#البارت_السادس
#ذاكرة_الحب_والحرب
#زهراء_محمد_السراي
*********
- قـال امـير المـؤمنين ؏ـلي ´ عليه السلام '
لَيْسَ لِمُتَكَبِّرٍ صَدِيقٌ 💛
المصدر : غرر الحكم ودرر الكلم 📚
"تترك وطنك فقط حين لا يترك لك مجالاً للبقاء."
- ورسان شاير ।📓
بداية سنة 2013
خولة
گعدت الصبح بدون أي حب للحياة... گلبي يوجعني بعد مؤمل عني دمرني صارت حياتي خاوية
جهزت نفسي شلون ما كان بآخر فترة صرت اتعاجز اسوي أي شي لروحي الكحل ما اخطه بعيني
طلعت لگيت زوجة عمو تجهز الريوگ لعمو... عمي متقاعد وعايشين على راتبه التقاعد
وحاليا عنده محل صغير واني ومرة عمو عدنا مشروع صغير لبيع الكيك ننشر بمواقع التواصل ونروج بس ما عدنا توصيل
چنت اني وماما وبابا الله يرحمهم نسوي كيك ونبيع وعن طريق هالمشروع الصغير نشأت علاقتي بمؤمل حسيت بغصة الم لمن تذكرته
ما غاب عن بالي لحظة راح من الإشتياق...
جهزت عمتي الريوك لعمو إلي چان گاعد على كرسي بالحديقة وگدامه ابنه يلعب بالطوبة وهو بملابس المدرسة منتظر سيارة أبو الخط...
_يلا خولة تريگي وي عمج
جريت نفس وزفرته بهدوء...
_لا عمة مالي نفس
عمو انزعج من وضعي..
_خليها خليها تنسل شوفي صارت شضعفه راح تنگطع من ورى مؤمل واهله... انتظري الولد يرجع من السفر وتفاهمي وياه يجوز أهله هم الي مخططين لسفره.. لويش هيج مأذية نفسج يا بنيتي والله العظيم ما يهون علية اشوفج بهالحال وابقى ساكت
اختلط العتاب واللوم وي نبرته الحادة
وعمتي نفس كلامه ومحد يعرف البگلبي شنو!! نار موجرة ما تهدأ
قبل لا أطلع سمعت أبن عمو يگول..
_خولة شايفة البزون السابع من البارحة ادور عليه حتى البزونة الأم فقدته ومن البارحة مخبوصة
_مااعرف حبيبي يمكن عابر على الجيران هسة يرجع هن هواية يفترن بالشارع والبيوت
_آخر مرة شفته دخل لبيت جيرانا غزوان
أبن عمي چانت عنده بزونة لونها برتقالي منقش بشهر شباط الماضي طلعت وغابت أيام وراها رجعت حامل
اخذناها لدكتور بيطري من جابت سبع بزازين نصهم لونهم برتقالي والنص الثاني أسود وابيض
