.
_ اني أخاف من المريض الذكي الي يسرق الأفكار من عقلي
_ راح افقد آخر ذرة من عقلي وصبري بسببك انت منو سمحلك تبعد أهلي عني مااريد صحتي كل الي اريده افهم حياتي شلون صايرة شنو المصيبة الوصلتني لهنا ليش ما تحجيثارت أعصابي من برودة هذا الدكتور وردت استفزه مثل ما استفزني وجاي يلعب على أعصابي بحجة محافظته على صحتي
شمرت كل الأجهزة الي جاي يشتغل بيها
باوعلي بنفس نظراته الباردة واني كمت اي شي يمي اكسره واشمره عليه
واصيح عليه واغلط وراها ما حسيت بيه من ضربني إبرة مخدرة خلتني أغيب عن الوعي
من بعد ما غابت عني الرؤية كعدت وفتحت عيوني بمكان جديد غرفة جديدة نايم على الجرباية
ريحة أزهار طيبة ومنعشة أسمع زقزقة العصافير والجو بيه برودة ونسمات باردة وحلوة
شباك الغرفة يطل على الحديقة والورود الحمرا ظاهرة شفتها وتذكرت هاي الأزهار عشق لمياء تحب هالورد وهاللون
وينج يا لمياء معقولة تركتيني !
نهضت وخاصرتي متشنجة وبعدها آلامي مجتاحة كل جزء من جسمي
ثواني ودخلت امي ووالدي والواضح امي جانت تبجي ومن شافتني زادت بجي .. ووالدي متغير وتعبان
ماادري منين أبدي ومنين ابلش بالأسئلة
_ يابة انتم سافرتو على مودي ؟
للعلاج؟
وهسة نكدر نرجع لبلدنا مااحب الغربة
إثنينهم ساكتين واحد يباوع للثاني وعيونهم تحجي أشكال وألوان
_ وراح أسألكم السؤال الي سألته الف مرة شنو الي صار وياي ولمياء وين !؟
وهذا الدكتور خبلني معليكم بيه لا تمشون على كلامه كولولي كل شي
بس كولو لمياء ما كدرت تسافر وياكم مو ؟ اي أكيد ما تكدر وهسة هي بالعراق وبالها يمي قلقانة زين انتم تتواصلون وياها وشلون جانت حالتها من عرفت بغيبوبتي وهسة راح تفرح من تدري صحيت
اني متأكد هي قلقت علية اعرفها عاطفية وتحبني أكثر من أي شخص بالعالم يا حبيبتي شلون كدرت تتحمل خمس سنوات هي بالعراق واني بالغربة وفوكاها بغيبوبة رجاءا إذا ما منطيها خبر خلوني اني اخابرها بنفسي
_ منو لمياء ؟
_ شبيك يابة ؟ لمياء . . لمياء خطيبتي شنو السالفة يمة كولي شي
امي لزمت ايدي وكامت تطبطب عليها تحاول تهدأني
_ ماما انت أرتاح هسة وبعدين نسولف
_ لا تخبلوني أكثر ما اني متخبل لمياء وين ما تحجوننن
امي تبجي وابوي ثابت بقراره ...
_ ابني ماكو لأي إنسانة بحياتك إسمها لمياء أثر الغيبوبة هو الي خلاك تتوهم
وخرت الشرشف وكمت منفعل كمت اصيح واعيط لحد ما انشحط صوتي افهم واقنعهم وهم مصرين على كلامهم
ردت امشي رجلية ما عانتني بعدني مكرم
كمت اضرب على رجلي بقوة ردتها تعيني حتى اكدر امشي ما كدرت للاسف ووكعت بالكاع ..
_ لك ابني ليش تتعبني وتتعب نفسك امحي هاي الأوهام من دماغك ماكو لمياء ماكو
عقلك اخترعلك هيج شخصية بسبب الغيبوبة ما تكولي ليش معذب نفسك
تركت ابوي وحاولت أأثر على امي
_ يوم انتي ما تتذكريها لمياء ام الضحكة الحلوة انتي جنتي تحبيها والكل يحبها كوليلي وينها
هزت راسها بنفي
_ ماكو عادل ماكو لمياء
واصرو على كلامهم وهنا عرفت هذا الكلام ملقنة الهم الدكتور
بين ليلة ويوم كعدت من غيبوبة على حياة جديدة وبلد جديد
على حافة من الانهيار والجنون
كل ظني كعدت من نومي مثل كل يوم حياتي بسيطة خاطب البنت الي أحبها وبعد اسبوع نتزوج وكل شي ماشي بسهولة وبساطة وسعادة
عبالي اكعد واشوفها كدام عيوني بمنطقتنا
كل أحلامي انطفت ومحد راضي يفهمني
