Beloved Bastard
Rafael Certeza
Villa Aurelia
Hindi ko napigilan ang pagkuyom ng mga kamao ko habang tahimik kong pinagmamasdan sina Ivan at Jako sa may portico.
Palabas na sana ako nang mapahinto ako at nakita ko na seryosong nag-uusap ang dalawa.
Hindi ko na narinig pa ang mga naunang pag-uusap nila pero narinig ko ang pag-uusisa ni Ivan tungkol kay Isabel.
Hindi nakaligtas sa akin ang paghawak ni Jako sa kamay ni Ivan na mas lalong nagpatindi ng inis na nararamdaman ko.
Mabilis akong naglakad pabalik sa silid ko. Hindi pa ako nakakapasok ay narinig ko na ang masiglang halakhak ni Ryle habang nakikipagharutan siya kay Nana Sita sa may sala.
Napahugot ako ng malalim na paghinga saka na ako nagtuloy sa silid ko.
Naihilamos ko ang mga palad ko sa mukha ko saka ko naalala ang nangyari sa amin ni Isabel.
Four Years Ago
2015
Halos isang taon na ako sa San Isidro nang makilala ko si Isabel. Serbidora siya sa isang kilalang kainan sa bayan.
Nakuha niya ang atensyon ko dahil sa pagiging palangiti at maasikaso niya sa mga customer nila.
Sa kalaunan ay nagkapalagayan kami ng loob dahil na rin sa madalas na pagpunta ko sa kainan na iyon.
Napag-alaman ko na anak pala siya ng isa sa mga trabahador sa kabilang hacienda.
Dahil sa taglay niyang ganda sa kabila ng simpleng ayos niya ay madalas siyang nababastos ng mga walang modong lalaki.
Madalas ay ipinagtatanggol ko siya dahil hindi ko maatim ang pambabastos sa kanya.
Nagiging kumpulan tuloy kami ng tukso ng mga kasamahan niya sa trabaho.
Hindi iilang babae na kasamahan niya ang nagpakita ng motibo sa akin ngunit dahil napapansin nila na tanging kay Isabel lang ako magiliw ay sumuko kaagad sila.
Napansin ko rin naman ang mga kakaibang titig at ngiti niya sa akin ngunit hindi ko naman binalak na palawigin pa ang kung ano mang namamagitan sa amin.
Hindi ko kayang lampasan ang pagiging magkaibigan namin dahil sa mga panahong iyon ay okupado na ni Ivan ang puso't isip ko.
Hanggang sa nalaman ko na lang na may nobyo na pala siya. Madalas ko siyang nakikita na dumadayo sa Hacienda Aurelia dahil ang trabahador namin na si Nestor ang naging boyfriend niya.
Dahil kilala naman ako ni Nestor ay hindi naging hadlang ang relasyon nila sa pagiging magkaibigan namin ni Isabel.
Ngunit may isang problema kay Nestor. Sa tuwing nalalasing siya ay mahilig siyang makipagbasag-ulo. Hindi na iyon bago sa kanya lalo na kapag nadadayo sila sa bayan.
Lumipas ang mga araw ay naging sakit na ng ulo ni Isabel si Nestor. Hanggang sa lumapit na siya sa akin na umiiyak at sinabi niya na nais na raw niyang hiwalayan ang nobyo niya.
Hindi pumayag si Nestor kaya nagpatuloy ang naging relasyon nila. Hindi ko naman nais na makialam sa problema nila ngunit paminsan-minsan ay pinagsasabihan ko si Nestor na ikinagagalit niya sa akin.
Hindi na rin niya nagagampanan ng maayos ang trabaho niya at naramdaman ko na rin ang paglayo ng loob niya sa akin.
Sumunod na nalaman ko ay sa kabilang hacienda na pala siya nagtrabaho nang hindi man lang nagpapaalam sa akin.
YOU ARE READING
Beloved Bastard (Completed)
RomanceNine years old si Ivan nang una niyang makilala si Rafael, ang binatilyong ampon ng lola niya. Kinaiinisan niya ang pagiging malapit nito sa mga magulang niya lalo na sa kanyang ina. He was seventeen nang makita niya sina Aurelia at Rafael na may g...
