#ذاكرة_الحب_والحرب
#زهراء_محمد_السراي
*********
خولة
بطريقي للدوام وانتبهت لحركة سيارة وراية التفت و شفته الولد جيرانا نزل جامة الشباك وكال
_ إذا حابة اوصلج؟ اشتغل بالمستشفى الي بصف مكان دوامج
_ لا شكرا
جنت افكر شنو يشتغل يشتغل بالمستشفى وبالصدفة الي خلته يشتغل الا بهاي المستشفى القريبة من دوامي
مشيت مبتعدة واحسه يراقبني وحاولت انفي هذي الفكرة عن بالي واهدأ من توتري المبالغ بيه والي ماله مبرر
خلصت ساعات الدوام الرسمي واجاني إتصال من حبيب قلبي
وبقيت طول الطريق واني امشي بين الطرقات والشوارع احجي وياه وبغير عالم
ما انتبهت السيارة الي رادت تدعمني بس بقدرة الله توقفت بآخر لحظة وطخت رجلي مجرد طخة ارتديت من إثرها وعطت
على الخط جان مؤمل مفزوع واني سكتت كلبي يدك سريع
_ الو الو خولة حبيبتي شنو صار وياج شنو هذا الصوت ليش صحتي
_ ماكو شي لا تقلق بعدين اخابرك
سديت الخط وانتبهت للضخم الي واكف كدامي بنظرات خالية من أي تعبير
_ آسف بس انتي طلعتي كدامي فجأة وعبرتي الشارع بدون ما تنتبهين للسيارات
_ ما صار شي
_ خليني اوصلج بطريقي
_ لا تسلم
_ لا هالمرة اعذريني لازم اوصلج
بما إنه إحنا جيران وهذا حق الجار عالجار
من بعد إصرار صعدت وياه بالسيارة واني أبد ما مرتاحة بس انحرجت منه
_ اني دكتور غزوان انتقلت قبل كم يوم هنا بالبيت مقابيلكم اني وخالتي
_ اها .. اهلا وسهلا
_ انتقلت بعملي لمستشفى حكومي قريب من دوامج شفتي الصدفة
هزيت راسي
_ اسمج خولة ؟
استغربت منين عرف أسمي!
_ اي
_ عاشت الاسامي كلش حلو هالاسم
_ شكرا
وصلني للبيت وحسيت الوقت الي قضيته وياه دهر..
هواية إتصالات من مؤمل جان كلش قلقان علية وعاتبني لأن خليته بقلق بدون توضيح وما كدرت اخبره أي شي عن هذا الي اسمه غزوان
