#البارت23
#ذاكرة_الحب_والحرب
#زهراء_محمد_السراي
*********
- قـال امـير المـؤمنين ؏ـلي ´ عليه السلام '
عَلَيْكَ بِالرِّضا فِي الشِّدَّةِ وَ الرَّخاءِ.
المصدر : عيون الحكم والمواعظ
" الحنين هو زائر المساء، حين تبحث عن آثارك فيما حولك ولا تجدها "
- محمود درويش 📓
خولة
أقوى وجع توجعته بحياتي الم الولادة والم القلب الي نزف من الحزن والغصة
غزوان حاول بكل طريقة يجيبني ما تركي أموت مثل شامو... وصلت الموت حرفيا وچنت متأكدة هاي نهايتي... كأني بحلم شفت بيد غزوان قطعة حمرة طلعت مني... ماكو صوت... هدوء يمكن هذا الهدوء هو بعد الموت بالعالم الثاني من بعد الموت وانتقال روحي لبارئها!!!
گدرت أرجع للحياة بصعوبة بعد غيبوبة ثلاثة أيام من فتحت عيوني حسيت بثگل على صدري وعيوني مثل المتحجرات... حتى شفايفي توجعني يابس ريگي وگعدت متشنجة لا يمي طفل ولا شي بالغرفة وحدي ويمي اجهزة طبية وصوندات ومااعرف شنو متشكل بايدية... گمت اسعل بقوة وروحي رادت تطلع
ومن تذكرت آخر حدث صار وياية من خالة غزوان راوتني مقطع الفيديو إلي يخص مقتل مؤمل گمت ابچي بونين يشگ الگلب صرخت صراخ حسيت حبالي الصوتية تگطعت وحنجرتي رادت تنفجر... مع كل صرخة الم تمنيت روحي تفارق جسدي وتغادر لمحبوبها تلتقي بيه وترافقه بس لا... الله ما كاتبلي هسة الموت
اصعب شعور حسيت بيه... گعدت من التعب اون... دخل علية غزوان وخالته نهرتني
گمت اهذي مااعرف شنو حچيت... بس چنت متألمة روحي مفرفحة اغلي
زاد حقدي عليه... خايف علية وحاضني يتوسل بية حتى اهدأ... زادت رعشة جسمي ونظرتله اتوعدله
حاقدة أكثر على غزوان وأسعى للانتقام منه
بس شلون!؟ اني ما چنت واعية واعرف شگد مرت أيام!؟
بعدين الا عرفت أنه چنت بغيبوبة وطفلي مات واستغربت من غزوان لمن گالي گام يبچي ويصبر بية
حاضني بقوة ويبوس براسي.. واني بغير عالم دموعي تنزل وساكتة مقهورة محترگ گلبي ويتكرر گدام عيوني مشهد ذبحهم لمؤمل مثل الذبيحة... مخيلتي اصتبغت بالدماء ومااگدر بأي شي ثاني غير موت مؤمل...
أريد انتقم بأي طريقة بأي وسيلة وعن طريق أي شخص مستحيل ارتاح
مرت أيام ضغطت على نفسي حتى أرجع للحياة غصباً عني... موت شامو ومؤمل حفزني وزاد شعور الانتقام إلي دايكبر بداخلي يوم ورى يوم بكل لحظة تمر علية استذكر الجرايم واموت الف موتة
