبز خبزت بتنور الغاز مالهم
نجود:: هزيت راسي وكمت حجيت ويه بابا عن قرب
بابا تسبح اسبحك
علي::اي والله محتاج اسبح
حجه احمد
أحمد:: نجود بعد ماعليج بهلي السوالف احنه نسبحه ونحلقله ونبدله هاي سالفة زلم
نجود:: فديت إلزلم أنا فدوه رحالكم ربي يخليكم الي
احمد:: ويخليج ألنه نجود لوماانتي مااعرف شصار بينه
نجود:: انتو اخوتي وحزامي والناس جانت تخرب وهسا الحنه كلب على كلب ومحد يكدر يفرقنه يله راح احضر الحمام لبابا 
وانتو اسندوه وجيبو
أحمد:: تمام
نجود:: رحت الكنتور طلعت اله ملابس ومنشفه أخذتهم ورحت للحمام رتبتهم وكاسرت الماي وصحتلهم
دخلو يضحك ن ويسولفون وياه واني هم رحت طلعت ملابس حتى ورا اسبح بطني كبرانه صابره تبين ابد مافد يوم تلمستها اخاف اتعلق بيه وياخذونه مني حتى إذا جبته شلون وبااسم منو اسجله واني حتى عقد محكمه ماكو ! وهو راح يزوج واني باقيه لا طايله سما ولاكاع
لزمت بطني وحجيت يارب احمي الي ماعندي غيرك يارب العالمين دخلت اسماء
تقربت عليه وكعدت يمي
اسماء:: نجوود اني اسفه هواي قسيت وياج
نجود:: خلص سومه احنى اخوات ومابيناتنه هاي السوالف
اسماء:: اني والله احبج بس حسين وشاهين جانو حاكميني حتى تليفون ميخلوني اشيل
نجود:: خلي يولون عيشي حياتج بعيد عنهم طلكج انتي هم دوريلج على شغل  هنا واشتغلي خلصي وقتج بالشغل حتى متفكرين بااحد وإذا تريدين اشوفلج أحد يشغلج طبعا بعد مترتاحين وتكونين مستعده
اسماء:: مااعرف شلون اشكرج والله
نجود:: لا تشكريني ولا اشكرج انتي اختي وبمقام امي واني ابد مزعلانه منج
اسماء:: والله واني هم ابد ما كدرت اشيل بكلبي عليج بس جانو يجبروني اتصرف وياكم بكره والله
حتى بابا جانو ميخلوني ادخل عليه جنت اهواي أتوسل بيهم وإذا فد يوم شافوني يمه يأذونه بعلاجه لو يخلونه بدون اكل
نجود:: الله ياخذهم خلي يولون خلي اكوم اسبح واجي وهاي الغرفه الي والج ورفل والولد ويه بابا لو بالصاله
اسماء::اني راح اروح أصب اكل
راحت اسماء واني رحت سبحت وطلعت مشطت ورحت للمطبخ وياها مسويه تمن ومركه ودجاج شوي وزلايط وطرشي وولبن وعصاير كملنه كلشي ورحنه جبنا بابا خليناه بالكرسي مالته وكعدنا يمنه التمينه كلنا سوالف وضحك اكلنه دخلو ميعاد وامها وميلاد جايبين غداهم ميلاد شايل جدر وميعاد هم وام ميعاد الخبز كمت تلكيتهم واخذت من ميلاد الاكل ورجعنه صبينه وكعدنا احلا لمه جانت احلا يوم مر بحياتي ضحكنه واصل للشارع
رفل مكدتها بحضنيي وكل متاكل لكمه ابوسها من مكان وهي تمسحه
نجود ؛: ليش تمسحين بوستي
رفل:: ماا أغيد (اريد) بوسه أغيد فلوس
نجود:: هههه مو تدللين ميلاد ينطيج عنده كومه نايمات على كلبه
ام ميعاد:: اي يمه رفوله روحي على عمو ميلاد ينطيج
ميلاد:: اني اني. شعلي يله عيني اني رايح حتى غداكم مااريده
رفل:؛ اطيني وغوح (وروح)
نجود:: هههه هذا اسمه عمو بخيل
رفل:: هى اسمه عمو شفيق
نجود:: هههههه ليش بله شفيق
ميلاد:: رحمه الله والديج
رفل:: لا عمووو شبيك شفيق جيغان (جيران) بيت عمو صابغ (صابر) مخبل ومغه (مره) ضرب عمو شاهين بغاسه (براسه)
وخله الدم يطلع من غاسه (راسه)
ميلاد:: ههههه حيل بعد ايدي اذا هيج اقبل
رفل:: عمو هو انت هم مثل شفيق. شفتك من ضغبت (ضربت) عمو حسين وشاهين
نجود: سديد حلكها بيدي هسا متخلي شي كلهن تكتهن
ميلاد::هاج عمو هذا الف بس اسكتي
نجود:: اخذته وتكلب بيه
رفل: الف شسوي بيه مااغيده (مااريده)
نجود:: رفل كومي ولي فوك مينطيج نوب رايده اكثر
اسماء:: رفل تعالي ابدلج
