#البارت24
#ذاكرة_الحب_والحرب
#زهراء_محمد_السراي
*********
قال الامام الصادق عليه السلام 💔
"إذا دعوتَ ؛ فظُنَّ أنّ حاجتك بالباب".
.:
"في مستشفى الطب النفسي لا يأتينا المرضى، بل ضحاياهم".
- جودي بلانكو 📕
"لا سند لك إلا نفسك، إياك أن تميل".
- نجيب محفوظ 📗
خولة
_الملتقى في الجنة إن شاءلله
مدفون في هذه البقعة من الأرض كل الاجابات على اسئلتج
والرموز السرية والارقام الي راح يساعدج أنتي وعلي تكملون مهمتي من بعدي
هنا وگع گلبي من الخوف ظليت لازمة الورقة وما مصدگة المكتوب بيها كاتبلي المكان المدفونة بيه المهمات برموز سرية هو علمني عليها حتى إذا وگعت بيد أحد محد يفهمها غيري
المكان نفسه المهجور والي محد يمر عليه الا نادراً
بس ليش يگول هيج معقولة انكشف!؟
طلعت اركض حافية وعبايتي الطويلة گمت اتعثر بيها ادور بين الوجوه لحد ما شفت صاير انذار لازمين اثنين من الجواسيس
لا حول ولاقوة الابالله العلي العظيم
نهاية الأستاذ عبد الكريم چانت الاستشهاد في سبيل الله
في سبيل حب الوطن والدفاع عنه... بسبب غباء وتسرع وخوف سعد راح وبلغ عنه وهم من دون أي شيء چانو شاكين بيه وعلى بعد خطوة صغيرة من اعدامه وساعدهم سعد،،، وموت عبد الكريم سحب الشكوك وشعبها أكثر واكثر حوالين سعد وعلي
ذولي الأثنين كثرت بيناتهم المشاكل وتبدل الوضع وهسة علي هو. إلي يريد يبلغ عن نفسه ويستشهد چان كلبه محترك تأثر أكثر مني بوفاة أستاذ عبد الكريم
عدموه هو وواحد ثاني گدام عيوني شفته ونظرات عيونه الأخيرة منعتني من النطق من البچي ومن أي ردة فعل تفضحني... اختبرني هذا الموقف بقساوة وضغط علية بعنف
انطحنت كل بوادري الدفاعية
مااگدر ابدي اي ردة فعل... ضميت كل احزاني بصندوق مظلم قديم حال الحزن من حالي... محد مهتم بيه ولا أحد داري عنه
تجمدت واگفة اباوع للمشهد وبكل مرة اني اوگف مكتفة ايدية لا بموت مؤمل ولا بموت شامو ولا حتى استاذي كلهم ماتو وما عرفت اساعدهم وانقذهم من الموت
ماعندي غير الحزن والدموع وبعض كلماتي ارثيهم بيها
واحد ورى الثاني خطفهم الموت مني ومنتظرة دوري وطال الإنتظار لا اني بقطار الموتى ولا بقطار الأحياء
لا اني ميتة ومرتاحة ورايحة وراهم ومتخلصة من جحيم د1عش
التقي بمؤمل اعتذر منه على كل لحظة ظنيت بيه السوء على كل لحظة فكرت بيها أنه تركني بأرادته لو انهزم وعافني متهرب من الزواج او يماشي رأي أهله
اعتذر واكرر اعتذاري على كل فكرة سيئة فكرت بيها
