ذاكرة الحب والحرب

١٦

#البارت16
#ذاكرة_الحب_والحرب
#زهراء_محمد_السراي
*********

- قـال امـير المـؤمنين ؏ـلي ´ عليه السلام '

عَبْدُ الشَّهْوَةِ أَسيرٌ لا يُفَكُّ أَسْرُهُ.

المصدر : عيون الحكم والمواعظ

‏الحياة أقصر من أن يتّبع الإنسان أحقاده..

- أفلاطون 📗

"فليأت ما يأتي ؛ الزمن والساعة يجريان حتى في أسوأ الأيام ! "

- وليم شكسبير 📘

عادل

وبأحد الأيام... چنت مثل كل يوم واگف مقابيل بابهم إلي چان گدام باب بيتنا... اراقب بلكي تطلع واشوفها وگمت ادخن وباليوم باكيتين جكاير زين إذا كفن... وبليلة باردة والجو موحش... أهلي چانو مصدومين وزعلانين مني بنفس الوقت  ماچانو متوقعين أنه إني إلي تطلع مني  هاي التصرفات العدوانية الشرسة لأن يومية اطلعلي حجج من جوة الگاع حتى اتعارك وي هشام واليوم اني واگف ووجهي متزورگ ومتزاعلين وي اهل لمياء لأول مرة... وبين ما چنت واگف سمعت اصوات متوترة... طلع خال لمياء شايلها مثل الخرگة ويركض بلا وعي الرجال چان يبجي وهشام وزوجته وراه... من شفت لمياء بهالوضع عقل ما ظل براسي... اخذتها من خالها وصعدتها بسيارة أبوية وركضت للبيت اجيب المفاتيح... مااعرف شلون ركزت على الطريق وما سويت حادث

سوولها تحاليل عامة واستمرت حالتها الصحية بتدهور وتأجلت خطوبتها من هشام وظلو اهلها يركضون بيها من مستشفى لمستشفى وما صحت أبد

چانت الصدمة أنه لمياء مريضة بورم خبيث برأسها واكتشفوا هالشي متأخر

مااعرف بالضبط شنو إلي صار! بس كل شي تغير من بعدها لأن انلغى ارتباطها بهشام وهالقرار چان قرار ام هشام إلي چانت ماتريد ابنها يتورط بالزواج من بنت مريضة اما هشام فچان متأمل أنه تتشافى ويتزوجها بس إذا حالتها ميؤؤس منها ما يگدر يجازف بحياته...

بس اني چنت احس مشاعر مختلفة عن الجميع... خفت تموت واني ما عايش وياها ولا معبرلها عن حبي... الفكرة چانت مرعبة بحد ذاتها وزادت الصراعات أكثر واكثر لمن فتحت موضوع لمياء وي أهلي واصريت اتزوجها واتقدملها من جديد واهلها راح يوافقون أكيد من بعد ما هشام صرف نظر عنها

.
.
.

عودة  الى سنة  2014

خولة

اربعه ايام صرت بيها مخبلة وفاقدة الذاكرة جزئياًّ ماحاسة بشي من حواليا طفلة وتصرفاتي تدل على هذا.. بس هو ثبتلي أنه دكتور شاطر ومااعرف شلون رجعني لطبيعتي خلال اربع ايام...

ورى هاي الأيام صرت بحيرة اظهرله اني تحسنت لو ابقى ممثلة دور المجنونة!! 

وبين هاي الحيرة.. ردت اثبت ديني واعرف ايماني قوي برب العالمين.. لو ضعيف
محد راح ينقذني غير الله.
اني هاي فرصتي ابرهن لنفسي شنو هو ديني وشنو هو الايمان
يمكن بوقتها كفرت لمن فكرت  أنه  إذا ما طلعت من د1عش ودعيت الله وما ساعدني راح الحد... چنت احجي هيج وي نفسي وابجي من الندم على مجرد التفكير ورجعت استغفر لله مذلولة وندمانة ومستحية منه اني ما ملتزمة بديني ولا مقوية علاقتي بربي ويمكن لأن ايماني ضعيف الله عاقبني هذا العقاب حتى ارجعله بوقتها من بعد اليأس انفتحتلي فروجات بداخل گلبي مااعرف شنو هذا الاشعاع الداخلي الي مدني بطاقة روحية عالية طاقة وحماس كأنما تعاقدت وي رب العالمين والملائكة وكل من عنده جاه ومكانة يم ربنا الرحيم الملك... مااعرف من منو اجتني طاقة وقوة وايمان وصوت داخلي كأنما وحي يكولي ماراح يخيب ظن  من يلجىء لخالقه وراح يشوف العجايب...