ذاكرة الحب والحرب

٢٨

#البارت28
#ذاكرة_الحب_والحرب
#زهراء_محمد_السراي
*********

- قـال امـير المـؤمنين ؏ـلي ' عليه السلام '

تَمَسَّكْ بِكُلِّ صَديقٍ أَفادَكَ فِي الشِّدَّةِ. 🌼

المصدر : عيون الحكم والمواعظ 📚

رب كلمة عابرة يلقي بها أحد الناس فتصبح ذات إيحاء قوي في عقل الانسان وتراه مأخوذا بها حيث تصير حياته سلسلة من المحاولات لتحقيق ماجاء في تلك الكلمة.

- د. علي الوردي.

خولة

_أنت متأكد من إلي صار وي خالتك معقولة خال تدنى نفسه على بنات أخته.. حسبي الله ونعم الوكيل... معقولة اكو هيج نفسيات!

_كل شي اكو..

_زين وامك!؟ ليش ساكتات اثنينهن على خالهن..

_بنات صغار حبيبتي وين يروحن ابوهن عافهن وامهن ماتت والاقارب كلهم نبذوهن ومحد مستقبلهن غير خالهن النذل..

_أمك چانت تشتغل ببيت أبو مؤمل!!. مدااستوعب ولا اصدگ هالصدف!

_مو صدف..

_غزوان شنو الي يربطك وياهم ووصلك للانتقام؟

رجع يستعيد مخلفات الماضي بالذاكرة اللعينة من مخيلته..

الغرفة ظلمة ماكو كهرباء بالليل يعيشون على ضوء القمر وبالنهار الشمس تضوي كل ركن بالدنيا..

حسيته توتر وانزعج من مجرد السؤال والذكرى الي بلشت تحوم بداخل عقله مزقت كل حواجزه بالكتمان...

تركني بالفراش وحدي انزوى بزاوية الغرفة واتكىء براسه على الحايط.. وبچى ونزلت دموعه على خدوده

_مااگدر اواجه الماضي ولا اواجه نفسي وحقيقتي... ليش تعذبيني بأسئلتچ!؟ تدرين بكل سؤال انجرح ألف جرح..

شلت راسي من المخدة وباوعتله..

_ردتك تشاركني كل شي بگلبه.. ردت أكون حاضرة بماضيك وحاضرك ومستقبلك حتى نكمل سوى للأبد... لمن تحچيلي بماضيك راح تكون آخر ذكرى ونقاش ومن بعدها نختمه ونغلق صفحته...

_أمي جانت
تشتغل ببيت ابو مؤمل لأن جانو ابو مؤمل واهله كلش زناكيل ابو مؤمل جان مراهق بعده ما متزوج ومن بنية لبنية علاقاته كلها محرمة وعابرة

وأحد هاي العلاقات بأمي...
أمي الي انهزمت من خالها إلي راد يستعبدها جنسيا هي واختها.. بس هي رفضت تخضعله وتخالف فطرتها.. ماتقبلت هالشي وما سمحت تكون عبدة اله... ولگت المأوى عند أبو مؤمل إلي اغواها بكلامه المعسول ووعوده الكاذبة... عيّشها أحلام وردية خيالية خلاها تسافر وتغوص ببحر من الأحلام.. سهل يكذب عليها وهي بعمر صغير حرج وبوضع كارثي مالها أهل ولا اكو أحد يحتويها چانت تنشد الأمان ولمن سولفتله عن قصتها بكل حذافيرها استغل هالشي أكثر واكثر... غراها بالهدايا والفلوس والحب والأحتواء وتدريجيا گدر يسلبها اعز ما تملك.. حتى خوفها منه خلاها تتخلى منه وتسلمه نفسها..