အဓိကဇာတ်ကောင်Shouအဖြစ်မှ ကြမ်းရမ်းတဲ့Gongဘဝသို့ : Myanmar Translation (Unicode)

Part - {70}

[အတွင်းရေးမှူး : ကျွန်တော့်အထင် သခင်လေး နှစ်ရက်လောက်တော့ နေရပါမယ်။]

နှစ်ရက်။ သိပ်မကြာပေမဲ့ အချိန်အတိုင်းအတာ တစ်ခုပဲလေ။ ကျွန်တော် ဗာဒီဂါကို တစ်ရက်တည်းနဲ့ ရောက်သွားမှာပဲလေ။ ကျွန်တော် စာပြန်ဖို့ ပြင်လိုက်တယ်။

မနက်ဖြန်ကိစ္စ မနက်ဖြန်မှပဲ တွေးကြတာပေါ့။ ကျွန်တော့် အတွေးပေါင်းစုံနဲ့ အစိုးမရစွာ မျက်လုံးတွေ မှိတ်လိုက်တယ်။ ကျွန်တော်တွေးနေတာက အိပ်မက်ထဲမှာ မူလဟေးလ်ဗာဒီနဲ့ တွေ့ခဲ့ရင် ကျွန်တော် ဘာပြောရပါ့မလဲလို့။

***

အိပ်မက်ထဲ နစ်မျောသွားတယ်ဆိုတာက ကိုယ့်ကိုယ်ကိုယ် ရေနက်နက်ကြီးထဲ ခုန်ချလိုက်တာနဲ့ တူတယ်။ အနက်ရောင်လေထုက ကျွန်တော့်ရင်ဘတ်တစ်ခုလုံးကို ဝါးမြိုထားပြီး အသက်ရှူရ ခက်ခဲစေတယ်။ အရင့်အရင်ကလိုမျိုး မှောင်မည်းနေတာတော့ မဟုတ်ဘူး။ နောက်ဆုံးတစ်ခေါက်တုန်းကလိုမျိုး ဗာဒီစံအိမ် မြေအောက်ခန်းထဲ ရောက်နေတာ။

အနည်းငယ် ဖွင့်ဟထားတဲ့ သံတံခါးကနေ အလင်းရောင်က စိမ့်ဝင်နေတယ်။ ဟေးလ်ဗာဒီက ဒီနေရာမှာ ရှိနေသင့်တာလေ။

“မင်း ငါ့ကို အရင်လာရှာလိမ့်မယ်လို့ မထင်ထားဘူး။ မင်း ငါ့ကို အရမ်းမုန်းခဲ့တာလေ”

ဟေးလ်ဗာဒီက ဒီမြေအောက်ခန်းနဲ့ မလိုက်ဖက်တဲ့ ကုတင်ပေါ်မှာ မှီလျက် အနေအထားနဲ့ လှဲလျောင်းနေတာ တွေ့လိုက်ရတယ်။ သူ့လက်ထဲမှာတော့ စာအုပ်တစ်အုပ်က မလိုက်မဖက် ရှိနေတယ်။ စာအုပ်အဖုံးက အနက်ရောင်ဖြစ်နေပြီး စာအုပ်ခေါင်းစဥ်ကတောင် မလိုက်ဖက်တဲ့ ခံစားချက်ကို ပေးစွမ်းနေတယ်။

ဒီစာအုပ်က ကျွန်တော် တစ်နေရာရာမှာ အကြိမ်ပေါင်းများစွာ မြင်ဖူးခဲ့သလိုပဲ။ ကောင်းပြီလေ။ ကျောင်း အဆောက်အဦဟောင်းကြီးရဲ့ ကြမ်းပြင်ပေါ်မှာ ပြုတ်ကျနေတဲ့ ပစ္စည်းနဲ့ ဆင်တူသလိုတော့ ရှိတယ်။ မှောင်နေလို့ သေတ္တာသေးသေးလေး တစ်လုံးလို့ ထင်ခဲ့တာ၊ စာအုပ်ဖြစ်နေတာပဲ။

“ဟေးလ်ဗာဒီ”

“ဟုတ်ပါ့။ မင်းတွေ့ချင်နေတဲ့ ဟေးလ်ဗာဒီပါ၊ မစ္စတာအစားထိုးလေး”