#البارت17
#ذاكرة_الحب_والحرب
#زهراء_محمد_السراي
*********
- قـال امـير المـؤمنين ؏ـلي ´ عليه السلام '
في كُلِّ سَيِّئَةٍ عُقُوبَةٌ.
المصدر : عيون الحكم والمواعظ
"حتى الأحلام يجب عليها أن تقاوم للبقاء على قيد الحياة".
- دوستويفسكي 📕
خولة
أول يوم طلعت واخذونا لمصنع كلها لابسة اسود ومنقبة يعني هذا الشي لصالحي حتى محد يگدر يكتشفني بسهولة...
هواية مكائن للخياطة واقمشة سودة... طلعت للحمام بالگوة خلني اثنين بنات أطلع ولمن طلعت شفت بنت شكلها مو غريب علية چانت طالعة من غرفة وايدها على بطنها الچبيرة تتلوى من الوجع وشعرها ذهبي الشال وكع من اكتافها...
انسانيتي خلتني اركض عليها حتى اساعدها ولمن تقربت منها وسندتها من خصرها وتمعنت بالنظر لوجهها عرفت أنه هذي البنت شامو!!!
ليش بطنها منتفخة!؟. معقولة حامل!!. وما چان يَنراد الها سؤال.. چانت متوجعة واجت وحدة من الد1عشيات نترتني وگالت...
_لم يحين وقت الولادة أنها فقط تحاول جذب النظر اذهبي وساعدي البقية بسرعة و إلا امرت بعقابك واخبرتهم بتهاونك واهمالك بالعمل
شامو ما عرفتني لأن چنت لابسة نقاب... اجت الد1عشية ضربتها على وجهها فوگ الامها لأن ما ساترة نفسها وما مغطية شعرها وكاشفة عن وجهها
وما عرفت شنو قصة شامو وشنو الي صار وياها ووصلها لهاي الحالة!؟
تعرفت عليها قبل شهرين أول ما جابوني لسنجار واتذكر گالتلي ابوها عدموه وهي وامها واخواتها كلهن خمسة واخذوها وبعدوهن عنها وما تعرف عنهن شي ولا عن ازواج اخواتها المفقودين وگالتلي أنه أكبر اخواتها بعمري وعدها أربعة ولد اخذوهم د1عش للتدريب... ياترى لگت اخواتها وامها لولا!؟ شنو إلي صار وياها من بعد مافرقوني عنها!؟.
يعني إذا اعتدوا عليها قبل شهرين وحبلت ماتصير بطنها چبيرة...
وحفظت الغرفة إلي دخلت بيها شامو وقررت اغافل المراقبات إلي واگفات علينا بمصنع الخياطة وأطلع... بس واجهت صعوبة لأن چان اكو تشديد من قبل المراقبات علينا والوضع متوتر لأن شاكين بوجود بعض الجواسيس داخل التنظيم وزيادة بالإصابات... يعني من الأخير الأخبار فرحتني وحسيت اكو بصيص امل لأن القوات الامنية شادين حيلهم على د1عش وسمعت من كلام المراقبات إلي جانن يحچن بصوت ناصي بيناتهن حتى محد يسمعهن أنه اكو تدخل من أبناء العشائر العراقية الجنوبية وابناء باقي المحافظات وتطوع الكثير من أبناء الوطن العراقي تلبية لنداء المرجعية... وهذا الشي ما چانو د1عش حاسبيله حساب نهائيا ما توقعوا أنه بخطتهم لتدمير العراق وبداية من الموصل يخلي أبناء العراق يتكاتفون بإيد وحدة ويتحدون ويصيرون قوة وحدة رادعة لغياهب الظلم والطغيان الي انتهكت اراضينا وشرفنا وعزتنا... الحشد الشعبي چنت اسمع صدى هالكلمة تتردد... واكثر شي چان صادمهم قوة أبناء المحافظات الجنوبية وبكل عين صلفة چانو يسمون قوتهم على انها اجر_ام ويطلقون عليهم اسم السفا_حين...
