المتمردة وزعيم المافيا (باللهجة الجزائرية)

النهاية

فوط + كومنتار

كان ادم لاهي يحاول يرضيهم في زوج ميليسا و بدر  ... بصح بدر طلق حلوقو البكا ماحبش يسكت مد ادم ميليسا ليارا تشدها وهز بدر يسكت فيه والو .. وزاد عاوناتو مليسا يبكو في زوج بكيتهم حارة كيما دارو معاهم محبوش يسكتو

زهرة : بلاك جاعو

ادم : وش نوكلوهم ؟!

صوفيا : 😂😂😂😂 وكلهم السلاطة

ادم :  والله ماني نضحك خالتي اني سيريو وش نمدولهم

صوفيا : الحليب وش راح يوكلو زعما

امر ادم الممرضات يوجدولهم بيبرونات باش يسكتو

صوفيا : بوووه عليييك كيفاش هاذي تشربهم الحليب الاصطناعي ... لازم يذوقو حليب امهم

زهرة : ماريا نوضيها  ترضعهم مساكن جااعو

ادم : بلاااصتك ... لاه تنوضها ان شاء الله خليوها ترقد اللي فوتاتو ماشي قليل

صوفيا : والاولاد يموتو بالشر !؟

ادم : هاهو الحليب يشربو كي تنوض يرضعو  .... يكفيها تعب لليوم

زهرة : يخااه عليك .. لازمهم اول حاجة تعقب على ريقهم حليب امهم باش يجو حنان عليها

ادم : انا اللي عندي قلتو تنوضوها ماتفراش .. خليهم يبكيو يبكيو كي يعياو يسكتو وحدهم

شافت زهرة وصوفيا في بعضهم ... كانوا كلهم يخزرولو فهمو اللي حبو ليها تجاوز كل الحدود راحتها اولى من راحتو وراحت صغاارو

بقاو يهديو في الاولاد وهوما حلفو لا يسكتو  ساعات يمصو صباعهم ساعات لاسوسات ... خرج ادريان وامير وسراج لبرا .. وماريا ويارا وميرا خرجو متوال الباب يتوانسو وصوت الصغار كلما يزيد مساكن جيعانين بقا ادم يخزر فيهم وهو يلاغي ويسكت وووااالو ...

الطبيبة  : يااا هاهي ناضت مماكم ... ضك تشبعو كريشااكم وتننيو

شافوا كلهم باتجاه لميس اللي حلت عينيها بتعب راح ادم يجري ليها وجاس القرفصاء مقابلها شاد يديها في زووج ويمسح على شعرها ويمرر اناملو على خدها

ادم : سلامة راسك حببي ... ماتزيديش تخلعيني عليك .. منحبكش تفارقيني دقيقة

غمضت عينها وتبسمتلو بتعب

لميس : ا...اامير!!

ادم : لباس ماتخمميش .. كي نرجعو نحكيو فهاذ الموضوع ... حبستيلي قلبي

لميس : اللطف عليك لاه هاذا

ادم : ماتزيديش تعاوديها وترقدي ذيك الرقدة الخايبة حسيت كأني فقدتك ومبقاش نزيد نشوفك

قبلها بخفة وهو يخزرلها بحب وهيام ... قاطع تأملهم في بعضهم صوت الصغار يبكيو يطالبو بحقهم هوما ثاني تبسم ادم