ذاكرة الحب والحرب

٥

#البارت_الخامس
#ذاكرة_الحب_والحرب
#زهراء_محمد_السراي
*********

- قـال امـير المـؤمنين ؏ـلي ´ عليه السلام '

رَحِمَ اللهُ عَبْداً راقَبَ ذَنْبَهُ وَ خافَ رَبَّهُ. 💛

المصدر : عيون الحكم والمواعظ 📚

"‏سيصل العالم إلى زمنٍ يُمنع فيه الأذكياء من التفكير حتى لا يسيئوا إلى الحمقى."

- دوستويفسكي

خولة

تونا ردنا نطلع ونصعد بالسيارة انفتح باب بيت جيرانا المقابيلنا وإلي ساكن بيه جارنا الجديد غزوان وخالته... مشاعر السعادة حسيتها انقبضت لمن طلع وطل علينا من خلف باب بيتهم بهيئته الضخمة المخيفة...

مؤمل لزم ايدي وصعدنا تهرب من السلام عليه واحنا بالسيارة گالي...

_خولة هذا جيرانكم ما اعرف ليش ما ارتاح اله ولا اطيقه

_ليش حبيبي!؟  بالعكس خوش ولد من اجة لليوم ما سمعنا عنه شي موزين وبعدين هو دكتور يشتغل بالمستشفى القريبة من شغلي وحسب ما سمعت أنه دكتور شاطر وعنده هواية شهادات عايش بس هو وخالته

رحت وياه لمطعم هادي وحلو اكلنا وتونسنا وهواية سولفنا رغم هو مقهور من قرار أهله وكلامهم بس ما هان عليه يشوفني حزينة وضايجة

لازم ايدي وحاضنها بكف ايده الدافي شگد حنون ورقيق بتعامله وياية ما يوم غثني ولا يوم سمعني كلمة قاسية چان مؤمل بالنسبة الي نعمة كلش جبير وعوض رباني من رب العالمين عوضني عن أهلي

وبهاي الفترة إلي عشناها بالخطوبة عشت ملكة زماني صرت احسد نفسي واخاف اگعد واكتشفه حلم وردي كل بنت تتمناه وبس اني عشته وبس اني تحقق وياية هذا الحلم

لمسته الحنونة على ايدي خلتني أدرك أنه حقيقة گدامي حضنت ذراعه وطلعنا من المطعم... الجو بالموصل بديع والهوا يلعب بشعري الكيرلي إلي چنت اكرهه وچنت احاول اسرحه بكل الطرق بس حتى اتخلص من التنمر... ما چنت أحب نفسي ولا أحب حياتي... حياتي المملة الكئيبة الرمادية المظلمة من بعد وفاة أهلي، صارت حديقة مزهرة بكل انواع الزهور لمن دخل لحياتي مؤمل

شگد مشينا بليلتها واني حاضنة ايده وراسي على جتفه ضحكنا وصوت ضحكاتنا چان اله صدى لأن الطريق إلي نمشي بيه خالي من البشر تقريباً

رفع ايدي لشفته وطبع بوسة وابتسملي..

_لا تضوجين من أهلي راح نتزوج ونفرح ومحد يخرب فرحتنا لا تخافين محد يكدر يفرقنا غير الموت

مدري ليش تأثرت يمكن صايرة عاطفية زيادة عن اللزوم.. دمعت عيوني وحضنته گمت ابجي وتمنيت أبقى بحضنه... تمنيت هاللحضة المليانة بدفو وحب  الدنيا كلها أبقى عايشتها للأبد... نگعت قميصه بدموعي وهو يضحك علية يخفي توتره وانزعاجه من دموعي يكره يشوف دموعي