المتمردة وزعيم المافيا (باللهجة الجزائرية)

البارت 56

بنات شنهي هاذ التفاعل ؟؟؟ فهموني برك يخي ماتسخرو  واااالو  علاه تقراو  وتهربو.. ماكمش رايحين تخرجو لي فوت من جيوبكم ولا من قلوبكم  راني مدايرة جهدي باش نكملكم الكرونيك كنت نحط ل 5 بارت في يوم شكون الكاتبة اللي راهي تحطلكم ب 5 ؟؟ولا مليتو من الكرونيك؟؟  منكذبش عليكم انا ماخرجتش عليا هكذا اذا كملتو هكذا نحبس انا ياربي 4 اللي راه يتفاعلو  معايا ويعلقو ع الاحداث 

طلت شمس هاذ النهار تحمل احداث جديدة وامال للبعض وخيبات للبعض .... ناض ادم من ضو الشمس اللي ضرب في غرفتو فاق بسرعة رغم تعبو وقلة نومو توجه للحمام استحم .. وقف متوال المراية يشوف في روحو وهو يفكر في جل الاعمال اللي واقعة على عاتقو بيسك تعب صح ومحتاج راحة حتى شعر عسلو ماكملش............ تبسم في الاخير ابتسامة كبيرة بيسك مالغري كلللشي عاشو حصل على حب معشوقتو هاذا كافي باش يريحو هو برك يحتاج وجودها الدائم بجنبو يكون هو بخير

توجه لخزانتو لبس لباسو المعتاد بدلة رسمية ضحك بالصوت كي تفكر لميس كي قاتلو الخفاش توجه لاختو اللي توحشها بيسك ماشافهاش لقاها تضحك مع الخدامات وهي توكل في فطورها بشهية وسعادة لا توصف

يارا : اععع اني متحمسة كي تجي لميس نقوللها

جاوبتها وحدة من الخدامات : اكييد راايحة تفرح

ادم : وش تقوليلها ؟؟

مشا باتجاه اختو وهو رافع حاجبو الايسر بلعو الخدامات ريقهم بخوف وسكتو كل وحدة تلهات بخدمتها .... حلت يارا عينيها على وسعهم ومشات بكرسيها المتحرك جيهتو فرحاااانة

يارا : ياااا ادم جيت ؟؟؟ تووحشتككك

طابس ليها حضنها بحنانة وهو يمسح على شعرها

ادم : وانا ثاني

بعد عليها وقعد جلسة القرفصاء مقابلها

ادم : وش الشي اللي تحوسي تقوليه للميس

يارا بغمزة : ههههه سسر

دغدغها بخفة : قوليلي انا ثاني انا خوك ولا جات هي داتلي بلاصتي

يارا وهي تضحك : هههه منقلكش ضك لازم لميس اللي تسمع اللولة ... حقا وين راهي لميس ؟؟

ادم بهدوء : اي في السبيطار

يارا بصدمة : شنههييي ؟؟ وش بيها ؟؟

ادم : مبعدا نقلك هيا ضك بدلي قشك ضك نروحو متوالها 

_________________________

في السبيطار وفي غرفة من الغرف  نلقاو لميس راقدة  ماحستش اصلا بضو الشمس اللي ضارب فيها ديراكت راقدة على سرير الرجل المتصاوبة وفوق السرير ولخرا خارجو شعرها طالع في السما وخدودها اكتسبو حمرة طبيعية من النوم مالغري كان وجهها مجرووح ومنفوخ من الضرب