#البارت_التاسع_والعشرون
#ذاكرة_الحب_والحرب
#زهراء_محمد_السراي
*********
- قـال امـير المـؤمنين ؏ـلي ´ عليه السلام '
رِضَا اللهِ سُبْحانَهُ أَقْرَبُ غايَةٍ تُدْرَكُ 💛.
المصدر : عيون الحكم والمواعظ 📚
ان الفرد العراقي يكون خاضعًا «مازوكيًا» عند مواجهة ما هو أقوى منه. بينما هو يكون غضوبًا «ساديًا» إذا واجه ضعيفًا.
- د. علي الوردي.
خولة
أبو غريب راح بسيارته گال" راح اجيب كم حاجة وارجع"
راح ورى شوية سمعنا صوته يبچي ويركض بهرولة يصيح غزوان الحگلي... طلعنا على صوته اني وخالة ام غريب...
شفت نزلو من سيارة عمو أبو غريب أربع شباب لابسين عسكري وشايلين واحد وياهم وحدة من رجليه مگطوعة وتجري دم وهو بالضيم حاله يلوع من الوجع وهم وجوههم متربة وتهد الحيل من التعب وشفايفهم مفطرة وبيضة...
أبو غريب لأن يعرف أنه غزوان دكتور فما چان غير يگدر يعالج المصابين من القوات الأمنية والي جابهم القدر لهذا البيت وهذا المكان البعيد والمنطقة المگطوعة...
غزوان دائماً حذر ونبه.. لف على خشمه وحلگه قطعة قماش واستقبلهم حتى يعالجهم وكالعادة العدة وادواته الطبية وياه على الدوام في كل مكان وزمان ما يگدر يتحرك خطوتين إذا مو وياه... عالجهم ويمكن چان هذا الشي الوحيد الزين بمهنته كطبيب... ردت فرصة تمكنني اتواصل وياهم بس ما گدرت.. وإرادتي ضعفت بسبب وضعي الصحي كحامل... چانت بطني كلش چبيرة والي يشوفني يعتقد إني حامل بتوأم...
بقو ثلاث أيام أهتم بيهم غزوان وعمو أبو غريب ومن بعدها راحو وضاعت هذي الفرصة من ايدي للأسف...
غزوان يوم عن يوم ينزعج بسبب تأخير وتعطيل السفر... موبايله دائما يخفيه عني شكد ادوره عليه ماالگاه مااعرف وين يضمه!!
اليوم أول بشهري التاسع والأخير بالحمل... بلشت أفقد صبري.. أريد موبايل اتصل بالضابط قبل لا انسى الرقم وعلى طاري النسيان والرقم... سجلته بالعكس بكل ورقة عندي واحتفظت بيه اني مااضمن ذاكرتي خايفة تخوني باللحظة من اللحظات
والسبب إلي يخليني أكتب أرقام الخط يالعكس او المگلوب حتى لا يشوفها غزوان ويشك بية ... للضرورة احكام حسب ما فهمني وگالي أستاذ عبد الكريم...
باليل حاولت مثل كل مرة من محاولاتي البائسة الفاشلة واني ادور على موبايل غزوان وهو نايم وما الگاه...
اليوم صممت حتى لو أبقى للصبح گاعدة المهم اگدر الگى موبايله لازم يكون ضامه بمكان...
والسبب الثاني الي خلاني مااگدر أنام ورم رجلية ووجعهن وبالگوة امشي واتحرك كلش ثگلانة... وبين ما چنت ادور بحذر تحرك غزوان وفتح عيونه..
