|أسطورة نوميديا|
الفصل الأول: بين الأسطورة والواقع
[ الجزء 1 ]
تتدوز يدها بخفة فوق راس البنت الصغيرة، وتتعاود حجايتها لي تتعاود كل ليلة: "كان فواحد المكان وواحد الزمان ، تاجر غني، كل ناس القبيلة تتعرفو، مكان طالب من الدنيا والو، غير ذكر يورث اسمو ومالو من بعدو.
تزوج ثلاتة تاع النسا، اللولة ماتت فالولادة ومات معاها الذكر لي كان تيتسنى ، الثانية كان لسانها ماضي ودراعها گاضي، طلقها ورا شهر ورجعها لدار باها، إوا الثالثة ، مرا طيبة وقلبها بيض ، هازة التاجر فوق راسها، حملات ونهار ولادتها تاهيا ماتت، ولكن هاد المرة خلات ليه بنية آية فالجمال، بنت غزالة كل من شافها يذكر الله ويقول مشاءالله على جمالها.
ولكن التاجر مكان عاجبو حال، مراتو لي بغا ولي كانت معاملاه سيد الرجال ماتت وخلات ليه العار، بنت، غيعيش حياتو وهو خايف تجيبليه العار وتخسر سميتو قدام القبيلة .
دازو السنين والعوام ، والبنت لي معمرو بغا ،كبرات وزادت زيانت، ولكن كل مرة يتفكر بلي بسبابها بزاف من بنات القبيلة رفضو يتزوجوه.
وبلي هاكا تحرم من الولد ، الولد لي يورث اسمو وأملاكو، الولد لي يتباهى بيه قدام تجار القبيلة، ماشي بنت، بنت تخليه خايف على عرضو.
فواحد النهار داز للمحل تاعو وبانليه خنجر قديم كان شراه من شي زوار جاو للقببلة، خنجر منقوش وفوقو كانت ياقوتة حمراء تتبري ، هزو بين يديه وفكر مرة وحدة ،خشاه تحت جلابتو ومشا لدارو.
دخل للدار تيعيط : نوميديا ، نوميديا.
خرجات من البيت بنت طويلة ورقيقة لابسة لباس طويل وجامعة شعرها الكحل ضفيرة طويلة تقدمات عند التاجر باش تبوس يدو : نعام أ با.
التاجر نطق : لبسي وتبعيني.
وخرج.
لبسات نوميديا ، وغطات شعرها ووجها.
كانت فرحانة حيت أتخرج مع باها.
خرجات تابعاه وهو قدامها، ولي دازو من حداه تيسلم عليه، وهي تدور عينها وتشوف هنا ولهيه.
تمشاو بزاف وبعدو من القبيلة، نوميديا تتسول باها ولكن التاجر كان ساكت كيفكر.
بعدو بزاف حتى وصلو لمنبع الواد لي قاطع القبيلة، شلال كبير تيكب فبحيرة واسعة تتكب فالواد.
وقف التاجر تيشوف فنوميديا وهي ساهية فالشلال الكبير وتتسمع صوتو القوي فالبحيرة، جبد التاجر الخنجر و بلا ميفكر بزاف، ضربها جوج طعنات فقلبها، نوميديا شهقات و هي تتشوف فباها، تيطعن فيها ويعاود حتا ماتت بين يديه.
التاجر شاف فحوايجها البيضين لي تصبغو بلون الدم ، رجع لور تيتنفس بالجهد ويضور عينيه تيتأكد بلي مكاينش الزايد.
دفعها لاحها فالبحيرة ولاح معاها الخنجر وشافها حتا طاحت فالبحيرة ورجع للقبيلة.
داز أسبوع وكل نهار يتسنى شي واحد يذيع خبار الدم والبنت بانت فالواد ولكن مسمع حتا خبار من سكان للقبيلة، بدا الشك كيدخل فالتاجر ويفكر فأشنو يكون طرا حتا البحيرة ملاحتش نوميديا فالواد ،زعما شي واحد لقاها وخرجها من البحيرة ، ولا شافو شي واحد وخرجها.
تزاد معاه الزايد وراسو تشغل، فكر بزاف وناض لبس سلهامو وقصد الشلال.
مور الطريق الطويلة نزل للبحيرة هاد المرة وطل من الفوق ومبان ليه والو، لا دم لا نوميديا تيبانو، ليل قرب يطيح وصوت الما نازل من الشلال خلاه يزيد يتخلع وميقدرش ينزل يتأكد فالبحيرة ، ولكن فضولو مخلاهش يبقى واقف، حيد السلهام وحيد بلغتو ونزل.
تيغطس تحت الما ويرجع يطلع يتنفس ويعاود يغطس.
المرة لولة والتانية والتالتة، طلع وهو يلقى وجها قدام وجهو.
تخلع وغوت باغي يهرب وهي تنزل للتحت جراتو من رجليه للداخل.
رجعات طلقاتو وخرج راسو تيغوت ،عام مخلوع باش يخرج وهي تخرج ليه عاوتاني فيديها الخنجر.
التاجر تيبعد وتيعاود أي حاجة طاحت عليه من كتاب الله.
نوميديا قربات وهي تدور الخنجر فيدها: تتعرف الله؟ تتعرف كتابو؟ قتلتي بنتك لي عندك، قتلتي لي تاقت فيك ولحتيها هنا بوحدها ، ولكن هانتا رجعتي برجليك عندي دبا.
غرسات الخنجر فيه حتى قتلاتو ولاحتو جنب البحيرة واختفات هي والخنجر، لي ما بقاو عرفو عليهوم خبار.
مور سنين كتيرة بان الخنجر عاوتاني، وتعرف سرو.
فينما يقتل الظالم بالخنجر شي واحد مظلوم ،كتخرج نوميديا تنتقم ليه،وترجع تختافي هي والخنجر.
وهاكا كترو لحكايات حتا وصلونا، كاين لي قال بلي البحيرة مسكونة وهي لي انتاقمات لنوميديا، وكاين لي قال الخنجر لي مسحور وملي التاجر قتل نوميديا ،روحها دخلات فالياقوتة الحمراء وبلي فينما كان الخنجر راه نوميديا عايشة فيه."
YOU ARE READING
أسطورة نوميديا🗡️مكتملة🗡️
Fantasy💎مكتملة💎 ❌حصرية على الواتباد❌ رمضان كريم🌙🎆 ⚔️أسطورة نوميديا⚔️ بقلم : [ أكيرا ] ♤♤♤♤♤♤♤♤ -البعض قال: تحكى الأساطير للعبرة و الخبرة. -والبعض قال : أنها مجرد خرفات من نسج خيال الجدات. -ولكن أسطورتها كانت استثناء، أتت من الماضي لتحيى في الحاضر،...
