အမုန္းမွသည္...ခ်စ္ျခင္းဆီသို႔(နာက်ည္းခ်က္မ်ားႏွင့္ အခ်စ္ကိုဖန္ဆင္းမည္)

🍁Part 33🍁

[Unicode]

ခွန်းဆက် ခြံထဲက ဒန်းပေါ်တွင်ထိုင်ကာ နှင်းဆီပင်များကြား အလုပ်ရှုပ်နေသူကို မမှိတ်မသုန် စိုက်ကြည့်နေသည်။ ဒီနေ့ သူရော မာန်ရော ဘယ်မှမသွား။ ပိတ်ရက်ဖြစ်သည်က တစ်ကြောင်း၊ project အသစ်နဲ့ပတ်သက်ပြီး ခွန်းဆက်က သိပ်နားမလည်သည်ကြောင့် မာန်ကရှင်းပြရန် ရှိနေသောကြောင့် နှစ်ယောက်လုံး အိမ်၌သာ ရှိနေကြခြင်းဖြစ်သည်။

လွန်ခဲ့သည့် နာရီဝက်ကအထိ မာန်နဲ့သူ ဧည့်ခန်းက အလုပ်စားပွဲတွင် ခေါင်းချင်းဆိုင်နေခဲ့ကြသေးသည်။ ယခုတွင်တော့ မာန်က အသစ်ရောက်လာသော နှင်းဆီပင်များကို စိုက်ရန်ပြင်ဆင်နေခြင်းဖြစ်သည်။ ခွန်းဆက် မာန့်ကိုကြည့်ရင်း သူ့အတွေးတွေက လွန်ခဲ့သော မနစ်၃၀က အချိန်ကို ပြန်ရောက်ရှိသွားသည်။

လွန်ခဲ့သော မိနစ် ၃၀။

ခွန်းဆက်၏ project နဲ့ပတ်သက်ပြီး နားမလည်ဘူးဟူသော စကားကြောင့် မာန်နဲ့ ခွန်းဆက် ဧည့်ခန်းက စားပွဲတွင် ခေါင်းချင်းဆိုင်ကာ ရှိနေကြသည်။ အန်တီမိုးက အလုပ်လုပ်ရင်း စားရအောင်ဆိုပြီး ပန်းသစ်တော်နဲ့ နဂါးမောက်သီး လာချပေးသွားခဲ့သည်။ မာန်က project နဲ့ပတ်သက်ပြီး ခွန်းဆက်ကို အသေးစိတ်ရှင်းပြနေသည်။ သို့သော် ခွန်းဆက်ကတော့ မာန်ကြိုးစားပမ်းစား ရှင်းပြနေသည်ကို အာရုံမရှိ။ မာန့်မျက်နှာကိုသာ ပြုံးပြုံးကြီး ထိုင်ငေးနေသည်။ ထိုသည်ကို မာန် သတိထားမိသွားကာ လက်ထဲတွင် ကိုင်ထားသော ဘောပင်ဖြင့် ခွန်းဆက်နဖူးကို တောက်ချလိုက်သည်။

"ဘာကြည့်နေတာလဲ... ငါ့မျက်နှာမှာ project နဲ့ပတ်သက်ပြီး ဘာမှမရှိဘူး"

"ရှိသွားအောင် အဲ့စာရွက်တွေ မျက်နှာမှာကပ်ထားလိုက်ပါလား"

ကန့်လန့်ပြန်မပြောရလျှင် ခွန်းဆက်ရောင်နီ ဘယ်ဟုတ်ပါတော့မလဲလေ။

"ခွန်းဆက် ငါနောက်တစ်ခါ ထပ်မရှင်းပြဘူးနော်"

"မရှင်းပြလဲနေလေ...ကုမ္ပဏ်ီ ဒေဝါလီခံသွားရင် ခင်ဗျားလုပ်တာလို့ daddy ကိုပြောလိုက်မယ်"

"မင်း! "

"ဘာလဲ ဘာလဲ"

"တော်ပြီ သေချာနားထောင်... အစကနေပြန်ပြောပြမယ်"