The Ruthless CEO (Savage Beast #4)

Chapter 29

Hatol

Napatagal ang titig ko kay Cairo. Nanatili din naman ang lalim ng titig niya sa akin na para bang gusto niyang patunayan sa akin sa pamamagitan ng kanyang mga mata ang sinseridad ng kanyang mga sinabi.

Hindi ko napigilang tumaas ang isang sulok ng aking labi dahil sa pagpipigil ng aking ngiti. Kita ko ang dahan dahang pagkunot ng kanyang noo. "Why are you smiling?" seryosong tanong niya sa akin.

Napakagat na ako sa aking pangibabang labi. Konting konti na lang ay lalabas na ang ngipin ko dahil sa pagkakangiti. "Ang drama mo, Senyorito ha..." nakangusong sabi ko sa kanya. Nakita ko ang pagawang ng bibig niya dahil sa gulat. Hindi niya siguro inaasahan na sasabihin ko iyon sa kanya.

Nagigting ang panga niya ng makabawi at tsaka mabilis na nagiwas ng tingin sa akin. Mas lalo akong napanguso. "Hindi ako magkakacrush sa iba...pustahan pa!" laban ko sa kanya. Tinitigan ko siya pero nanatili na lamang ang tingin niya sa court. Nakakunot pa din ang kanyang noo.

Kinuhit ko ang kanyang braso. Sa simpleng pagkuhit ko duon ay mas lalo ko lang napatunayan na matigas iyon, alagang alaga sa workout. Siguro nagbubuhat ito? Magpabuhat kaya ako? Try lang.

"Uhmm. Galit ka po?" malambing na tanong ko. Baka lang naman madaan sa lambing.

Bahagya siyang umiling, pero nanatili pa din ang tingin niya sa court. Para tuloy siyang may kaaway duon. Napasulyap ako sa katabi kong si Charlie pero kagaya ni Cairo ay nakatutok siya sa may court ang pinagkaiba lang ay naghuhugis puso ang mga mata ni Charlie samantalang si Cairo ay parang ano mang oras ay mas lalabas ng laser sa mga mata at makakapatay ng kung sino mang taong mahagip ng kanyang mga mata.

"Charlie..." tawag ko sa kanya pero tumaas lang ang kilay niya sa akin.

"Charlie kumain ka ba?" tanong ko ulit. Para kasing kanina pa nakapako ang pwet niya dito. Nagaalala din naman ako sa kaibigan ako. Busog ako pero siya?

"Kumain na" tipid na sagot niya sa akin. Diosmio, parang takot na takot kumurap ang shuta habang nakatitig sa mga players. Inirapan ko na lang siya kahit hindi naman niya iyon nakita. Muli kong ibinalik ang tingin ko kay Cairo at nagulat ako ng makita kong nakatingin na din siya sa akin.

Matamis ko siyang nginitian pero inirapan niya lamang ako. "Ang sungit naman ng baby ko..." pangaasar ko sa kanya. Shuta! Biglang namanhid ang buong katawan ko. Hindi ko napigilan iyon, bigla na lang lumabas sa aking bibig.

Nagtaas siya ng kilay sa akin. Hanggang sa nakita ko ang dahan dahang pagtaas ng isang sulok ng kanyang labi. "Baby huh? Matapos mong hindi ituloy ang panunuyo mo sa akin?" masungit na tanong niya. Kumunot ang noo ko. Ano daw?

Mas lalo siyang napangisi ng manatili ang pagtataka sa aking mukha. "Pakuhit kuhit ka pa diyan..." bulong bulong niya kaya naman muling bumaba ang tingin ko sa matigas at matipuno niyang braso.

Hindi ko alam kung ano ang biglang sumapi sa akin. Basta mabilis kong niyakap ang braso niya at tsaka ko sinandal ang pisngi ko duon habang nakatingin sa kanya. Kita ko ang pagkabigla niya.

"Promise, wala akong magiging ibang crush. Ikaw lang" paninigurado ko sa kanya. Nanatili ang tingin niya sa akin, hanggang sa mapapikit ako ng pitikin niya ang noo ko.

"Siguraduhin mo, Tathriana. Pag ako may nabalitaan, uuwi kaagad ako dito galing Spain at paparusahan kita" pagbabanta niya sa akin. Imbes na matakot ay parang na excite pa ako.