အတ္တစိတ် || ဘာသာပြန် ||『Completed』

Chapter - 3

『Unicode』

အခန်း ( ၃ ) : ငါတို့နှစ်ယောက်ကြားမှာ ဖြစ်ပျက်ခဲ့သမျှကိစ္စတိုင်းကို လျှော်ပေးလိုက်မယ်။

※※※※※※※※※※※※※※※※※※※

ထင်မထားသော မိုးသက်မုန်တိုင်းကြောင့် လူအားလုံး ကေသရာဇာကျွန်းမှာ ခြေချုပ်မိနေတော့သည်။ ကံကောင်းစွာနှင့်ကာစီနိုဘေးတွင် ကြယ်ငါးပွင့်ဟိုတယ်တစ်လုံး ရှိနေသောကြောင့် ဧည့်သည်တွေအတွက် တည်းခိုစရာနေရာရှာဖို့ မပူရပေ။အခမ်းအနား နိဂုံးချုပ်သည်နှင့် ကျင်မိသားစုက ဇိမ်ခံကားတွေကို လွှတ်၍ ဧည့်သည်တွေကို တစ်သုတ်ပြီး တစ်သုတ်ဟိုတယ်သို့ ခေါ်သွားခဲ့သည်။

ကွဲလွဲစွာပင် ကျွန်တော်တို့ " ပြင်ပအမှုထမ်း " တွေကတော့ သိပ်ကံမကောင်းလှ။ ကျွန်တော်တို့ဟာ ရဲတိုက်ဘေးရှိ ဝန်ထမ်းအဆောက်အအုံ​၏ ယာယီခန်းတချို့မှာ နေခဲ့ရသည်။

ရဲတိုက်မှာ အလုပ်လုပ်ကြသော အလုပ်သမားများကသာ ဝန်ထမ်းအဆောက်အအုံကို လုံးဝဥဿုံသိမ်းပိုက်ထားသည်။အသုံးအဆောင်တွေမှာ တည်းခိုခန်းလောက်ပင် မကောင်းသည်မို့ ကြယ်ငါးပွင့်ဟိုတယ်အောက် အများကြီး နိမ့်ကျ​၏။အကယ်၍ ညလယ်ဘက် သန့်စင်ခန်းသွားလိုလျှင် ဓာတ်မီးတစ်လက်ကိုင်လျက် နှစ်ဆယ်မီတာလောက် လျှောက်ပြီး စင်္ကြံလမ်း အစွန်ဆုံးမှာရှိသည့် သန့်စင်ခန်းဆီသို့ သွားရမည်ဖြစ်သည်။

ကျွန်တော်တို့အတွက် နေစရာရှာပေးရန်တာဝန်ကျသော အလုပ်သမားရှောင်ခယ့်က ယခု အဆောက်အအုံ စင်္ကြံလမ်း​၏မီးတွေ ပျက်နေသည်မှာအချိန်အတော်ကြာပြီဖြစ်ကြောင်း ပြောပြခဲ့သည်။ အချိန်တစ်ခုလောက်ကတည်းက ပြင်ပေးရန်တောင်းဆိုထားပါသော်လည်း မည်သူမှ လာမပြင်ပေးကြ။ ဘာပဲဖြစ်ဖြစ် ကျွန်တော်တို့က သည်နေရာမှာတစ်ညပဲ တည်းမှာမို့ သည်းခံလိုက်ဖို့ ပြောလာတာပင်။

တည်းခိုစရာအခန်းက အထင်ကြီးလောက်ဖွယ်မဟုတ်သော်လည်း အနည်းဆုံးတော့ ကျွန်တော်တို့တွေ တစ်ယောက်ခန်းတွေ​ရခဲ့ကြသည်မို့ အတူ တိုးဝှေ့နေစရာမလိုတော့ပေ။ ဤသည်ကား ကံဆိုးလှသည့် အချိန်အခါအတွင်း အကောင်းဆုံးဟုမှတ်ယူလို့ရလောက်ပေ​၏။