[ Unicode ]
ဒီနေ့ဝင်မည့် အတန်းချိန်တွေအတွက် စာအုပ်သုံးလေးငါးအုပ်ကို ကျောလွယ်အိတ်ထဲပစ်ထည့်၊ ဖုန်းကို ဘောင်းဘီအိတ်ကပ်ထဲထိုးထည့်ကာ အားသွင်းထားသော power bank ကိုပါ ဖြုတ်လိုက်သည်။ မျက်ကပ်မှန်ကို မမေ့မလျော့တပ်ပြီး အင်္ကျီလက်ခေါက်ကို ပင့်တင်ရင်း လှေကားပေါ်ကဆင်း၍ လူတစ်ယောက်မှမရှိသည့် အိမ်တံခါးကိုသော့ခတ်လိုက်သည်။
ကားပေါ်မတက်ခင် နှစ်ထိပ်တိုက်အိမ်ကြီးကို မော့လျက် ဝေ့ကြည့်မိသေးသည်။ စျေးအကြီးဆုံးသော ကြွေပြားတွေ၊ တော်ဝင်နန်းတော်တွေမှာ တပ်သလိုမျိုး မီးဆိုင်းတွေ ထည်ဝါအောင်သုံးထားသော်ငြား နွေးထွေးမှုအရိပ်အယောင်မရသည့် ဤတိုက်ကြီးအား လွန်း မနှစ်ခြိုက်ပါ။
တစ်ချိန်က မိသားစုသုံးယောက်စုံလင်ခဲ့ဖူးသည့် နေရာအရပ်က ယခုတော့ဖြင့် တိတ်ဆိတ်ခြောက်ကပ်ကာ သုသာန်နှင့်ပင် တူနေသေး၏ဟု မတွေးအပ်တာတွေတွေးမိသည့်အခါ....
တစ်ဝက်ဖွင့်လုဆဲဆဲကားတံခါးကို ပြန်ပိတ်၍ အိမ်ရှေ့ဉယျာဉ်ငယ်လေးဆီကို ခြေလှမ်းမိသည်။
ဖူးငုံစိုရဲနေတတ်သည့် နှင်းဆီပန်းနီရဲရဲလေးတွေ ခြောက်သွေ့နေခြင်းသည် ပြုစုယုယမည့် ဉယျာဉ်မှူးမရှိတော့သည်ကြောင့်ဖြစ်သည်။ မေမေရှိစဉ်ကတော့ ပန်းပွင့်ဖူးလေးများသည် ရေစက်ရေသီးတို့ဖြင့် အစဉ်လတ်ဆတ်နေတတ်၏။
လွန်း ရှစ်တန်းအရွယ်ကမေမေတခုတ်တရပြောဖူးတဲ့ စကားအား အမှတ်ရမိတော့ ရင်ထဲမှာဆစ်ခနဲမျက်ရသည်။
'အထီးကျန်မှုတွေကို ပန်းလေးတွေနဲ့စကားပြောရင်း ဖြေသိမ့်ရတယ် လွန်းရဲ့၊ ပန်းလေးတွေက လူစကားနားလည်တယ်'
အပြင်လောကနှင့်ထိတွေ့မှုရှားသည့်၊ စီးပွားရေးလုပ်ငန်းရှင်ကြီး၏ ဇနီးဖြစ်သည့်မေမေက သူ့ရင်ထဲကအထီးကျန်မှုတွေကို ပန်းလေးတွေကိုကြည့်ရင်း ဖြေသိမ့်ခဲ့ရရှာမလား.....
မိသားစုထက် သူ့ကုမ္ပဏီ၊စီးပွားရေးကို ပိုချစ်၊ပိုသံယောဇဉ်ဖြစ်သည့် လွန်းဒယ်ဒီက လုပ်ငန်းရှင်သူဌေးကြီးပီပီ တရားဝင်ဇနီးသည်အပြင် တခြားအငယ်အနှောင်းအပျော်အပါးတွေနဲ့ မကင်းခဲ့ပါဟုဆိုလျှင် အများတကာက 'ဒါဖြစ်တတ်တာပဲလေ၊သူက ပိုက်ဆံရှိတာကိုး'ဟု ဆိုကြသည်။