نجود:: اخذتها وراحت واني افكر منين تبدللها وهن مجابن اي شي من ملابس كمت لميت السفره وميعاد سوت جاي واني غسلت المواعين
نجود::لازم اروح للسوك
ميعاد:: وين اكو سوك الضهر روحي العصر
نجود::اي هو هم هيج
ميعاد:: اكلج شفتي وطن
نجود:: التفت عليها وهزيت راسي ورجعت اغسل
ميعاد:: خلي يولي ميستاهلج
نجود:: بس اني استاهله اني حبيته وهذا الي بطني ابنه شلون راح يجي للدنيا واني حتى عقد محكمه ماعندي
ميعاد:: الله كريم حت لو مسجلينه هسه بس اولدي وراها يصير خير
نجود:: وين أولد! اذا بالمستشفى لازم مستمسكات واني اي شي ميثبت مزوجه وطن غير عقد سيد ومن طلكني اخذه
ميعاد:: وانتي وين جنتي ليش مجبرتي يعقدلج محكمه
نجود:: واني عشت يمهم بمصايب أكثر من الراحه الله يحلها
ميعاد:: يولي الاسبوع الجاي النتائج
نجود:: اعرف بس خايفه اني غيابي أكثر من حضوري بس لا واكعه
ميعاد:: انتي توكعين لا هاهيه هو اذا اكو واحد راح ياخذ امتياز هو انتي مال ماكو
نجود::مخليه عينج عليه عما بعينج
صار العصر ور ت اخذت احمد ورحمه سحبت فلوس واشتريت ملابس للكل لاحمد ولمحمد ولصالح ولرفل والاسماء جنت فرحانه حيل مخليت شي مااخذته رجعنه للبيت لكيت أسماء لابسه من ملابسي ورفل لابسه بس شورت وتفتر شعراتها صفر و وكحه تفتر وتكتشف شكو بالبيت نطيتهن العلاليك كلمن اخذ ملابسه فرحانين بيهن
اسماء:: اشكرج جوجو من الخبصه نسيت اجيب ملابسي
نجود::. خلي يولي منريد كلشي منهم
اخذت ملابس ليست رفل ومشطتلها
كمت تمددت
مرت الايام واليوم النتيجه متوتره حيل افرك بيدي اروح منا وارجع منا كمزت كلت اروح للجامعه احسن اخذت ميعاد ورحت للجامعه مرت الدقايق والساعات والحمد لله ناجحه اني وميعاد طلعنه نركض ممصدكين
صعدتنه ورحنه للبيت بشرناهم وام ميعاد كالت اسويلجن حفله
واحته طايرين راح ميلاد جاب كيك وشربت وترتيبات واحته رتبنه الحديقه وزيناها واسماء ويانه والولد يعلكون بزينه والنفاخ جاب ميلاد كيكه طابقين وجاب حبشكلات رتبناهن صار المغرب وجبنا العشا بالحديقة جان احلا يوم كملنه عشانه وشغلنه اغاني ونركص كلنه حتى الولد اندك الباب راح ميلاد دخل وطن وفراس
وكفت مصدومه وطن شايل باقه مال ورد وفراس يمشي ورا
تقرب سلمو
تقدم عليه ونطاني الورد وحجه الف مبروك النجاح
نجود::شكرا اخذت الورد وخليته على الميز
تقرب فراس
فراس::: الف مبروك النجاح
نجود::يبارك بيك عفتهم ودخلت للبيت بدون كلام نص ساعه واجت ميعاد كالت راحو
نجود:شرايدين
ميعاد:: يباركونه بالنجاح
نجود:: شحجو
ميعاد:: مااعرف احنه عفناهم ودخلته ضلو بس هم والولد
نجود::يله كومي خلنطلع منربد نخرب حفلتنه من وره خلقتهم
طلعته ورجعنه شغلنه اغاني ونركص رحنه للكيكه كصصناها وكلت ميعاد وميعاد وكلتني
خلصت سنه من عمري بتعب وانشاء الله الجاي احسن وربي يعوضني
لمينه البيت واسماء طائره بينه وبابا اتحشنت حالته واخواني مكيفين بس مشكله وحده البيت صغير وجان بابا يلح نرجع لبيتنه القديم بس اني رافضه اخاف من عمامي وكارها هذاك البيت كاعدا بالحديقة خايفه انتقل واروح لبيتنه مااريد ارجع لذاك الضيم اذكرت المهر مالتي موكالو نشتري الها بيت ونسجله باسمها وينه لعد جريت التليفون ودخلت على صفحة فراس نجوود::هلوو من اشوف الرساله جاوب
ربع ساعة وجاوبني
فراس::هلا نجود خير خما اك. شي
نجود: هلا بيك لا بس حبيت اسلم عليكم شلونكم مشاعل شلونها
فراس::بخير انتي شلونج
نجود زينة فراس اريد اسألك سؤال 
فراس:: اسألي 
نجود ؛؛ من اجيت. خطبتو عمامي طلبو مهر الي وشيخكم كال الها بيت ويسجل بااسمها وينه!!
