🔥 My boyfriend is so hot🔥
Ch - 6
1.
အီးစီကောင်းမှုအကြောင်းပြု၍ အညိုက ကျန်သည့်အတန်းချိန်များကို ဆက်မတတ်တော့ဟုပြောလာသဖြင့် ကိုးခမြာ အညို့စိတ်တိုင်းကျ ဖြစ်ခွင့်ပေးရတော့သည် ။ ထိုအခါမှ တစ်လျှောက်လုံးသုန်မှုန်နေသော အညို့မျက်နှာက မှိုရသကဲ့သို့ကြည်လင်လာပြီး
" ကိုး .... ငါတို့ KTV သွားရအောင်ကွာ ..... သီချင်းသွားဆိုကြမယ် "
ဟု ပြောသည် ။ အညို့စကားကြောင့် မျက်မှောင်ကြုံ့လိုက်ပြီး
" အညို .... မင်းကလည်းရှုပ်ရှုပ်ယှက်ယှက်ကွာ .... သီချင်းဆိုချင်ရင် ငါ့အိမ်လိုက်ဆိုကွာ "
ဟု ပြောလိုက်သည် ။
သို့သော် ....
အညိုကလက်မခံ ။
" မင်းမလိုက်ရင်ပြန်ကွာ .... ငါ့ဘာသာတစ်ယောက်ထဲသွားမယ် "
ဟု ပြောကာ ပတ်ထားသော Seat Belt ကို ဖြုတ်သည် ။
ဘဝတွင် အညိုသည်သာတစ် ၊ အညိုသည်သာနှစ် ၊ အညိုသည်သာအရေးအကြီးဆုံးဟု သတ်မှတ်ထားခဲ့သူဖြစ်သောကြောင့် ကိုယ်တော်ချောကို တစ်ယောက်ထဲမလွှတ်လိုက်နိုင် ။ သက်ပြင်းချ၍
" ကဲ ပြော ..... ဘယ်နေရာကိုကြွတော်မူမလဲ "
ဟု မေးလိုက်သည် ။
2.
အညိုက အညိုတို့အုပ်စုကပိုင်သော KTV သို့သာလာရန်စိတ်ဆုံးဖြတ်လိုက်သဖြင့် ကိုး ခေါင်းပေါ်မှအထုတ်ကြီးကျသွားသည် ။ အညိုကမူ ဤသည်ကိုသိဟန်မတူ ။ ဆိုဖာပေါ်တွင် အကျအနထိုင်ကာ သီချင်းရွေးနေသည် ။ သီချင်းရွေးနေသော်လည်း မည်သည့်သီချင်းကိုမှ ကီးဝင်အောင်ဆိုတတ်သူမဟုတ်သလို မည်သည့်သီချင်းကိုမှလည်း အလွတ်ရသူမဟုတ် ။ ထို့ကြောင့် အညို့ဘေးတွင်ဝင်ထိုင်လိုက်ပြီး
" သီချင်းရွေးပြီးတော့ မင်းကကီးဝင်အောင်ဆိုမှာမို့လို့လား "
ဟု မေးလိုက်သည် ။ ဤမေးခွန်းကို အညိုက
" ငါရတဲ့တစ်ပုဒ်တော့ရှိတယ်လေ "
ဟု ပြန်ဖြေရင်း မိုက်ကိုကောက်ကိုင်သဖြင့် ရှေ့လျှောက်ကြုံတွေ့ရမည့်အဖြစ်အပျက်များကိုကြိုတွေးကာ စိတ်ထဲမှဘုရားစာရွတ်လိုက်မိသည် ။
