.
النيشان ؛ الغرفة ؛ الذهب ؛ الأخشاب وكل شي من بغداد لأن تعرف اصلي بغدادي وهي حبت تكون ذكرى حلوة رادت زفافنا يكون بغدادي بكل عاداته ولمساته هيج جانت رغبتها واني ما عارضتها ورحنا لبغداد جانت من أحلى الأيام ورجعنا للموصل بعد ما جهزنا كل شي واستعدينا لحفل الزفاف إلي جان مقرر يصير ورى اسبوع بس ...حاولت أتذكر عقلي حسيته وكف
حلقة ناقصة
انفعلت وغضبت لأن ما أتذكر كل شي مبهم كل إلي أتذكره رجعنا للموصل أيدي بيدها فرحانين وضحكتنا مالية الدنيا فرح
لمياء وينها من بعد هاليوم وشنو إلي صار ووصلت لغيبوبة عمت عيوني لمدة خمس سنوات
يا ترى وينج يا لمياء وينج بهالسنوات
وصرت اكل بنفسي وأتسائل ورى اليوم هذا شنو الي صار وينها واني ويني من هالايام
الدكتور يراقب بصمت متأسف لحالتي
_ أهدأ ماكو داعي للتوتر راح تعرف كل شي بالوقت المناسب
_ ما أهدأ وين امي وابوي اريدهم ليش ما يجون يفهموني شنو الموضوع؟ شنو الي خافينه عني !؟
_ ماكو شي مثل ما كلتلك جاي يجهزون لطلعتك ومشغولين اليوم راح يجوك واني ردت ابتعادهم عنك حتى ما تتأثر نفسيتك بوجودهم بسبب البجي والذكريات
_ شلون تتعب نفسيتي منهم دكتور جاي تستفزني بكلامك اني مثل المسافر والمحروم من أهله أريد اشوفهم واكعد وياهم يفهموني يشرحولي إلي صار صارلك فترة واهمني بكلامك لا يكون انت إلي طلبت منهم يعوفوني حتى تبلش محاضراتك وياي لحتى تتحسن نفسيتي واتقبل حياتي من بعد الغيبوبة أفهم انه هذا واجبك بس ...
انفعلت حرت شسوي فركت عيوني أمنع دموعهن وانفعالي يزيد ما ينقص
توتر ؛ خوف ؛ قلق وماكو اي سبب واضح للعيش
حياتي مو هي حياتي اني بكابوس حلم مزعج مرعب تمنيته لو فعلا يطلع وهم وخيال بعيد عن الحقيقة والواقع
ضليت ادعي بداخلي وأكرر الدعاء بس لا هروب من الواقع مهما كان صعب ومهما كنت كارهه
هذا واقع هذي حياتك مجبور تكملها والله انطاني عمر من جديد حتى اعيش الباقي منه
رفعت راسي ومسحت دموعي وجنت ظان إنه الدكتور راح بس لكيته واكف فوك راسي
_ اني متفهم شعورك بس اصبر وانت كدها راح تعرف كل شي وحدك وبدون مساعدة أحد
_ ليش احس ورى كلامك ألغاز انت شنو تعرف كولي دكتور الله يخليك تعرف شي عن لمياء
اني حتى ما أعرف شنو سبب الغيبوبة وانتم مستغفليني وتاركيني اصارع افكاري وذكرياتي وحدي
انت كل شي ما تعرف عن شخص مات خمس سنوات ومن كعد عقله متشتت مايدري ناسه وين
اني ضايع وما فاهم شي
أقلها كولي اني وين بمحافظة الموصل لو محافظة بغداد اني وين بالضبط وشلون وصلت لهاي الحالة لمياء وينها بهالخمس سنوات كول اي كلمة وخليني ارتاح كعدت واني الهج باسمها انت دكتوري كم مرة سمعتني انطق هالاسم واكيد تعرف شكد عزيزة صاحبة هالاسم لدرجة واني فاقد كل احساس بالدنيا بس هي حيت هالروح وهالجسد الميت
هي الي خلتني اعيش واكعد من غيبوبتي دكتور اني على ضحكاتها حسيت بالدنيا
_ ما عندي اي إجابة عن أسئلتك بس راح اكولك أنت لا بمحافظة الموصل ولا بمحافظة بغداد لأن ببساطة أنت مو بالعراق !
وهنا توالت علية صدمة جديدة والجاي العن ...
_ انت ما انتبهت على الممرضين والممرضات والمستشفى كلهم يحجون بلغاتهم ماكو عرب الا قلة القليل
_ جنت مشدوه البال ما انتبهت انت الشخص الوحيد المركز وياه بكل حواسي حتى افهم حياتي
كلامك وجلسات علاجك النفسي حتى تبث الأمل بروحي اليائسة خلاني أحاول أقنع نفسي واوهمها تكمل بلا روح ولا فايدة
_ ما مقبول منك هذا الكلام لازم تفرح لأن الله انطاك عمر جديد بعد ما فقدنا الأمل
واهلك تعبو وياك وهم منتظرين هالفرحة من سنين لازم تكوم على حيلك وتفرحهم أكثر واني كلتلك فترة اليأس مؤقتة وراها راح تعيش حياتك طبيعي بس اصبر هالفترة واني اعرفك بطل وانت من احد مرضاي الاقوياء
_ احسك خافي عني الكثير
_ ما اكذب عليك أعرف هواي أمور بس مو من صالحك ولا صالحي اني واهلك اكولك اي شي محتاج وقت وتفهم كل شي حتى بدون ما نحجيلك
كل الي اريده منك توعدني وعد إنك تسمع كلامي حتى تكوم على حيلك وما تنتكس حالتك
_ دكتور كولي شنو وضع حالتي العقلية أحس نفسي مجنون وانت جاي تجاريني يا ريت تفهمني
_ عادل انت مو مجنون عقلك سليم بس عندك فقدان ذاكرة جزئي ولفترة مؤقتة أحداث مهمة بحياتك ناسيها وهي الأهم بكل حياتك بس العقل بقدرة الله يخفي عنك الأحداث المهمة المؤذية إلي جنت رافضها ومعاني منها
مضيق عيوني انظرله بكل فضول العالم اريده يكولي اي شي عن لمياء بس ما ذكرها ومن شاف نظراتي المتسائلة
بعّد عيونه عني وانشغل بالأجهزة الطبية متهرب مني
_ الي افهمه منك إني ما راح أفهم شي لحد ما ترجعلي الذاكرة من وحدها وانت ما راح تكول الخبايا حتى ما تضغط علية واكيد راح تنطي خبر لأهلي حتى ما يذكروني