فراس: موجود بس لوتعرفينو ياهو تنصدمين
نجود:'شلون يعني!
عمامج خلو ابوج يبيع البيت مالكم واخذو فلوسو ومن سمع وطن راح اشترا ورجعو بااسم ابوج ونص بااسمج
نجود:: ها صدك عود
فراس:: اي والله بس احنا ماردنه نحجيلج ونزعجج اذا تذكرين مره من جابلج ورقه وكالج وقعيها هي هاي الي تثبت انو البيت الج نص بيه
نجود ': ها شكر الله يخليك لتحجي لوطن
فراس ؛: افا وانا اخوج شلون اكول
بس ليش ما ما محتاجه شي
نجود: بابا يريد يرجع بذاك البيت واني كارهته مااريد ارجع بيه اخاف منه
وهذا البيت الي كاعدين بيه صغير حيل
فراس:: وانتي شعليج متخلينهم يرحون
نجود:: شلون غير اروح وياهم خما ابقى وحدي
فراس:: اها وحدج وزوجج وينو؟
يعني الزواج كذبه موو حتى تخلصين من وطن
نجود:: عزاا بعيني كمت افتر اروح منا وارجع منا عفته مجاوبته نص ساعه سمعت صوت التليفون رحت اخذته لكيته فراس
جاوبت
نجود:: الوو
فراس:: ياهلا وغلا بحرمتو لخوي
نجود:: بروح ابوك لتحجي كدام احد اني ماصدكت خلصت بروح امك لتحجي لوطن والله يجي ياخذني واني ماصدكت عافني وازوج
فراس:: كل عقلج وطن اجوز !!
ترا غصباً عليه لوما اخت صديقو واجت ترجتو ودخلت دخيله مايجوزها
نجود:: ليش اني موشفته شلون لازم أيدها بالمستشفى وطاير بيها
فراس:: والله انتي عقلج محدود هو من شافج لزم أيدها
نجود ؛: هسه اني شعلي هو مو طلكني بروح ابوك لتحجي لااحد والله تعبت من عيشتكم
فراس:: بس شلون ابنج شلون يبقى بدون جنسيه ؛!! لتفكرين بس بروحج
نجود:: اي ميرييد جنسيه
فراس:: فكري بيها نجود وراح جيابه واحتمال عمليه منو يخليج تدخلين مستشفى وانتي ماكو شي يثبت زواجج!!
محد راح يستقبلج بس خلي يكطع مهر وراها من اجيبين اطلكي
نجود:: اي وياخذ ابني ويحرمني من شوفته
فراس:: مو بكيفه القانون وياج وحتى العشاير ميكدر ياخذو
نجود:: خليني هسا افكر وبراها يحلها الحلال
فراس:: تمام أخذي راحتج
نجود: سديته ونخبصت اخاف يحجي ويجي وطن يسحلني وياخذني وياخذ الجاهل مني
كمت طلعت لكيت ميلاد كاعد صافن كعدت يمه
فز وباوعلي ورجع لصفنته
نجود:: عرفوا جذبتي عرفوا اني مامزوجه وحامل من ابنهم
ميلاد:: شعرفهم اكيد انتي حجيتي
نجود:: شهكت اي اني جفصت بالكلام ويه فراس وعرف كلشي
ميلاد:: وانتي مجبوره تحاجين فراس
نجود:: يحجي وياي برود مرتجي راسه ع المرجحانه
اي مجبوره اريد اعرف وين اروح وكومه بركبتي البيت مالنه طلع مشتري من عمامي ومرجعه النه وهسا لازم نرجع نعيش هناك
من حجيت هيج كمز
ميلاد:: وليش ترجعون مقصرين وياكم مسمعينكم حجايه
نجود: لا بس البيت صغير واهلي مماخذين راحتهم
فرك راسه وحجه
ميلاد:: اني حبيتها والله حسيتها نصفي الثاني
بس هي مااعرف ليش رافضتني
نجود:: مني هي
ميلاد ؛: اختج اسماء والله حبيتها أكثر من روحي
نجود ': بعدني مارديت اجه صوت من وراي
ام ميعاد:: والله حلوه ماضلت عليه غير ناخذ مطلقه لا ابني الوحيد والله عرفتهن حيايه وراح يبثن سمهن علينه نجود لمي ملابسكم وانكلعو منا الضاهر انتو ميجي يعينكم الطيب..
نجود :: ‏"يعز علي إغلاق الباب الذي تمنيت أن يظل مفتوحًا، لكنني تأذيت."
يتبع...
لاتنسون التصويت احبكم 🤗⭐⭐،