ذاكرة الحب والحرب

١

#زهراء_محمد_السراي
#ذاكرة_الحب_والحرب
#البارت١
*********

- قـال امـير المـؤمنين ؏ـلي ´ عليه السلام '

صِيَامُ الْقَلْبِ عَنِ الْفِكْرِ فِي الْآثَامِ
أَفْضَلُ مِنْ صِيَامِ الْبَطْنِ عَنِ الطَّعَامِ

‏-  لكل إنسان فكرته .
-  و أنت ما فكرتك ؟
-  فكرتي هي أن يدعني الناس و شأني !
       
- دوستويفسكي

ضحاتها رنات تدغدغ احاسيسي
ترن هذي الضحكات على مسامعي  واني مغمض   جاي استشعرها  يمي
تتحرك شفايفي  ببسمة تتكرر وتتوسع الى إبتسامة عريضة مليانة سعادة

حركة شفايفي بطيئة بس الابطأ منها حركة اجفاني
احس بثكل  جسمي

جاهدت أفتح عيوني بس ما كدرت كلما احاول افتح اجفاني يتسببلي صداع 

أنفاسي  مو منتظمة وأحس كل اعضائي متجمدة متقيدة مااحس بأي شي حوالية

بس ... !

روحي ترفرف بالحب والسعادة لمجرد ذكراها 
وانعاد  صدى   ضحكتها على مسامعي

همست بصوت ناصي

_ لمياء

بلعت ريكي وتنفست بعمق  أريد أشوفها متشوق لعيونها ولملامحها شنو سبب هذا الاشتياق
كلبي يتحرق  لرؤيتها  أحس روحي تكول صار دهر ما شايفها   متلهف ومتلوع لهذا اللقاء  ...

عكدت حواجبي  وحاولت اتذكر آخر مرة شفتها  شوكت جانت
يمكن البارحة أو قبل يومين

صداع برأسي قوي وركبتي متيبسة مااكدر احركها

معقول نمت هواي وفاتني الدوام  !؟
لو يمكن نمت بطريقة غلط خلت ركبتي تتشنج
بس ليش عيوني يوجعني والجفن ثكيل

بصوت اقرب للهمس صرت اناديها  اني مغمض عيوني وبحالة غريبة عجيبة

_لمياء لمياء وينج   ؟ 

كلبي زادت دكاته العنيفة وحسيت بصداع قوي وصوت اجهزة وناس هواي اغلب الكلام الي سمعته هو .. 

_كعد فاق من الغيبوبة  لك الحمد يا الله

وتحول صوت  الهمهمات والارتباك الى صوت بجي  وهذا البجي هو للفرح   أصوات كثيرة يا ربي كلها غريبة عني  وهي صوتها ماكو وينها لمياء  ؟

وجاهدت حتى أفتح عيوني بس جفني يا الله  ثكيل وصدري عليه جبال من  الهم والضيق والنفس بالكوة  اسحبها

مع صوت البشر هناك صوت  اجهزة غريبة

كررت مرة ثانية  بصوت  ونبرة واهنة وضعيفة ..

_ وينج لمياء أريد مي

هنا زادت  الهمهمات والأصوات   ومن بينها صوت امي وبجيها